1, 2. (a) Çfarë kontribuoi në shekullin e parë që lajmi i mirë të përhapej anembanë Perandorisë Romake? (b) Çfarë provash kemi se Jehovai po na mbështet? (Shih edhe kutinë « Lajmi i mirë në më shumë se 670 gjuhë».)

 VIZITORËT në Jerusalem nuk u besojnë veshëve. Galileasit flasin rrjedhshëm në gjuhë të huaja dhe mesazhi që shpallin i bën për vete dëgjuesit. Është festa e Ditës së Pesëdhjetë e vitit 33 të e.s., dhe dishepujt mrekullisht marrin dhuratën për të folur në gjuhë të ndryshme, e kjo tregon se kanë mbështetjen e Perëndisë. (Lexo Veprat 2:1-8, 12, 15-17.) Ngaqë lajmin e mirë që po shpallin e dëgjojnë njerëz të prejardhjeve të ndryshme, ai më pas përhapet anembanë Perandorisë Romake.—Kolos. 1:23.

² Sot, shërbëtorët e Perëndisë nuk flasin gjuhë të ndryshme falë ndonjë mrekullie. Prapëseprapë e përkthejnë mesazhin e Mbretërisë në mbi 670 gjuhë, pra edhe më tepër se në shekullin e parë. (Vep. 2:9-11) Populli i Perëndisë ka prodhuar literaturë në sasi kaq të mëdha dhe në kaq shumë gjuhë, saqë mesazhi i Mbretërisë ka shkuar në çdo cep të globit. a Edhe kjo është provë e padiskutueshme se Jehovai po përdor Mbretin Jezu Krisht që të drejtojë veprën tonë të predikimit. (Mat. 28:19, 20) Ndërsa shohim vetëm disa nga mjetet që kemi përdorur për të kryer këtë vepër këto 100 vitet e fundit, vër re si na ka stërvitur Mbreti hap pas hapi që të tregojmë interes për njerëzit dhe si na ka inkurajuar të bëhemi mësues të Fjalës së Perëndisë.—2 Tim. 2:2.

3. Pse përdorim lloj-lloj mjetesh në predikim?

³ Jezui e krahasoi «fjalën e mbretërisë» me farat, dhe zemrën e njeriut me tokën. (Mat. 13:18, 19) Ashtu si një kopshtar përdor lloj-lloj mjetesh për të shkriftuar tokën dhe e përgatit që të mbjellë farën, populli i Jehovait ka përdorur lloj-lloj mjetesh për të përgatitur zemrat e miliona vetave që të mbjellë mesazhin e Mbretërisë. Disa nga këto mjete ishin të dobishme për pak kohë. Të tjera, si librat dhe revistat, akoma bëjnë goxha punë. Ndryshe nga shumica e metodave të komunikimit masiv të përmendura në  kapitullin e mëparshëm, të gjitha mjetet që do të trajtohen këtu i kanë ndihmuar lajmëtarët e Mbretërisë t’i kontaktojnë njerëzit personalisht.—Vep. 5:42; 17:2, 3.

4, 5. Si përdoreshin pllakat e gramafonit dhe çfarë u mungonte?

⁴ Fjalimet e incizuara. Nga vitet 30 deri në 40 të shekullit të 20-të, lajmëtarët përdorën fjalime biblike të incizuara që dëgjoheshin në gramafona portativë. Çdo regjistrim zgjaste më pak se pesë minuta dhe ndonjëherë kishin tituj të shkurtër, si: «Triniteti», «Purgatori» dhe «Mbretëria». Si përdoreshin këto regjistrime? Vëlla Klejtën Uduorthi i Riu, që u pagëzua më 1930 në Shtetet e Bashkuara, tha: «Kisha një gramafon të vogël si valixhe, levën e kurdisjes dhe krahun portativ, të cilin duhet ta vendosja fiks në buzë të pllakës që incizimi të dëgjohej mirë. I afrohesha një dere, hapja valixhen, vendosja krahun te pllaka dhe i bija ziles. Kur i zoti i shtëpisë hapte derën, thosha: ‘Kam një mesazh të rëndësishëm e do të kisha dëshirë ta dëgjonit.’» Si përgjigjeshin? Vëlla Uduorthi thotë: «Shpesh herë njerëzit reagonin mirë. Herë të tjera, thjesht mbyllnin derën. Me raste mendonin se po shitja gramafona.»

⁵ Në 1940-n, ishin në dispozicion më tepër se 90 fjalime të incizuara dhe mbi një milion pllaka gramafoni. Xhon Barri, që në atë kohë po shërbente si pionier në Britani e më pas në Trupin Udhëheqës, tha: «Gjatë viteve 1936-1945, gramafoni ishte shoku im i pandarë dhe ndihesha i pasigurt po të mos e kisha me vete. Ishte shumë inkurajuese të dëgjoje zërin e vëlla Radhërfordit te dera. Dukej sikur ishte aty. Sigurisht,  predikimit me gramafon i mungonte faktori mësimdhënie, aftësia për t’u prekur zemrat njerëzve.»

6, 7. (a) Cilat ishin dobitë dhe kufizimet e kartave të dëshmisë? (b) Në ç’kuptim Jehovai ‘na i ka vënë fjalët në gojë’?

⁶ Kartat e dëshmisë. Duke filluar nga viti 1933, lajmëtarët u inkurajuan të përdornin kartat e dëshmisë në shërbimin shtëpi më shtëpi. Karta e dëshmisë ishte afro 8 me 13 cm, dhe përmbante një mesazh të shkurtër biblik e një përshkrim të literaturës biblike që mund të merrte i zoti i shtëpisë. Lajmëtari thjesht ia jepte kartën pronarit të shtëpisë dhe e nxiste ta lexonte. Liliana Kamerudi, që me kalimin e kohës shërbeu si misionare në Porto-Riko dhe Argjentinë, tha: «E mora me qejf predikimin me karta dëshmie.» Pse? Ajo shpjegoi: «Jo të gjithë mund të bënim një prezantim të mirë. Prandaj më ndihmonte ta kisha gjithnjë e më të lehtë t’u predikoja njerëzve.»

⁷ Vëlla Dejvid Rëshi, që u pagëzua më 1918, vërejti: «Kartat e dëshmisë i ndihmuan vëllezërit, sepse pak veta mendonin se ishin të aftë të thoshin atë që duhej.» Megjithatë, ky mjet kishte kufizimet e veta. Vëlla Rëshi vazhdoi: «Ndonjëherë takonim njerëz që mendonin se nuk mund të flisnim. Si të thuash, shumë prej nesh nuk flisnim dot. Por Jehovai po na përgatiste t’i kontaktonim njerëzit personalisht. Shpejt ai do të na i vinte fjalët në gojë duke na mësuar të përdornim Shkrimet në veprën shtëpi më shtëpi. Kjo u arrit falë Shkollës së Shërbimit Teokratik që filloi në vitet 40 të shekullit të 20-të.»—Lexo Jereminë 1:6-9.

8. Si mund ta lejosh Krishtin të të stërvitë?

⁸ Librat. Që nga 1914-a, populli i Jehovait ka prodhuar mbi 100 libra të ndryshëm që trajtojnë tema biblike. Disa prej tyre ishin bërë enkas për të stërvitur lajmëtarët si shërbëtorë të zotë. Ana Larseni në Danimarkë, që ishte lajmëtare për nja 70 vjet, thotë: «Jehovai na ndihmoi të bëheshim lajmëtarë më efikas falë Shkollës së Shërbimit Teokratik dhe librave të tjerë që morëm. Më kujtohet se libri i parë titulloj Ndihmë teokratike për lajmëtarët e Mbretërisë, botuar më 1945. Më pas, në 1946-n doli ‘Të pajisur për çdo vepër të mirë’. Tani kemi Të nxjerrim dobi nga arsimimi në Shkollën e Shërbimit Teokratik, botuar më 2001.» Sigurisht, Shkolla e Shërbimit Teokratik dhe libra të tjerë kanë luajtur rol kyç teksa Jehovai «na ka kualifikuar aq sa duhet për të qenë shërbëtorë». (2 Kor. 3:5, 6) A je regjistruar në Shkollën e Shërbimit Teokratik? A e merr çdo javë me vete në mbledhje librin Shkolla e Shërbimit dhe a e hap kur mbikëqyrësi i shkollës i referohet? Po të bësh kështu, do ta lejosh  Krishtin të të stërvitë për t’u bërë mësues më i mirë.—2 Kor. 9:6; 2 Tim. 2:15.

9, 10. Ç’rol kanë luajtur librat në mbjelljen dhe ujitjen e farave të së vërtetës?

⁹ Gjithashtu Jehovai, nëpërmjet organizatës, ka siguruar libra që ndihmojnë lajmëtarët të dinë si t’i shpjegojnë mësimet bazë të Biblës. Libri E vërteta që të çon në jetën e përjetshme, botuar më 1968, ishte veçanërisht i efektshëm dhe u pëlqye menjëherë. Shërbimi i Mbretërisë i nëntorit 1968 (angl.) tha: «Kërkesa për librin E vërteta ka qenë aq e lartë, saqë në shtator fabrika e shoqatës në Bruklin shtoi një turn nate për këtë rast.» Artikulli shkruante më tej: «Një herë, në gusht, kërkesa për librin E vërteta e tejkaloi më shumë se një milion e gjysmë sasinë që kishim në dispozicion!» Deri më 1982, ishin botuar mbi 100 milionë libra në 116 gjuhë. Në këto 14 vite, 1968-1982, falë këtij libri u shtuan në radhët tona më shumë se një milion lajmëtarë të Mbretërisë. b

¹⁰ Në 2005-n doli një tjetër botim i jashtëzakonshëm për të studiuar Biblën, Çfarë mëson vërtet Bibla? Rreth 200 milionë kopje janë botuar tashmë në 256 gjuhë. Me cilin rezultat? Vetëm për shtatë vjet, nga 2005-a deri në 2012-n, afro 1,2 milionë njerëz u bënë predikues të lajmit të mirë. Po në këtë kohë, numri i studimeve biblike u rrit nga pothuajse 6 milionë në më se 8,7 milionë. Pa diskutim, Jehovai po i bekon përpjekjet tona për të mbjellë e ujitur farat e së vërtetës për Mbretërinë.—Lexo 1 Korintasve 3:6, 7.

11, 12. Në përputhje me shkrimet e cituara, për cilët u bënë revistat tona.

¹¹ Revistat. Fillimisht Kulla e Rojës ishte sidomos për ‘kopenë e vogël’, ata ‘me thirrje qiellore’. (Luka 12:32; Hebr. 3:1) Më 1 tetor 1919, organizata e Jehovait nxori një revistë tjetër, e cila ishte menduar për një auditor ndryshe, për publikun. Kjo revistë u pëlqye kaq shumë, si nga Studentët e Biblës, edhe nga publiku, saqë për vite me radhë kishte tirazh ku e ku më të lartë se Kulla e Rojës. Kur doli për herë të parë quhej Epoka e artë. Më 1937 mori emrin Ngushëllim. Më vonë, në 1946-n, u quajt Zgjohuni!

¹² Gjatë dekadave, stili dhe formati i Kullës së Rojës dhe i Zgjohuni! kanë ndryshuar, por qëllimi ka mbetur i njëjtë: të lajmërojnë Mbretërinë e Perëndisë dhe të ndërtojnë besimin te Bibla. Sot Kulla e Rojës shtypet në dy botime: një për studim dhe një për publikun. Botimi për studim është për «shërbëtorët e shtëpisë», pra për ‘kopenë e vogël’ dhe për ‘delet e tjera’. c (Mat. 24:45; Gjoni 10:16) Botimi për publikun është përgatitur sidomos për ata që nuk e njohin ende të vërtetën, por që kanë respekt për Biblën  dhe Zotin. (Vep. 13:16) Zgjohuni! fokusohet tek ata që dinë pak për Biblën dhe për Zotin e vërtetë, Jehovain.—Vep. 17:22, 23.

13. Çfarë kanë të jashtëzakonshme revistat tona? (Trajto grafikun « Rekordet botërore të botimeve».)

¹³ Në fillim të vitit 2014, çdo muaj u botuan më tepër se 44 milionë revista Zgjohuni! dhe gati 46 milionë Kulla të Rojës. Revista Zgjohuni! u përkthye në afro 100 gjuhë dhe Kulla e Rojës në më se 200, duke i bërë revistat më të përkthyera dhe më të shpërndara në botë! Këto arritje marramendëse nuk na habitin, pasi revistat përmbajnë mesazhin që Jezui tha se do të predikohej në të gjithë tokën e banuar.—Mat. 24:14.

14. Cilës i kemi dhënë shtysë gjithë zell dhe pse?

¹⁴ Bibla. Më 1896, vëlla Rasëlli dhe bashkëpunëtorët e tij ndryshuan emrin e korporatës që përdornin për të botuar literaturë, në mënyrë që të përfshinin fjalën Bibël. Prandaj u quajt Watch Tower Bible and Tract Society. Ky ndryshim ishte me vend, sepse Bibla ka qenë gjithmonë mjeti kryesor për të shpërndarë lajmin e mirë të Mbretërisë. (Luka 24:27) Në përputhje me emrin ligjor të korporatës, gjithë zell shërbëtorët e Perëndisë i kanë dhënë shtysë shpërndarjes dhe leximit të Biblës. Për shembull, më 1926, botuam në shtypshkronjat tona The Emphatic Diaglott, një përkthim nga Benxhamin Uillsoni i Shkrimeve të Krishtere Greke. Duke filluar nga 1942-shi, botuam dhe shpërndamë afro 700.000 kopje të versionit të plotë të King James. Vetëm dy vjet më pas, filluam të shtypnim American Standard Version, në të cilin emri i Jehovait gjendet 6.823 herë. Në 1950-n, kishim shpërndarë tashmë mbi 250.000 kopje.

15, 16. (a) Çfarë vlerëson te Përkthimi Bota e Re? (Trajto kutinë « I jepet vrull përkthimit të Biblës».) (b) Si mund ta lejosh Jehovai të të prekë zemrën?

¹⁵ Në vitin 1950 u botua Shkrimet e Krishtere Greke—Përkthimi Bota e Re. Më 1961 doli i përmbledhur në një vëllim Shkrimet e Shenjta—Përkthimi Bota e Re. Ky përkthim lartëson emrin e Jehovait duke e rivendosur atë sa herë del në tekstin origjinal, në hebraisht. Edhe në tekstin kryesor të Shkrimeve të Krishtere Greke të Përkthimit Bota e Re emri hyjnor del 237 herë. Ky përkthim është rishikuar disa herë, së fundi më 2013, që të jetë sa më i saktë dhe i lehtë për t’u lexuar. Në 2013-n, më se 201 milionë kopje të Përkthimit Bota e Re janë botuar plotësisht ose pjesërisht në 121 gjuhë.

¹⁶ Si janë ndier disa kur kanë lexuar Përkthimin Bota e Re në gjuhën e tyre? Një burrë nga Nepali tha: «Për shumë veta përkthimi i vjetër nepalez ishte i vështirë për t’u kuptuar, meqë përdorej gjuha klasike ose e lashtë. Por tani e kuptojmë Biblën shumë më mirë, sepse është në gjuhën e përditshme.» Kur një grua në Republikën e Afrikës Qendrore filloi të lexonte përkthimin në gjuhën sango, nisi  të qante dhe tha: «Kjo është gjuha e zemrës sime.» Si kjo grua, secili prej nesh mund ta lejojë Jehovain t’ia prekë zemrën duke lexuar Fjalën e tij çdo ditë.—Psal. 1:2; Mat. 22:36, 37.

17. Si mund të tregosh se i vlerëson mjetet dhe stërvitjen që merr dhe cili do të jetë rezultati nëse vepron kështu?

¹⁷ A i vlerëson mjetet dhe stërvitjen progresive që të ka dhënë Mbreti Jezu Krisht? A lë kohë të lexosh literaturën që prodhon organizata e Perëndisë dhe a e përdor t’i ndihmosh të tjerët? Nëse po, do ta gjesh veten në fjalët e motrës Opël Betleri, që u pagëzua më 4 tetor 1914. Opëli tha: «Gjatë viteve, unë dhe im shoq [Eduardi] përdorëm gramafonin dhe kartat e dëshmisë. Predikuam shtëpi më shtëpi me anë të librave, librezave dhe revistave. Shkuam në fushata dhe marshime e shpërndamë fletëpalosje. Më tej u stërvitëm të bënim rivizita dhe të drejtonim studime biblike në shtëpitë e të interesuarve. Ishte një jetë aktive dhe e lumtur.» Jezui premtoi se nënshtetasit e tij do të mbillnin, do të korrnin e do të gëzonin së bashku. Miliona veta si Opëli mund të dëshmojnë sa i vërtetë është ky premtim.—Lexo Gjonin 4:35, 36.

18. Çfarë privilegji kemi?

¹⁸ Shumë nga ata që nuk janë shërbëtorë të Mbretit mund ta konsiderojnë popullin e Perëndisë si «të pashkolluar e të thjeshtë». (Vep. 4:13) Por mendo! Falë Mbretit, ky popull i thjeshtë është bërë një forcë e madhe botuese, pasi ka prodhuar disa prej botimeve më të përkthyera e më të shpërndara në histori! Ç’është më e rëndësishmja, na ka stërvitur dhe na ka motivuar t’i përdorim këto mjete, që t’ua çojmë lajmin e mirë njerëzve të çdo kombi. Është privilegj për ne të punojmë me Krishtin në mbjelljen e farave të së vërtetës dhe në korrjen e dishepujve!