Pse Dëshmitarët e Jehovait vazhdojnë t’ju vizitojnë?

Anembanë botës Dëshmitarët e Jehovait njihen mirë për faktin që vazhdojnë me ngulm shërbimin e tyre shtëpi më shtëpi. Disa njerëz çuditen se përse Dëshmitarët vazhdojnë të shkojnë te shtëpitë e tyre, sidomos nëse kanë treguar pak interes ndaj mesazhit që predikojnë. Dy letra nga Rusia ndihmojnë për të shpjeguar arsyen.

Masha, një vajzë 19-vjeçare nga Kabarovski thotë: «Sinqerisht, më parë u qëndroja sa më larg që mundesha Dëshmitarëve të Jehovait.» Megjithatë, pasi lexoi disa kopje të revistave të botuara nga Dëshmitarët, ajo ndryshoi qëndrim. Masha shkruan: «Gjithçka që kam lexuar në to është shumë interesante dhe informuese, por ajo që është më e rëndësishmja, të bën ta shohësh botën me një sy tjetër. Dalëngadalë fillova të kuptoj se cili është qëllimi i jetës.»

Svjetlana nga qyteti Usurijski, rreth 80 kilometra në veri të Vladivostokut, shkroi: «Kohët e fundit kam filluar të lexoj revistat Kulla e Rojës dhe Zgjohuni! Këto revista janë shumë të nevojshme për kohën tonë. Më pëlqejnë të gjithë artikujt. Janë shumë interesantë, informues dhe të dobishëm. Faleminderit! Faleminderit shumë që ekzistoni në këtë botë dhe që bëni një vepër kaq dashamirëse dhe të nevojshme.»

Dëshmitarët e Jehovait anembanë botës e marrin seriozisht pyetjen e apostullit Pavël që të bën të mendosh: «Po ashtu, si do të dëgjojnë [njerëzit], kur s’ka kush predikon?» (Romakëve 10:14) Ju ftojmë që të ndaleni disa minuta e t’i dëgjoni Dëshmitarët e Jehovait herën tjetër që do t’ju vizitojnë. Edhe ju mund të merrni mesazhin ngushëllues që gjendet në Fjalën e Perëndisë, Biblën.