Ngushëllim për ata që thërrasin për ndihmë
Ngushëllim për ata që thërrasin për ndihmë
BIBLA nuk është një manual psikologjie. Megjithatë, na jep ngushëllim e na ndihmon ta vlerësojmë jetën, pavarësisht nga problemet që hasim. Shkrimet në mënyrë realiste thonë: «Njeriu i lindur nga një grua jeton pak ditë dhe është plot shqetësime.» (Jobi 14:1) Disa nga problemet na ndodhin për faj të papërsosmërisë sonë. Por, kush është kryesisht përgjegjës për vuajtjet njerëzore?
Bibla e identifikon këtë person si një krijesë të ligë frymore të quajtur Djall e Satana. Ai po «mashtron gjithë tokën e banuar» dhe është shkaktari i shumicës së problemeve që i kanë rënë njerëzimit. Megjithatë, Bibla na thotë edhe se koha e tij po mbaron. (Zbulesa 12:9, 12) Së shpejti, me ndërhyrjen e Perëndisë të gjitha vuajtjet që Satanai u ka sjellë banorëve të tokës do të mbarojnë. Sipas Biblës, bota e re e drejtësisë që ka premtuar Perëndia do t’i japë fund gjendjes së pashpresë dhe dëshpërimit.—2 Pjetrit 3:13.
Sa ngushëlluese është të dimë se vuajtjet njerëzore janë të përkohshme! Nën sundimin e Mbretërisë qiellore të Perëndisë, të drejtuar nga Jezu Krishti, vuajtjet dhe padrejtësitë do të marrin fund. Për Mbretin që ka caktuar Perëndia, Shkrimet thonë: «Ai do ta çlirojë nevojtarin që bërtet dhe të mjerin që nuk ka se kush ta ndihmojë. Atij do t’i vijë keq për të dobëtin dhe për nevojtarin dhe do të shpëtojë jetën e nevojtarëve. Ai do të çlirojë jetën e tyre nga shtypja dhe nga dhuna dhe gjaku i tyre do të jetë i çmuar para syve të tij.»—Psalmi 72:12-14.
Koha kur do të përmbushen këto fjalë profetike është shumë afër. Ne mund të gëzojmë jetën e përhershme në një tokë parajsore në kushte të mrekullueshme. (Luka 23:43; Gjoni 17:3) Njohuria për këto premtime ngushëlluese nga Shkrimet u jep shpresë e ngushëllim atyre që thërrasin për ndihmë.
[Burimi i figurës në faqen 32]
Vajzë e dëshpëruar: Fotografia ILO/J. Maillard