‘I bindemi Perëndisë në vend të njerëzve’

Kur ishte 17 vjeç, Adami ishte një ndër tre fituesit e një konkursi, të financuar nga Muzeu Përkujtimor i Holokaustit, në SHBA. Ata që u paraqitën në konkurs, gjithsej afro 500 veta, përdorën artin ose shkrimin për të përshkruar guximin nën shtypjen naziste. Adami është Dëshmitar i Jehovait dhe vendosi të bënte një stendë ku do të paraqiste mundimet që kaluan anëtarët e fesë së tij gjatë regjimit nazist. Adami thotë se arti nuk pasqyronte dështim ose mëri, por gëzim sepse Dëshmitarët e Jehovait ngadhënjyen gjatë sulmit të egër të atij shtypësi mizor. Shfaqet edhe një fëmijë. Pse? «Për të nxjerrë në pah që edhe fëmijët qëndruan të fortë ndaj përndjekjes naziste»,​—thotë Adami.

Dihet mirë që gjatë epokës naziste Dëshmitarët e Jehovait nuk pranuan të bënin përshëndetjen hitleriane ose të mbështetnin partinë e Hitlerit. Qëndrimi i tyre bëhet i qartë nga këndi i sipërm në anën e djathtë të stendës që bëri Adami. Aty citohet një letër që i ishte dërguar qeverisë gjermane më 7 tetor 1934 nga të gjitha kongregacionet e Dëshmitarëve të Jehovait. Pjesërisht letra pohonte: «Ligji juaj bie ndesh në mënyrë të drejtpërdrejtë me ligjin e Perëndisë dhe, duke ndjekur shembullin e apostujve besnikë, ‘ne duhet t’i bindemi Perëndisë në vend të njerëzve’, dhe kështu do të bëjmë. (Veprat 5:29). . . Meqë qeveria juaj dhe zyrtarët e saj vazhdojnë me përpjekjet për të na shtrënguar që të mos i bindemi ligjit më të lartë të universit, detyrohemi tani t’ju bëjmë të ditur se ne do t’i bindemi, me ndihmën e tij, Perëndisë Jehova dhe do të kemi besim të plotë tek Ai se do të na çlirojë nga e gjithë shtypja dhe të gjithë shtypësit.»

Adami është krenar për trashëgiminë e tij frymore. «Dëshmitarët e Jehovait me vendosmëri besonin se nuk duhej të dëmtonin njerëzit e tjerë dhe nuk duhej të adhuronin askënd tjetër veç Perëndisë, edhe kur kjo nënkuptonte vdekjen»,​—thotë ai. Qëndrimi i palëkundur i Dëshmitarëve të Jehovait pasqyrohet në titullin që Adami i dha stendës: «Ne do t’i bindemi Perëndisë në vend të njerëzve!»