Ngaqë çifti i parë, Adami dhe Eva, nuk iu bind Perëndisë, sot për sot askush nuk i shmanget dot mëkatit, vuajtjeve dhe vdekjes. a Por nuk jemi të pashpresë. Jehovai dërgoi Birin e tij, Jezu Krishtin, që të vdiste për ne e të na çlironte nga mallkimi i mëkatit dhe i vdekjes. Bibla mëson se, me vdekjen e tij, Jezui siguroi një shpërblesë, që është çmimi që paguhet për të çliruar dikë. Çmimi që pagoi Jezui ishte jeta e përsosur si njeri. (Lexo Mateun 20:28.) Jezui mund të jetonte përgjithmonë në tokë, por me gatishmëri hoqi dorë nga kjo e drejtë që të na çelte rrugën të rifitonim gjithë sa humbi Adami dhe Eva. Gjithashtu, Jezui tregoi sa shumë na duan ai dhe Jehovai. Ky mësim do të të shtojë çmueshmërinë për vdekjen e Jezuit.

1. Ç’të mirë na sjell që tani vdekja e Jezuit?

Ngaqë jemi mëkatarë, bëjmë shumë gjëra që e mërzitin Jehovain. Por mund të bëhemi miq të ngushtë me Perëndinë, nëse na vjen vërtet keq për mëkatet tona, i kërkojmë falje Jehovait me anë të Jezuit dhe bëjmë çmos të mos i përsëritim. (1 Gjonit 2:1) Bibla thotë: «Krishti vdiq një herë e mirë për të hequr mëkatin, një i drejtë për të padrejtët, që t’ju çojë te Perëndia.»—1 Pjetrit 3:18, shënimi.

2. Çfarë të mirash do të na sjellë vdekja e Jezuit në të ardhmen?

Jehovai e dërgoi Jezuin të flijonte jetën e përsosur si njeri, «që kushdo që tregon besim [te Jezui], të mos shkatërrohet, por të ketë jetë të përhershme». (Gjoni 3:16) Falë asaj që bëri Jezui, së shpejti Jehovai do t’i zhbëjë tërë të këqijat që ka sjellë mosbindja e Adamit. Kjo do të thotë se, po të tregojmë besim te flijimi i Jezuit, mund të jetojmë përgjithmonë në një tokë parajsore.—Isaia 65:21-23.

 SHQYRTO MË TEJ

3. Vdekja e Jezuit na çliron nga mëkati dhe nga vdekja

1. Adami ishte një njeri i përsosur që nuk iu bind Perëndisë dhe e futi njerëzimin në rrugën e mëkatit dhe të vdekjes

2. Jezui ishte një njeri i përsosur që iu bind Perëndisë dhe e futi njerëzimin në rrugën e përsosmërisë dhe jetës pa fund

4. Çdo njeri mund të nxjerrë dobi nga vdekja e Jezuit

 5. Shpërblesa, dhurata që Jehovai ta ka bërë ty

Miqtë e Jehovait e shohin shpërblesën si dhuratë të bërë posaçërisht për ta. Për shembull, lexoni Galatasve 2:20 dhe më pas diskutoni për këtë pyetje:

• Cilat fjalë tregojnë se Pavli e konsideronte shpërblesën si dhuratë të bërë enkas për të?

Kur Adami mëkatoi, ai dhe gjithë pasardhësit e tij u dënuan me vdekje. Por Jehovai dërgoi Birin e tij që të vdiste për secilin prej nesh. Kështu, edhe ti ke mundësi të gëzosh jetën përgjithmonë.

Ndërsa lexon vargjet vijuese, përfytyro si u ndje Jehovai kur pa Birin e tij të vuante. Lexoni Gjonin 19:1-7, 16-18 dhe më pas diskutoni për këtë pyetje:

• Si ndihesh për atë që kanë bërë Jehovai dhe Jezui për ty?

 PËRMBLEDHJE

Falë vdekjes së Jezuit, Jehovai mund të na falë mëkatet. Kështu kemi shpresën të jetojmë përgjithmonë.

Si do të përgjigjeshe?

• Pse vdiq Jezui?

• Pse themi se Jezui si njeri i përsosur ishte një shpërblesë përkatëse?

• Ç’të mira të sjell ty vdekja e Jezuit?