Qeveria e Ruandës ndërmori një hap për të eliminuar diskriminimin fetar në shkolla, duke nxjerrë një urdhër që kërkon të respektohen bindjet fetare të nxënësve. Ky është një lajm i bukur për nxënësit që nuk ua lejon ndërgjegjja të marrin pjesë në disa aktivitete shkollore.

Në Ruandë shumica e shkollave mbështeten financiarisht nga shteti, por administrohen nga organizata fetare. Regjistrimi në këto shkolla është i hapur për të gjithë, ndaj nxënësit kanë fe të ndryshme. Gjithsesi, disa autoritete të shkollave i kanë detyruar të marrin pjesë në veprimtari fetare a patriotike ose u kanë kërkuar të paguajnë taksat e kishës. Ata kanë ndëshkuar këdo që nuk u është bindur këtyre rregullave për shkak të bindjeve fetare. Një ministër që merret me shkollat 9-vjeçare dhe të mesme shprehu me këto fjalë qëndrimin që kanë disa administratorë shkollash: «Nxënësit nuk lejohen të adhurojnë Zotin në një mënyrë që bie ndesh me bindjet tona.»

Autoritetet qeveritare ndërhynë që të zgjidhnin problemin me një urdhër ekzekutiv që përmbante rregulla të reja të cilat synonin të zhduknin diskriminimin fetar në shkolla. Neni 12 i Urdhrit qeveritar nr. 290/03, i botuar më 14 dhjetor 2015 në Official Gazette, pohon se çdo shkollë duhet të respektojë lirinë e adhurimit të nxënësve dhe t’i lejojë të luten sipas besimit të vet, nëse feja ose kisha e tyre është e pranuar ligjërisht dhe nëse nuk pengohet programi mësimor.

Veprimi i qeverisë përforcon vendimin e Gjykatës së Ndërmjetme në Karongi për disa nxënës Dëshmitarë që u përjashtuan nga shkolla në maj 2014. Autoritetet në shkolla nuk kishin respektuar të drejtën e nxënësve për të mos marrë pjesë në një shërbesë fetare të sponsorizuar nga shkolla. Gjykata i shfajësoi nxënësit nga çdo akuzë duke u dhënë mundësi të riktheheshin në shkollë.

Në një rast tjetër drejtori i një shkolle në krahinën e Ngororeros nuk u jepte dëftesat 30 nxënësve që nuk paguanin taksën e kishës (e cila nuk ishte pjesë e taksës shkollore). Kur prindërit e tyre u ankuan te drejtori rajonal i arsimit, më në fund drejtori i shkollës u dorëzua dhe u dha të gjithë nxënësve dëftesat në fund të vitit shkollor.

Shantala Uimbabazin, një Dëshmitare, e përjashtuan nga një shkollë në Ngororero, sepse nuk merrte pjesë në meshën katolike të sponsorizuar nga shkolla. Asaj iu desh të duronte talljet e shokëve të klasës e të të tjerëve, dhe humbi vitin shkollor. U regjistrua në një shkollë tjetër më larg shtëpisë dhe me pagesë më të lartë, të cilën e ëma vejushë mezi e përballonte për shkak të të ardhurave të pakta. Shantala u lehtësua kur mori vesh për rregullat e reja. Ajo tha: «Mendoj se nxënësit e tjerë në të njëjtat rrethana në shkollat fetare do të mund të arsimohen pa iu shkelur të drejtat.»

Rregullorja e re është në përputhje me Kushtetutën e Ruandës, e cila garanton lirinë e fesë dhe të drejtën e arsimimit. Nxënësit Dëshmitarë të Jehovait dhe prindërit e tyre mezi presin të marrin fund këto incidente të diskriminimit fetar. Ata i janë mirënjohës qeverisë që ka vepruar për të mbrojtur lirinë fetare të nxënësve.