BIBLA nuk na thotë se kur lindi Jezui. Megjithatë, na jep arsye të forta për të nxjerrë si përfundim se nuk ka lindur në dhjetor.

Të mendojmë për kushtet e motit në atë periudhë të vitit në Betlehem, ku lindi Jezui. Muaji judaik i kislevit (që përkon me periudhën nëntor-dhjetor) ishte muaj i ftohtë e me shira. Muaji tjetër pas tij ishte tebethi (dhjetor-janar). Ky muaj kishte temperaturat më të ulëta të vitit dhe hera-herës kishte edhe reshje dëbore në zonat malore. Le të shohim se çfarë thotë Bibla për klimën e këtij rajoni.

Ezdra, një shkrimtar i Biblës, tregon se kislevi ishte vërtet një muaj me mot të ftohtë e me shira. Pasi thotë që një turmë ishte mbledhur në Jerusalem «në muajin e nëntë [kislev], ditën e njëzetë të muajit», Ezdra tregon se njerëzit ishin «duke u rrëqethur . . . për shkak të shirave». Për kushtet e motit në atë periudhë të vitit, vetë populli që ishte mbledhur, tha: «Është periudha e shirave, kështu që nuk është e  mundur të qëndrosh jashtë.» (Ezdra 10:9, 13; Jeremia 36:22) Pa dyshim, barinjtë e asaj zone do të siguroheshin që ata vetë dhe kopetë e tyre të mos rrinin më jashtë natën, kur afrohej dhjetori.

Mirëpo, Bibla thotë se natën kur lindi Jezui, në fusha kishte barinj që po ruanin kopetë. Madje Luka, një shkrimtar i Biblës, tregon se në atë kohë, barinjtë «jetonin jashtë dhe natën ruanin me radhë kopetë e tyre» pranë Betlehemit. (Luka 2:8-12) Vër re që barinjtë jetonin jashtë, jo vetëm sa i nxirrnin kopetë për të kullotur gjatë ditës. Ata i kishin nxjerrë kopetë e tyre në fushë natën. A përputhet ky përshkrim me motin e ftohtë e me shira të Betlehemit në dhjetor? Jo, nuk përputhet. Prandaj, rrethanat që shoqëruan lindjen e Jezuit tregojnë se nuk lindi në dhjetor. *

Në Fjalën e Perëndisë na thuhet me saktësi se kur vdiq Jezui, por nuk ka shumë të dhëna të drejtpërdrejta për kohën kur lindi ai. Kjo na sjell në mendje fjalët e mbretit Solomon: «Një emër është më i mirë se vaji i çmuar dhe dita e vdekjes është më e mirë se dita e lindjes.» (Eklisiastiu 7:1) Prandaj, s’është për t’u habitur që Bibla jep shumë hollësi për shërbimin e për vdekjen e Jezuit, por jo shumë të dhëna për kohën kur lindi ai.