Kurrë nuk është tepër vonë për t’i shërbyer Perëndisë
Kurrë nuk është tepër vonë për t’i shërbyer Perëndisë
Në Malagë, në jug të Spanjës, një nënë dhe e bija, të dyja me emrin Ana, u pagëzuan më 19 dhjetor 2009. Ato ishin mes 2.352 vetave që bënë këtë hap gjatë vitit 2009 në Spanjë. Por kishte diçka të pazakontë te kjo nënë dhe tek e bija—mosha e tyre. Ishin përkatësisht 107 dhe 83 vjeçe.
Çfarë i shtyu të pagëzoheshin në simbol të kushtimit të tyre ndaj Jehovait? Në fillim të viteve 70, një fqinjë Dëshmitare e ftoi Anën, vajzën, në Studimin e Librit të Kongregacionit që mbahej në shtëpinë e saj. Ana merrte pjesë herë pas here. Megjithatë, për shkak të punës nuk përparoi më tej.
Rreth dhjetë vjet më vonë, disa nga fëmijët e Anës nisën të studionin Biblën dhe me kalimin e kohës u bënë shërbëtorë të Jehovait. Një prej tyre, Mari-Karmeni, më në fund arriti të rindizte dashurinë e nënës së saj për të vërtetën biblike, si edhe e ndihmoi të pranonte një studim biblik. Atëherë edhe gjyshja e Mari-Karmenit, Ana më e moshuar, filloi të tregonte interes për Biblën. Në fund, dhjetë pjesëtarë të kësaj familjeje u pagëzuan.
Ditën e pagëzimit, të dyja Anat, nënë e bijë, rrezatonin nga gëzimi. «Jehovai është treguar shumë i mirë me mua duke më lejuar ta njoh»,—tha Ana 107-vjeçare. E bija shtoi: «Para se të vijë parajsa, dua t’i shërbej Jehovait, të bëj vullnetin e tij dhe të predikoj lajmin e mirë sa më shumë të mundem.»
Ajo që në veçanti u jep gëzim këtyre dy vejushave, është pjesëmarrja në mbledhje. «Ato nuk mungojnë në asnjë mbledhje,—thotë një nga pleqtë e kongregacionit të tyre.—Janë gjithnjë gati të komentojnë gjatë Studimit të Kullës së Rojës.»
Shembulli i tyre besnik na sjell në mend një vejushë me emrin Ana, e cila «nuk mungonte kurrë në tempull dhe bënte shërbim të shenjtë natë e ditë me agjërime dhe përgjërime». Falë kësaj, pati privilegjin të shihte foshnjën Jezu. (Luka 2:36-38) Në moshën 84-vjeçare, Ana nuk ishte tepër e moshuar për t’i shërbyer Jehovait, dhe as adashet e saj sot.
A keni të afërm që dëshirojnë të dëgjojnë mesazhin e Biblës? Ose, a keni takuar një të moshuar që është i interesuar dhe dëshiron t’ju dëgjojë kur e vizitoni në shtëpinë e tij? Këta mund të bëhen si Anat në këtë përvojë, sepse kurrë nuk është tepër vonë të fillosh t’i shërbesh Perëndisë së vërtetë, Jehovait.
[Diçitura në faqen 25]
«Jehovai është treguar shumë i mirë me mua»
[Diçitura në faqen 25]
«Para se të vijë parajsa, dua t’i shërbej Jehovait»