JOELI 3:18 Kjo profeci flet për një burim që del nga shenjtërorja e tempullit. Ajo vadit «Luginën e Akacieve» që ishte tharë. Pra, si Joeli edhe Ezekieli shohin një lumë që gjallëron një vend të pajetë. Në të dyja rastet, lumi vjen nga shtëpia e Jehovait, ose tempulli.

ZAKARIA 14:8 Profeti Zakaria sheh «ujëra jetëdhënëse» që dalin nga qyteti i Jerusalemit. Ujërat ndahen dhe gjysma shkon drejt detit lindor, ose Detit të Vdekur, kurse gjysma tjetër drejt detit perëndimor, ose Detit Mesdhe. Jerusalemi ishte «qyteti i Mbretit të madh», Perëndisë Jehova. (Mat. 5:35) Fakti që Zakaria përmend këtë qytet na bën të mendojmë për qeverisjen e Jehovait mbi gjithë tokën në të ardhmen. Siç e kemi kuptuar prej vitesh, ujërat në këtë profeci tregojnë se në Parajsë, Jehovai do të bekojë 2 grupe të njerëzve besnikë: ata që kalojnë shtrëngimin e madh dhe ata që ringjallen më pas.

ZBULESA 22:1, 2 Edhe apostulli Gjon pa një lumë shumë të ngjashëm me atë të vegimit të Ezekielit. Mirëpo, ai nuk buron nga tempulli, por nga froni i Jehovait. Ndaj duket se ky vegim thekson bekimet e Mbretërimit Mijëvjeçar, njësoj si në profecinë e Zakarisë.

Pa dyshim që ka një ndryshim fare të vogël midis bekimeve që vijnë nga qeverisja e Jehovait dhe atyre që vijnë nga lumi që pa Ezekieli në vegim. Gjithsesi, të gjitha këto bekime vijnë nga Jehovai dhe u sjellin dobi gjithë njerëzve besnikë.

PSALMI 46:4 Me sa duket, ky varg flet për të dyja aspektet—edhe për adhurimin, edhe për qeverisjen. Këtu tregohet për një lumë që e mbush me gëzim «qytetin e Perëndisë», që duket se përfaqëson Mbretërinë dhe qeverisjen e Tij, si edhe «të shenjtin tabernakull të madhërishëm të Më të Lartit», që duket se përfaqëson adhurimin e pastër.

Të gjitha bashkë, këto fragmente nga Bibla na sigurojnë se Jehovai do t’i bekojë njerëzit besnikë në dy mënyra. Do të nxjerrim dobi përgjithmonë, së pari nga qeverisja e Tij, dhe së dyti nga masa që ka marrë për adhurimin e pastër. Prandaj, le të jemi të vendosur të vazhdojmë të kërkojmë nga Perëndia Jehova dhe Biri i tij, «ujin e jetës»: pra, çdo masë të dashur që kanë marrë për jetën e përhershme.—Jer. 2:13; Gjoni 4:10.