Më 24 shkurt 2022 Rusia nisi një sulm ushtarak kundër Ukrainës, duke shkaktuar një krizë të rëndë humanitare teksa qindra mijë civilë ikën për t’i shpëtuar konfliktit. a

 «Dëgjonim ngado bombardime dhe shpërthime. Nuk gjej fjalë ta përshkruaj tmerrin që përjetuam. Kur dëgjuam se do të kishte trena evakuimi, vendosëm të largoheshim. Supozohej që mundin e një jete të tërë ta paketonim brenda një çante shpine. Arritëm të merrnim vetëm dokumente, ilaçe, ujë dhe diçka të vogël për të ngrënë në çantën që mbanim secili. Lamë pas gjithçka tjetër dhe vajtëm te stacioni i trenit, ndërsa bombardimet s’kishin të reshtur.»—Natalia nga Harkovi, Ukrainë.

 «Deri në momentin e fundit nuk e besonim se do të kishte luftë. Dëgjova shpërthime nga disa pjesë të qytetit dhe dritaret po dridheshin. Vendosa të ikja duke marrë vetëm gjërat më të domosdoshme. Dola nga shtëpia në 8.00 të mëngjesit, mora trenin për në Lvov, pastaj autobusin për në Poloni.»—Nadja nga Harkovi, Ukrainë.

Në këtë artikull

•  Cilat janë shkaqet e vërteta të kësaj krize refugjatësh?

•  Ku mund të gjejnë shpresë refugjatët?

•  A mund t’i ndihmojë Bibla refugjatët sot?

 Cilat janë shkaqet e vërteta të kësaj krize refugjatësh?

 Kriza e refugjatëve në Ukrainë nisi për shkak të sulmit ushtarak të Rusisë. Megjithatë, Bibla shpjegon çfarë qëndron në rrënjë të të gjitha krizave të refugjatëve:

•   Qeveritë njerëzore në mbarë botën e kanë lënë në baltë dhe e kanë zhgënjyer familjen njerëzore. Shpesh ata që janë në pushtet e përdorin autoritetin si mjet për t’i shtypur të tjerët.—Eklisiastiu 4:1; 8:9.

•   Satana Djalli, «sundimtari i kësaj bote», ushtron një ndikim aq të lig mbi njerëzit, sa Bibla thotë: «E gjithë bota dergjet nën pushtetin e të Ligut.»—Gjoni 14:30; 1 Gjonit 5:19.

•   Përveç problemeve që kanë pllakosur prej shekujsh njerëzimin, tani po jetojmë në një periudhë që Bibla e kishte parathënë me këto fjalë: «Në ditët e fundit do të ketë kohë kritike, të vështira për t’u përballuar.» (2 Timoteut 3:1) Jo vetëm kaq, por këto ditë do të karakterizoheshin nga luftëra, katastrofa natyrore, mungesa ushqimi dhe murtaja—situata që i detyrojnë njerëzit të largohen.—Luka 21:10, 11.

 Ku mund të gjejnë shpresë refugjatët?

 Bibla tregon se Krijuesi ynë, Jehovai, b është një Perëndi që ndien dashuri e dhembshuri për refugjatët dhe për njerëzit që shpërngulen nga shtëpitë e tyre. (Ligji i përtërirë 10:18) Ai premton të zgjidhë problemet e refugjatëve me anë të qeverisë së tij qiellore, që quhet Mbretëria e Perëndisë, e cila do të zëvendësojë qeveritë njerëzore. (Danieli 2:44; Mateu 6:10) Me anë të kësaj Mbretërie, Jehovai do të zhdukë Satana Djallin. (Romakëve 16:20) Kjo Mbretëri do të jetë një qeveri globale që do t’u japë fund përçarjeve që shkaktojnë kufijtë kombëtarë. I gjithë njerëzimi do të jetë një familje e bashkuar mbarëbotërore. Askush nuk do të detyrohet të largohet më kurrë nga shtëpia, sepse Bibla premton: «Secili do të ulet nën hardhinë e vet dhe nën fikun e vet, dhe askush nuk do t’i trembë, sepse vetë Jehovai i ushtrive ka folur.»—Mikea 4:4.

 Vetëm Mbretëria e Perëndisë mund të zgjidhë një herë e mirë krizat e refugjatëve që shohim sot. Me anë të Mbretërisë së tij, Jehovai do të eliminojë problemet që i detyrojnë njerëzit të bëhen refugjatë. Shqyrto disa shembuj:

•   Lufta. «Luftërat . . . [Jehovai] i shuan.» (Psalmi 46:9) Për të kuptuar si do t’u japë fund konflikteve Zoti, lexo artikullin «Paqja në tokë—Si do të vijë?»

•   Shtypja dhe dhuna. «[Jehovai] do t’i çlirojë nga shtypja dhe dhuna.» (Psalmi 72:14) Që të mësosh si mund t’i ndryshojnë njerëzit qëndrimet e këqija të rrënjosura thellë, lexo serinë e artikujve me titull «Fundi i rrethit vicioz të urrejtjes».

•   Varfëria. «[Jehovai] do ta çlirojë të varfrin që thërret për ndihmë.» (Psalmi 72:12) Që të shohësh si do t’i zhdukë Perëndia shkaqet e varfërisë, lexo artikullin «A mund të shpresojmë për një sistem ekonomik të drejtë?»

•   Mungesa e ushqimeve. «Në tokë do të ketë drithë me bollëk.» (Psalmi 72:16) Për të zbuluar çfarë masash do të marrë Zoti që askush të mos vuajë nga uria, lexo artikullin «A do të ketë një botë pa uri?»

 A mund t’i ndihmojë Bibla refugjatët sot?

 Po. Bibla jo vetëm u jep refugjatëve një shpresë të sigurt për të ardhmen, por edhe i ndihmon që tani të përballojnë sfidat që hasin.

 Parim nga Bibla: «Mos jini në ankth për asgjë, por për çdo gjë, bëjani të njohura Perëndisë kërkesat tuaja me lutje, përgjërime dhe falënderime. Kështu paqja e Perëndisë, që tejkalon çdo mendim, do të ruajë zemrën dhe mendjen tuaj.»—Filipianëve 4:6, 7.

 Kuptimi: Lutju Perëndisë të të japë paqe mendore dhe shpirtërore përballë çfarëdolloj situate. Shih artikullin «Filipianëve 4:6, 7—‘Mos u shqetësoni për asgjë.’»