Bibla ka mbijetuar. Prandaj, edhe ti mund të kesh një kopje e ta lexosh. Dhe, kur zgjedh një përkthim të mirë të Shkrimeve, të jesh i sigurt se po lexon një kopje të besueshme të shkrimeve origjinale. * Por pse ka mbijetuar Bibla pavarësisht nga dekompozimi natyror, nga kundërshtimi i egër dhe nga ndryshimi i qëllimshëm i mesazhit të saj, pas së cilave shpesh ka histori mbijetese të mahnitshme? Çfarë ka të veçantë ky libër?

Shumë studentë të Biblës kanë arritur në të njëjtin përfundim si apostulli Pavël: «I gjithë Shkrimi është i frymëzuar nga Perëndia.» (2 Timoteut 3:16) Ata besojnë se Bibla ka mbijetuar sepse është Fjala unike e Perëndisë dhe sepse Ai e ka mbrojtur deri më sot. Faizali, që përmendëm në artikullin e parë të kësaj serie, vendosi t’i analizonte vetë ato që thuhen për Biblën, duke e studiuar. U habit nga ajo që zbuloi. Shpejt kuptoi se shumë nga mësimet tipike të krishterimit nuk gjenden në Bibël. Për më tepër, e preku thellë qëllimi i Perëndisë për tokën, siç tregohet në Fjalën e tij.

Ai shprehet: «Tani jam i bindur se Bibla që kam, është dhuratë nga Perëndia. Në fund të fundit, nëse Zoti ka bërë universin, a nuk ka fuqi të na japë një libër e ta mbrojë atë? Po të thosha të kundërtën, do t’i vija kufi fuqisë së Perëndisë. E kush jam unë që t’i vë kufi fuqisë së të Plotfuqishmit?!»​—Isaia 40:8.