Një vështrim rreth botës

▪ «Ose për shkak të ngrohjes globale, ose për ndonjë arsye tjetër, katastrofat e lidhura me motin u trefishuan në vitet 70 deri në vitet 90.»​—THE ECONOMIST, BRITANI.

▪ Një djali 10-muajsh i është dhënë leja për armëmbajtje në shtetin e Ilinoisit, SHBA. Në lejen që e kërkoi i ati, jepet gjatësia e foshnjës rreth 69 cm dhe pesha rreth 9 kg. Në këtë shtet nuk ka kufizime për moshën e atyre që mund të bëjnë kërkesë.​—CABLE NEWS NETWORK, SHBA.

▪ Shkencëtarët e kanë kthyer në akull ujin që ishte nën trysni ekstreme dhe «më i nxehtë se pika e vlimit të ujit». Përveç akullit «të zakonshëm», ka «të paktën 11 lloje të tjera akulli që krijohen në gjithfarë temperaturash dhe trysnish».​—SANDIA NATIONAL LABORATORIES, SHBA.

Rivendoset liria fetare në Gjeorgji

Gjykata Evropiane e të Drejtave të Njeriut mori një vendim kundër qeverisë së Gjeorgjisë që kishte lejuar ushtrimin e dhunës fetare ndaj Dëshmitarëve të Jehovait. Gjykata shpalli sërish të drejtën e Dëshmitarëve, si fe e njohur e krishterë, që të mblidhen për të adhuruar e për të studiuar Biblën. Gjithashtu urdhëroi që viktimat të dëmshpërbleheshin për vuajtjet dhe shpenzimet ligjore. Nga tetori i vitit 1999 deri në nëntor të 2002-shit, kundër Dëshmitarëve të Jehovait u bënë 138 sulme të dhunshme dhe autoriteteve gjeorgjiane iu paraqitën 784 ankesa. Megjithatë, për këto ankesa nuk u ndërmor asnjë hetim serioz. Madje policia nuk pranoi të ndërhynte menjëherë dhe të mbronte viktimat. Dhuna është pakësuar ndjeshëm që nga nëntori i vitit 2003.

Observator i lashtë diellor në Peru

Sot arkeologët kanë hedhur idenë se një pjesë e një rrënoje misterioze 2.300-vjeçare në Peru, ka shërbyer si observator diellor. Në vendndodhjen e tij, të quajtur Çankijo, gjendet mbi një kreshtë një varg me 13 kulla. Ky varg krijon një horizont «dhëmbë-dhëmbë» paksa të harkuar. Sipas revistës Science, pikat e vrojtimit ishin «zgjedhur në mënyrë të tillë që në solsticet e dimrit e të verës, dielli të lindte e të perëndonte mbi kullat në [skajet] e vargut. Kështu përcaktohej fillimi dhe mesi i vitit diellor». Lindja dhe perëndimi i diellit në kullat e ndërmjetme përcakton momente të tjera të vitit. Në këtë vend të thatë, ishte jetike të dije kohën e mbjelljeve, prandaj «njerëzit [duhej] t’i dinin datat me njëfarë saktësie».

[Diagrami dhe figura në faqen 29]

(Për tekstin e kompozuar, shiko botimin)

Solstici i qershorit

Ekuinoksi

Solstici i dhjetorit

Observatori

[Burimi]

REUTERS/​Ivan Ghezzi/​Handout

Pamje që i bëjnë gratë të ndihen keq

«Bjondja superelegante dhe magjepsëse në kopertinat e revistave bën që të gjitha gratë të ndihen keq për trupin e tyre, pavarësisht nga përmasat, forma, gjatësia ose mosha që kanë»,​—thotë një raport i Universitetit të Kolumbias në Misuri, Shtetet e Bashkuara. Lori Minci, profesoreshë për arsimin, shkollën dhe psikologjinë e këshillimit, thotë që «mendohej se gratë më të bëshme ndiheshin më keq se ato më elegante kur shihnin trupin ideal në media». Por, Minci shton: «Zbuluam që pesha nuk ndikonte. Këto pamje bënin të ndihej keq kushdo.»