Në korrik dhe në gusht të këtij viti, për herë të parë në histori, vëllezërit anekënd botës do të shohin të njëjtin program kongresi në të njëjtën periudhë. Për këtë, programi i regjistruar duhej përkthyer në mbi 500 gjuhë. Normalisht, do të duhej minimumi një vit për të organizuar e realizuar punën për një projekt të tillë. Por, për shkak të rrethanave si pasojë e pandemisë së koronavirusit, përkthyesit e Kongresit Rajonal 2020 «Gëzoni përherë»! kishin më pak se katër muaj për ta përfunduar punën.

 Për këtë projekt kolosal ndihmuan edhe dy reparte nga selia botërore e Dëshmitarëve të Jehovait: Reparti për Mbështetjen e Përkthimit dhe Reparti Global i Blerjeve. Reparti për Mbështetjen e Përkthimit kuptoi se shumë prej skuadrave të përkthimit u duheshin më tepër pajisje për të kryer punën, sidomos mikrofona cilësorë. Reparti Global i Blerjeve mori masa dhe bleu 1.000 mikrofona të cilët i shpërndau në thuajse 200 vende.

 Për të kursyer, mikrofonat i blenë me shumicë, i dërguan në disa pika dhe nga aty i paketuan sërish për t’ua çuar përkthyesve përreth botës. Falë kësaj, kostoja e një mikrofoni shkoi mesatarisht 170 dollarë amerikanë, pra 20 për qind më lirë se po të bliheshin me pakicë.

 Reparti Global i Blerjeve duhet t’i bënte blerjet dhe dërgesat gjatë muajve prill dhe maj 2020—periudhë kur, për shkak të pandemisë, shumë biznese e kishin kufizuar aktivitetin. Prapëseprapë, në fund të majit, shumica e zyrave rajonale të përkthimit, e zyrave të degëve dhe e vendeve të tjera ku punohet për përkthimin, i kishin pajisjet e nevojshme.

 Xhei Suini, i cili mbikëqyr Repartin Global të Blerjeve, tha: «Bashkëpunimi mes reparteve të Bethelit dhe kompanive të jashtme ishte fantastik gjatë gjithë projektit. Vetëm falë frymës së Jehovait arritëm të plotësonim kaq shpejt dhe me një kosto kaq të mirë nevojat që lindën.»

 Nikolas Ahladis, që punon me Repartin për Mbështetjen e Përkthimit, tha: «Përkthyesit që ishin të izoluar në atë kohë, u inkurajuan jashtë mase kur morën pajisjet. Megjithëse nuk takoheshin dot si skuadër, mund të bashkëpunonin më së miri për të përkthyer e për të regjistruar fjalimet, dramat dhe këngët në më tepër se 500 gjuhë.»

 Ky ishte një nga projektet e shumta që u realizua për t’u vënë në dispozicion motrave e vëllezërve nga e gjithë bota Kongresin Rajonal 2020 «Gëzoni përherë»! Kontributet tuaja bujare nëpërmjet donate.pr418.com dhe formave të tjera mundësuan blerjen e këtyre pajisjeve të nevojshme.