A po jua ngre kafeja nivelin e kolesterolit?

NGA KORRESPONDENTI I ZGJOHUNI! NË BRAZIL

STUDIUESIT në Universitetin Bujqësor të Vageningenit, në Holandë, thonë se pirja e kafesë së pafiltruar ngre nivelin e kolesterolit.

Fjala kyç është «e pafiltruar». Përse? Në Research Reports, një buletin i Organizatës së Holandës për Kërkime Shkencore, thuhet se kokrrat e kafesë përmbajnë një substancë të quajtur kafestol, e cila ngre nivelin e kolesterolit. Kur mbi kafen e bluar hidhet direkt ujë i nxehtë, del kafestoli. E njëjta gjë ndodh kur kafeja e bluar imët zjehet në ujë për njëfarë kohe, ashtu si në rastin e kafes turke, ose kur në vend të një filtri letre përdoret filtër prej metali, si në rastin e ekspresit francez. Pa një filtër letre, kafestoli përfundon në kafen që do të pimë.

Një filxhan me kafe të pafiltruar, i cili mund të përmbajë deri në katër miligramë kafestol, mund të bëjë që niveli i kolesterolit të ngrihet rreth 1 për qind. Edhe ekspresi përmban kafestol, përderisa nuk bëhet me filtër letre. Megjithatë, ndikimi i tij në rritjen e nivelit të kolesterolit është më i pakët, nëse përdorim një filxhan të vogël. Më pak ekspres, më pak kafestol​—ndoshta vetëm një ose dy miligramë për çdo filxhan. Sidoqoftë, Research Reports paralajmëron se pesë filxhanë të vegjël ekspres në ditë mund ta ngrenë nivelin e kolesterolit 2 për qind.

Thelbi i çështjes është që kafeja e bërë me filtër letre nuk përmban kafestol.