Shumë njerëz nuk duan t’ia dinë për Zotin, ngaqë mendojnë se vuajtjet na i shkakton ai.

Në mënyrë direkte ose indirekte, shumë udhëheqës fetarë kanë mësuar se Zoti është shkaktari i vuajtjeve tona. Për shembull, disa thonë:

• Katastrofat natyrore janë ndëshkim nga Zoti.

• Fëmijët vdesin ngaqë Zotit i duhen më shumë engjëj në qiell.

• Zoti mban anë në luftë—një nga arsyet pse kemi kaq shumë vuajtje.

Por, a mund të ndodhë që udhëheqësit fetarë ta kenë keqparaqitur Perëndinë? Po sikur Perëndia t’i ketë hedhur poshtë?

Vuajtjet nuk na i shkakton Perëndia.

Kjo do të binte ndesh me cilësitë e tij që i gjejmë në Bibël. Për shembull:

«Ai gjykon gjithnjë me drejtësi. . . . I drejtë dhe i ndershëm është ai.» —LIGJI I PËRTËRIRË 32:4.

«Është e pamendueshme që Perëndia i vërtetë të veprojë me ligësi, që i Plotfuqishmi të veprojë me padrejtësi!»—JOBI 34:10.

«I Plotfuqishmi nuk e shtrembëron drejtësinë.»—JOBI 34:12.

Perëndia nuk e pranon fenë që e keqparaqet.

Këtu përfshihen fetë që mësojnë se vuajtjet na i shkakton Zoti, si edhe ata që përzien në luftë e dhunë.

«Profetët profetizojnë gënjeshtra në emrin tim [të Zotit]. Nuk i kam dërguar unë, nuk i kam urdhëruar dhe as kam folur me ta. Profetizojnë një vegim të gënjeshtërt . . . dhe mashtrimin e zemrës së tyre.»—JEREMIA 14:14.

Jezui e dënoi hipokrizinë fetare.

«Jo kushdo që më thotë: ‘Zotëri, Zotëri’ do të hyjë në Mbretërinë e qiejve, por do të hyjë vetëm ai që bën vullnetin e Atit tim që është në qiej. Shumë do të më thonë atë ditë: ‘Zotëri, Zotëri, a nuk profetizuam ne në emrin tënd, a nuk dëbuam demonë në emrin tënd dhe a nuk kryem shumë vepra të fuqishme në emrin tënd?’ E megjithatë unë do t’u them: ‘Kurrë nuk ju kam njohur. Largohuni nga unë, ju që bëni vepra të paligjshme!’»—MATEU 7:21-23.