Pije freskuese nga një bimë ekzotike
Pije freskuese nga një bimë ekzotike
NGA NJË SHKRIMTAR I ZGJOHUNI! NË NIGERI
A JU pëlqen një pije e ftohtë në një ditë të nxehtë? Shumë familje në Afrikën Perëndimore pëlqejnë një pije freskuese me ngjyrë të ndezur, me shije të këndshme, të shëndetshme dhe që nuk kushton shumë—në të vërtetë, ajo bëhet nga një bimë. Pija quhet bisap dhe bima me lule nga e cila nxirret është hibisku tropikal. Kjo bimë mund të arrijë një lartësi prej dy a më shumë metrash. Rritet në rajone të ndryshme të botës, por veçanërisht në klima më të thata në vende të tilla, si: Nigeria, Mali dhe Senegali.
Ja si përgatitet bisapi
Në rreth një litër ujë hidhet një lugë gjelle me nënpetlat e bimës. Përzierja zihet derisa të valojë dhe pastaj lihet në qetësi për 15 deri 20 minuta. Nënpetlat kullohen dhe çaji mund të pihet i nxehtë ose i ftohtë, me ose pa sheqer. Sot duam të përgatitim një pije të ftohtë që do t’u pëlqejë fëmijëve, prandaj do t’i hedhim sheqer. Gjithashtu, disa familje e përgatitin pijen me aromë mendre ose vaniljeje. Bisapi i ftohtë me ngjyrë të kuqe të ndezur hidhet në qeska plastike të tejdukshme, të cilat më pas lidhen nyjë. Tani është gati për t’ua shpërndarë fëmijëve që mezi po e presin. Me gëzim ata e çajnë qeskën në një cep dhe kënaqen me pijen që u pëlqen aq shumë. Sigurisht, disa parapëlqejnë ta pinë në gotë.
Përveçse që ka shije të këndshme, bisapi thuhet se të bën mirë. Përmban kalcium, fosfor, hekur, vitaminë A e C dhe të tjera. Disa thonë se bisapi është gjithashtu një pastrues i lehtë, një diuretik dhe stimulues për mëlçinë. Sidoqoftë, sa të kënaqur jemi që përveçse është e bukur në pamje, kjo bimë na jep një pije freskuese e të shëndetme!
[Burimi i figurës në faqen 31]
Foto nga Kazuo Yamasaki