1, 2. Pse Jezui gjendet në shkretëtirën e Judesë në vjeshtën e vitit 29 të e.s., dhe çfarë i ndodh atje? (Shih figurën hapëse.)

ËSHTË fillim vjeshte, viti 29 i e.s., dhe Jezui ndodhet në shkretëtirën e Judesë, në veri të Detit të Vdekur. E ka sjellë këtu fryma e shenjtë, pas pagëzimit dhe mirosjes. Në këtë vend të shkretë, me shkëmbinj e me gryka, Jezui ka 40 ditë që agjëron, lutet dhe mediton. Mbase, gjatë kësaj kohe, Jehovai ka komunikuar me Birin e tij, duke e përgatitur për atë që e pret.

² Tani që Jezui ndihet i pafuqishëm ngaqë s’ka ngrënë, Satanai shfrytëzon rastin t’i afrohet. Mënyra si rrjedhin ngjarjet zbulon një çështje jetike ku përfshihet çdo njeri që e do adhurimin e pastër, e këtu përfshihesh edhe ti.

3, 4. (a) Me çfarë fjalësh i nisi Satanai dy tundimet e para dhe çfarë dyshimesh donte të ngjallte në mendjen e Jezuit? (b) Çfarë taktikash të ngjashme përdor Satanai sot?

³ Lexo Mateun 4:1-7. Satanai i nisi dy tundimet e para me fjalët tinëzare «nëse je bir i Perëndisë». Mos vallë dyshonte se Jezui është Bir i Perëndisë? Aspak. Ky engjëll rebel e dinte fare mirë se Jezui është Biri i parëlindur i Perëndisë. (Kolos. 1:15) Me siguri, Satanai ishte në dijeni edhe të fjalëve që tha Jehovai  nga qielli, kur u pagëzua Jezui: «Ky është Biri im, Biri im i dashur, që unë e kam miratuar.» (Mat. 3:17) Mbase Satanai donte të ngjallte në mendjen e Jezuit dyshime rreth besueshmërisë dhe dashurisë së Atit. Me tundimin e parë, kur i kërkoi të kthente gurët në bukë, me fjalë të tjera Satanai po i thoshte: «Meqë je Biri i Perëndisë, pse Ati yt s’të jep për të ngrënë në këtë vend të shkretë?» Ndërsa, kur e tundoi për herë të dytë dhe e nxiti të hidhej nga bedenat e tempullit, në njëfarë mënyrë po i thoshte: «Ti je Biri i Perëndisë, por a je vërtet i sigurt se Ati do të të mbrojë?»

⁴ Edhe sot, Satanai përdor taktika të ngjashme. (2 Kor. 2:11) Tunduesi pret derisa adhuruesit e vërtetë të ndihen të pafuqishëm a të shkurajuar dhe pastaj i sulmon, shpesh në mënyra tinëzare. (2 Kor. 11:14) Ai bën çmos që të besojmë se s’do ta kemi kurrë dashurinë dhe miratimin e Jehovait. Veç kësaj, Tunduesi përpiqet të na mbushë mendjen se Jehovai nuk është i besueshëm dhe se nuk do t’i mbajë premtimet që ka bërë në Fjalën e tij. Por këto s’janë veçse gënjeshtra të liga. (Gjoni 8:44) Atëherë, si t’i hedhim poshtë?

5. Si reagoi Jezui ndaj dy tundimeve të para?

⁵ Le të shqyrtojmë si reagoi Jezui ndaj dy tundimeve të para. Ai s’kishte pikë dyshimi se i Ati e donte dhe kishte besim absolut te Jehovai. Pa e menduar dy herë, i hodhi poshtë tundimet e Satanait duke cituar nga Fjala e frymëzuar e të Atit. Sa me vend është që citoi vargje ku gjendet emri hyjnor, Jehova! (Ligj. 6:16; 8:3) E ku kishte mënyrë më të mirë për të treguar se i besonte Atit, sesa të përdorte emrin e tij! Ky emër unik shërben si garanci se Jehovai do të mbajë çdo premtim. *

6, 7. Si mund t’u rezistojmë sulmeve tinëzare të Satanait?

⁶ Edhe ne mund t’u rezistojmë sulmeve tinëzare të Satanait, duke u mbështetur te Fjala e Jehovait e duke medituar për domethënien e emrit hyjnor. Shkrimet tregojnë se Jehovai i do dhe merakoset për shërbëtorët e tij, madje edhe për ata që i ka lëshuar zemra. Kur e kuptojmë se këto shkrime vlejnë edhe për ne, mund ta hedhim poshtë gënjeshtrën satanike se është e pamundur që Jehovai të na dojë a të na miratojë. (Psal. 34:18; 1 Pjet. 5:8) Dhe, nëse mbajmë ndër mend se Jehovai jeton gjithnjë në lartësinë e emrit të tij, nuk do të dyshojmë se Përmbushësi i premtimeve është i denjë t’i besojmë pa rezerva.—Prov. 3:5, 6.

⁷ Gjithsesi, cili është qëllimi kryesor i Satanait? Çfarë kërkon në të vërtetë nga ne? Përgjigjja u bë e qartë kur e tundoi Jezuin për herë të tretë.

8. Si e zbuloi Satanai qëllimin e tij të vërtetë herën e tretë që tundoi Jezuin?

⁸ Lexo Mateun 4:8-11. Në tundimin e tretë, Satanai i la mënjanë metodat tinëzare dhe zbuloi çfarë qëllimi kishte në të vërtetë. Ai i tregoi Jezuit (mbase me anë të një vegimi) «të gjitha mbretëritë e botës me lavdinë e tyre», por jo anën e tyre të errët. Pastaj i tha: «Të gjitha këto do të t’i jap nëse përkulesh me fytyrë përtokë para meje dhe më adhuron një herë.» * Adhurimin—këtë donte në të vërtetë Satanai. Ai donte që Jezui t’i kthente krahët të Atit dhe të pranonte Tunduesin si perëndinë e tij. Satanai i ofroi Jezuit atë që në pamje të parë dukej rruga më e lehtë. La të nënkuptohej se Jezui do të kishte të gjithë fuqinë dhe pasuritë e kombeve e s’do t’i duhej të provonte vuajtje: as kurorën me gjemba, as fshikullimet, as shtyllën e torturës. Tundimi ishte real, sepse Jezui nuk e mohoi se Satanai ishte sundimtari i qeverive të botës. (Gjoni 12:31; 1 Gjon. 5:19) Satanai çfarë s’do të kishte dhënë që Jezui ta braktiste adhurimin e pastër të Atit të tij.

9. (a) Çfarë do Satanai nga adhuruesit e vërtetë dhe si përpiqet të na tundojë? (b) Çfarë përfshin adhurimi ynë? (Shih kutinë «Çfarë është adhurimi?»)

⁹ Edhe sot e kësaj dite, Satanai dëshiron me etje që ta adhurojmë: qoftë në mënyrë të drejtpërdrejtë, qoftë të tërthortë. Meqë është «perëndia i kësaj bote», tërë adhurimi i rremë i feve të Babilonisë së Madhe i shkon Satanait. (2 Kor. 4:4)  Megjithatë nuk i mjaftojnë miliarda adhurues të rremë, por përpiqet të tundojë edhe adhuruesit e vërtetë që të mos i binden Perëndisë. Ai bën çmos të na joshë që të kërkojmë pasuri e pozitë në këtë botë, në vend se të ecim në udhën e krishterë, udhë që mund të përfshijë edhe të vuajmë «për hir të drejtësisë». (1 Pjet. 3:14) Nëse i dorëzohemi tundimit për të braktisur adhurimin e vërtetë dhe bëhemi pjesë e botës së Satanait, është sikur të përkulemi me fytyrë përtokë e të adhurojmë Satanain, duke e zgjedhur si perëndinë tonë. Atëherë, si t’i rezistojmë këtij tundimi?

10. Si reagoi Jezui ndaj tundimit të tretë dhe pse?

¹⁰ Le të shohim si reagoi Jezui ndaj tundimit të tretë. Duke treguar besnikëri absolute ndaj Jehovait, Jezui e refuzoi menjëherë ofertën e Tunduesit me fjalët: «Ik tutje, Satana!» Pastaj, siç bëri në dy tundimet e para, citoi nga Ligji i përtërirë një varg që përmban emrin hyjnor: «Është shkruar: ‘Jehovain, Perëndinë tënd, adhuro dhe vetëm atij bëji shërbim të shenjtë.’» (Mat. 4:10; Ligj. 6:13) Kështu, Jezui hodhi poshtë tundimin për të pasur një karrierë të suksesshme, por jetëshkurtër në këtë botë, si dhe për të bërë një jetë të rehatshme e pa vuajtje. Ai e pranoi se Ati i tij është i vetmi që meriton të adhurohet dhe se ‘të adhuronte’ Satanain, qoftë edhe një herë, do të thoshte t’i nënshtrohej atij. Me vendosmëri, nuk pranoi që ai Tundues i lig të bëhej perëndia i tij. Dhe, meqë Jezui e refuzoi prerazi, «Djalli e la».—Mat. 4:11. *

11. Si mund t’i rezistojmë Satanait dhe tundimeve të tij?

¹¹ Edhe ne mund t’i rezistojmë Satanait dhe tundimeve të botës së tij të ligë, sepse ashtu si Jezui, kemi mundësi zgjedhjeje. Jehovai na ka dhuruar diçka shumë të çmuar: vullnetin e lirë. Ja pse, askush—madje as Tunduesi i fuqishëm e i lig—nuk na detyron dot të braktisim adhurimin e pastër. Kur me besnikëri ‘i kundërvihemi [Satanait], të patundur në besim’, faktikisht po themi: «Ik tutje, Satana!» (1 Pjet. 5:9) Të mos harrojmë, Satanai u largua vetëm pasi Jezui e hodhi poshtë me vendosmëri ofertën e tij. Në mënyrë të ngjashme, Bibla na siguron me fjalët: «Kundërvijuni Djallit, e ai do të ikë nga ju.»—Jak. 4:7.

12. Si tregoi Satanai në Eden se është armiku i adhurimit të pastër?

¹² Me tundimin e tretë, Satanai vërtetoi se është armiku i parë i adhurimit të pastër. Mijëra vite më parë, në kopshtin e Edenit, Satanai tregoi për herë të parë se e urrente adhurimin e Jehovait. Duke joshur Evën, e cila i mbushi mendjen Adamit të shkelte urdhrin e Jehovait, Satanai i vuri nën kontrollin dhe autoritetin e tij. (Lexo Zanafillën 3:1-5; 2 Kor. 11:3; Zbul. 12:9) Kështu u bë perëndia i tyre, ndërsa ata adhuruesit e tij, megjithëse  mund të mos e kenë ditur identitetin e vërtetë të atij mashtruesi. Për më tepër, duke nxitur rebelimin në Eden, Satanai jo vetëm sfidoi sovranitetin e Jehovait, pra të drejtën e tij për të qeverisur, por edhe sulmoi adhurimin e pastër. Në ç’mënyrë?

13. Si lidhet adhurimi i pastër me çështjen e sovranitetit?

¹³ Çështja e sovranitetit lidhet ngushtë me adhurimin e pastër. Vetëm Sovrani i vërtetë, Ai ‘që krijoi gjithçka’, është i denjë të adhurohet. (Zbul. 4:11) Kur Jehovai krijoi njerëzit e përsosur, Adamin dhe Evën, dhe i vuri në kopshtin e Edenit, qëllimi i tij ishte që mbarë toka të mbushej me njerëz të përsosur që do ta adhuronin vullnetarisht—t’i bënin adhurim të pastër nga zemra të pastra. (Zan. 1:28) Satanai e sfidoi sovranitetin e Jehovait, sepse lakmoi atë që i përket me të drejtë vetëm Zotërisë Sovran Jehova: adhurimin.—Jak. 1:14, 15.

14. A pati sukses sulmi i Satanait ndaj adhurimit të pastër? Shpjego.

¹⁴ A pati sukses sulmi i Satanait ndaj adhurimit të pastër? Ai ia doli t’i largonte Adamin dhe Evën nga Perëndia. Që nga  ajo kohë, ka luftuar kundër adhurimit të vërtetë, duke u përpjekur të largojë sa më shumë veta nga Perëndia Jehova. Për shembull, në periudhën para krishterimit, Satanai nuk reshti së tunduari ata që adhuronin Jehovain. Ndërsa në shekullin e parë të e.s. nxiti me ligësi apostazinë, që e ndoti aq shumë kongregacionin e krishterë, sa dukej sikur adhurimi i pastër kishte marrë fund. (Mat. 13:24-30, 36-43; Vep. 20:29, 30) Dhe duke filluar nga shekulli i dytë i e.s., për adhuruesit e vërtetë nisi një periudhë e gjatë robërie nën Babiloninë e Madhe, perandoria botërore e fesë së rreme. Gjithsesi, Satanai nuk ka arritur ta pengojë qëllimin e Perëndisë në lidhje me adhurimin e pastër. Asgjë s’mund ta ndalojë Perëndinë ta bëjë realitet qëllimin që ka. (Isa. 46:10; 55:8-11) Në këtë çështje përfshihet vetë emri i tij, dhe Jehovai jeton gjithnjë në lartësinë e emrit që mban. Ai e përmbush gjithmonë qëllimin e vet!

15. Çfarë bëri Jehovai në Eden për të ndëshkuar rebelët dhe për të përmbushur qëllimin e tij?

¹⁵ Jehovai veproi pa vonesë në Eden për të ndëshkuar rebelët dhe mori masa që qëllimi i tij të përmbushej. (Lexo Zanafillën 3:14-19.) Ai shpalli dënimet kundër tre rebelëve, sipas radhës që kishin mëkatuar—i pari Satanai, pastaj Eva dhe në fund Adami. Duke iu drejtuar Satanait, nxitësit të padukshëm të rebelimit, Jehovai paratha ardhjen e «pasardhësit» që do të zhbënte pasojat e rebelimit. Ai ‘pasardhës’ i premtuar do të luante një rol kyç në përmbushjen e qëllimit të Jehovait për adhurimin e pastër.

16. Në ç’mënyrë Jehovai ka vazhduar të punojë për përmbushjen e qëllimit të tij pas rebelimit në Eden?

¹⁶ Jehovai ka vazhduar të punojë për të përmbushur qëllimin e tij edhe pas rebelimit në Eden. Siç do ta shohim në kapitullin tjetër, ai ka marrë masa që njerëzit e papërsosur ta adhurojnë në mënyrë të pranueshme. (Hebr. 11:4–12:1) Gjithashtu, frymëzoi disa shkrimtarë të Biblës—si Isainë, Jereminë dhe Ezekielin—që të hidhnin me shkrim profeci emocionuese për rivendosjen e adhurimit të pastër. Kjo rivendosje është një nga temat më të spikatshme të Biblës. Profecitë do të përmbusheshin nga ‘pasardhësi’ i premtuar, pjesa kryesore e të cilit është Jezu Krishti. (Gal. 3:16) Jezui është Mbrojtësi i adhurimit të pastër, siç e tregoi qartë me përgjigjen ndaj tundimit të tretë. Vërtet, Jezui është personi që Jehovai zgjodhi për të plotësuar profecitë e rivendosjes. (Zbul. 19:10) Ai do ta çlironte popullin e Perëndisë nga robëria  dhe do ta rivendoste adhurimin e pastër në vendin që i takon.

17. Pse i kemi shumë për zemër profecitë e rivendosjes?

¹⁷ Shqyrtimi i profecive të Biblës për rivendosjen është sa emocionues, edhe besimforcues. Janë profeci që i kemi shumë për zemër, ngaqë mezi presim kohën kur çdo krijesë në qiell dhe në tokë të bashkohet në adhurimin e pastër të Zotërisë Sovran Jehova. Gjithashtu, këto profeci na mbushin plot shpresë, pasi përmbajnë disa nga garancitë më zemërdhënëse që ka Fjala e Perëndisë. Cili prej nesh nuk po pret me zjarr përmbushjen e premtimeve të Jehovait, si ringjalljen e njerëzve të dashur, tokën e shndërruar në parajsë dhe jetën e pafund me shëndet të përsosur?—Isa. 33:24; 35:5, 6; Zbul. 20:12, 13; 21:3, 4.

18. Çfarë do të shqyrtojmë në këtë botim?

¹⁸ Në këtë botim do të analizojmë profecitë drithëruese që gjenden në librin e Ezekielit. Shumë prej tyre përqendrohen te rivendosja e adhurimit të pastër. Do të shohim si lidhen profecitë e Ezekielit me profeci të tjera, rolin e Krishtit në përmbushjen e tyre dhe si na përfshijnë edhe ne.—Shih kutinë «Përmbledhje e librit të Ezekielit».

19. Për çfarë je i vendosur dhe pse?

¹⁹ Në vitin 29 të e.s., në shkretëtirën e Judesë, Satanai nuk arriti ta bindte Jezuin që të braktiste adhurimin e pastër. Ç’të themi për ne? Satanai është më i vendosur se kurrë të na largojë nga adhurimi i pastër. (Zbul. 12:12, 17) Ndaj, urojmë që ky botim të na bëjë më të vendosur që t’i rezistojmë Tunduesit të lig. Dëshirojmë me gjithë zemër që fjalët e veprimet tona të tregojnë se jemi plotësisht dakord me shprehjen: «Jehovain, Perëndinë tënd, adhuro.» Vetëm atëherë do të kemi perspektivën të shohim me sytë tanë përmbushjen e qëllimit të lavdishëm të Jehovait, pra që të gjitha krijesat në qiell e në tokë t’i japin Jehovait çfarë i takon me të drejtë: adhurim të pastër nga zemra të pastra!