Në Gjermani, në vitin 2010, rreth 33 për qind e fëmijëve kanë lindur jashtë martese, në krahasim me vitin 1993 që ishin 15 për qind.​—ÄRZTE ZEITUNG dhe THE LOCAL, GJERMANI.

Sipas regjistrimit të vitit 2010, 69,4 për qind e fëmijëve në Shtetet e Bashkuara jetojnë me të dy prindërit, 23,1 për qind jetojnë vetëm me nënën, 3,4 për qind jetojnë vetëm me babanë dhe 4,1 për qind nuk jetojnë me asnjë nga prindërit.​—ZYRA E REGJISTRIMEVE NË SHTETET E BASHKUARA.

Katastrofat natyrore i kushtuan ekonomisë globale rreth 380 miliardë dollarë në vitin 2011. Tërmeti në Japoni ishte «katastrofa më e kushtueshme e të gjitha kohëve, me një humbje prej 210 miliardë dollarësh, pa përfshirë incidentin bërthamor në Fukushimë».​—NEW SCIENTIST, BRITANI.

Në mbarë botën, produkti që vidhet më tepër është djathi. Çdo vit vidhet më tepër se 3 për qind e djathit në shitjen me pakicë, kryesisht nga klientët dhe punonjësit.​—QENDRA E KËRKIMEVE PËR SHITJET ME PAKICË, BRITANI.

Gjuajtja me kokë në futboll është pjesë e lojës. Por studimet e fundit të bazuara në teknikat e përparuara të imazherisë dhe në testimet e aftësive mendore, kanë ngritur problemin e rrezikut kur topi gjuhet me kokë në mënyrë të përsëritur. Sipas studiuesve në fakultetin e mjekësisë «Albert Ajnshtajn» të Nju-Jorkut, SHBA, gjuajtja me kokë «rrit rrezikun e dëmtimit në tru dhe e dobësimit të aftësive mendore». Janë vënë re dëmtime ndër amatorët që e gjuanin topin më shumë se 1.000 deri 1.500 herë në vit, që i bie vetëm «pak herë në ditë për një amator që luan rregullisht».

«Grupe për mbrojtjen e të drejtave të këmbësorëve janë ankuar se makinat elektrike hibride vënë në rrezik jetën e këmbësorëve,—thotë Ministria e Transportit e Shteteve të Bashkuara.—Ata shqetësohen se këto makina duken disi më të qeta e nuk bëjnë zhurmë, që këmbësorët dhe ata me biçikletë të kuptojnë se një makinë po u afrohet kur janë në rrugë ose në kryqëzim.» Kjo ministri thotë se «këto makina kanë dy herë më tepër të ngjarë të aksidentojnë këmbësorët» sesa makinat e tjera kur bëjnë manovra të caktuara. Ja pse Administrata Kombëtare e Sigurisë së Trafikut Rrugor ka propozuar të kërkohet që makinat hibride dhe elektrike të bëjnë ndonjë lloj zhurme kur janë me shpejtësi të ulët.