Na pret një botë pa krime

ARRINI ta mendoni një botë pa kriminelë? S’do të kishte nevojë për policë, për burgje ose për sisteme gjyqësore të kushtueshme e të ndërlikuara për çështjet kriminale. Do të ishte një botë ku çdo individ do të respektonte jetën dhe pronën e të tjerëve. A duket kjo si një ëndërr e parealizueshme? Ndoshta mendoni se po, por ky ndryshim mahnitës është pikërisht ajo që premton Bibla. Pse të mos shqyrtoni çfarë parathonë Shkrimet lidhur me krimin e me gjëra të tjera të liga në tokë?

Në librin e Psalmeve lexojmë: «Mos u dëshpëro për shkak të njerëzve të këqij; mos ki smirë ata që veprojnë me ligësi, sepse ata shpejt do të kositen si bari dhe do të thahen si bari i blertë. Por zemërbutët do të zotërojnë tokën dhe do të gëzojnë një paqe të madhe.» (Psalmi 37:1, 2, 11) E vërteta është se askush s’mund ta ndalë Perëndinë që të përmbushë këtë premtim dhe gjithë premtimet e tjera ngushëlluese që ka bërë.

Mjeti me të cilin Perëndia do t’i sjellë këto bekime është Mbretëria e tij. Në lutjen e Zotërisë, Jezu Krishti u mësoi ithtarëve të tij të luten që kjo Mbretëri të vijë dhe që vullneti i Perëndisë të bëhet «si në qiell, edhe mbi tokë». (Mateu 6:9, 10) Së shpejti, gjatë sundimit të kësaj Mbretërie askush në tokë nuk do të ketë arsye të kryejë krime për shkak të varfërisë, shtypjes ose egoizmit. Në vend të kësaj, në Fjalën e Perëndisë thuhet: «Do të ketë bollëk gruri mbi tokë, në majat e maleve.» (Psalmi 72:16) Vërtet Perëndia Jehova do t’u sigurojë të gjithëve në tokë gjëra të mira pa fund. Ç’është më e rëndësishmja, shoqëria njerëzore do të jetë e bazuar në dashurinë për Perëndinë dhe për të afërmin, kështu që bota nuk do të trazohet më kurrë nga krimet.