Perëndia i fton të gjithë njerëzit t’i afrohen me anë të lutjes. (Psalmi 65:2) Gjithsesi ai nuk i dëgjon, ose nuk i pranon, të gjitha lutjet. Për shembull, lutjet e një burri që keqtrajton gruan e vet mund të mos pranohen. (1 Pjetrit 3:7) Gjithashtu, kur izraelitët nuk hiqnin dorë nga e keqja, Perëndia nuk ua dëgjonte lutjet. Pa diskutim, lutja është një privilegj. Megjithatë, Perëndia i pranon edhe lutjet e atyre që mëkatojnë rëndë po të pendohen.​—Lexo Isainë 1:15; 55:7.

Shih videon A i dëgjon Perëndia të gjitha lutjet?

Lutja është pjesë e adhurimit, prandaj duhet t’i lutemi vetëm Krijuesit tonë, Jehovait. (Mateu 4:10; 6:9) Veç kësaj, meqë jemi të papërsosur, duhet të lutemi në emër të Jezuit, sepse ai vdiq për mëkatet tona. (Gjoni 14:6) Jehovai nuk do që të përsëritim lutje të mësuara përmendsh a të shkruara. Dëshiron t’i lutemi nga zemra.​—Lexo Mateun 6:7; Filipianëve 4:6, 7.

Krijuesi ynë mund t’i dëgjojë edhe lutjet që i bëjmë në heshtje. (1 Samuelit 1:12, 13) Ai na fton t’i lutemi në çdo rast, si për shembull, në fillim ose në fund të ditës, para një vakti dhe kur jemi në hall.​—Lexo Psalmin 55:22; Mateun 15:36.

Nuk është e lehtë t’i afrohesh Perëndisë, pasi jetojmë mes njerëzve që nuk besojnë tek ai dhe tallen me premtimin e tij se në tokë do të ketë paqe. (2 Timoteut 3:1, 4;  2 Pjetrit 3:3, 13) Ja pse kemi nevojë të jemi në shoqërinë e bashkëbesimtarëve e t’i japim zemër njëri-tjetrit.​—Lexo Hebrenjve 10:24, 25.

Shoqëria me ata që e duan Perëndinë na ndihmon t’i afrohemi atij. Mbledhjet e Dëshmitarëve të Jehovait janë raste të shkëlqyera që të inkurajohemi nga besimi i njëri-tjetrit.​—Lexo Romakëve 1:11, 12.

Mund t’i afrohesh Jehovait duke menduar thellë për ato që ke mësuar nga Fjala e tij. Bluaji në mendje veprat, këshillat dhe premtimet e tij. Kur mendon thellë dhe lutesh, të mbushet zemra me çmueshmëri për dashurinë dhe për mençurinë e Perëndisë.​—Lexo Josiun 1:8; Psalmin 1:1-3.

Mund të lidhesh ngushtë me Perëndinë vetëm nëse ke besim dhe mbështetesh plotësisht tek ai. Veçse besimi është si një bimë që duhet ushqyer. Duhet ta ushqesh vazhdimisht duke shqyrtuar cili është themeli i bindjeve të tua.​—Lexo Mateun 4:4; Hebrenjve 11:1, 6.

Jehovai kujdeset për ata që e duan. Ka fuqi t’i mbrojë nga çdo gjë që u vë në rrezik besimin dhe shpresën e jetës së përhershme. (Psalmi 91:1, 2, 7-10) Ai na paralajmëron për ato mënyra jetese që janë një kërcënim për shëndetin dhe lumturinë tonë. Jehovai na mëson si ta jetojmë jetën në mënyrën më të mirë.​—Lexo Psalmin 73:27, 28; Jakovin 4:4, 8.