Gjatë 30 viteve të fundit, shumë njerëz kanë menduar se marrëdhëniet mes shteteve të ndryshme nëpër botë ishin të qëndrueshme, e madje drejt përmirësimit. Mirëpo, ngjarjet e kohëve të fundit ua kanë vënë në pikëpyetje këtë mendim.

•   «Shkëmbimet e zjarrit mes Izraelit dhe Hezbollahut përgjatë kufirit të Libanit, ngrenë alarmin për përhapjen e luftës së Gazës në rajon.»—Reuters, 6 janar 2024.

•   «Sot Irani, me grupet e mbështetura prej tij që po sulmojnë nga shumë pika strategjike dhe me riaktivizimin e befasishëm të programit të armëve bërthamore, është një kërcënim i ri për Perëndimin—kësaj here edhe me përkrahjen e Rusisë dhe të Kinës.»—The New York Times, 7 janar 2024.

•   «Sulmet e Rusisë vazhdojnë të shkaktojnë kaos e dëme të mëdha në mbarë Ukrainën.»—UN News, 11 janar 2024.

•   «Rritja e pushtetit ekonomik e ushtarak të Kinës, dëshira gjithnjë e më e madhe e Tajvanit për identitet kombëtar dhe marrëdhëniet e tensionuara mes Pekinit dhe Uashingtonit, plotësojnë kushtet për një konflikt të mundshëm.»—The Japan Times, 9 janar 2024.

 A thotë gjë Bibla për gjendjen e paqëndrueshme që shohim sot në botë? A do të shkaktojë luftë botërore kjo gjendje e tensionuar?

 Bibla nuk kishte parathënë ndonjë luftë specifike për kohën tonë. Gjithsesi, ajo kishte parathënë se luftërat do të karakterizonin periudhën ku jetojmë dhe ‘do të hiqnin paqen nga toka’.—Zbulesa 6:4.

 Libri i Danielit kishte parathënë se «në kohën e fundit», fuqitë botërore konkurruese ‘do të shtynin’ njëra-tjetrën, pra do të luftonin për pushtet. Në këtë luftë do të ekspozonin fuqinë e tyre të madhe ushtarake dhe do të shpenzonin «thesaret» ose shuma marramendëse parash.—Danieli 11:40, 42, 43.

 Bibla tregon se situata botërore do të përkeqësohet para se të përmirësohet. Jezui paratha: «Do të ketë një shtrëngim aq të madh, sa nuk ka pasur që nga fillimi i botës e deri tani.» (Mateu 24:21) Ky ‘shtrëngim i madh’ do të arrijë kulmin në luftën që quhet Armagedon, e cila përshkruhet si ‘lufta e ditës së madhe të Perëndisë së Plotfuqishëm’.—Zbulesa 16:14, 16.

 Megjithatë, Armagedoni do ta shpëtojë njerëzimin, nuk do ta shkatërrojë. Me anë të kësaj lufte, Perëndia do t’i japë fund sundimit njerëzor, i cili ka shkaktuar tërë këto luftëra të tmerrshme. Për të kuptuar si do të sjellë paqe të qëndrueshme Armagedoni, lexo artikujt e mëposhtëm:

•   «Çfarë është beteja e Armagedonit?»

•   «Armagedoni është lajm i mirë!»