Më 26 gusht 2023, vëllai Geixh Fligëll, anëtar i Trupit Udhëheqës, mbajti fjalimin e kushtimit për kompleksin e Sallës së Asambleve në Turrda, Rumani, dhe për 3 godina te reja në zyrën e degës në Bukuresht, Rumani. Për programin e kushtimit ishin 1.702 veta të pranishëm në Sallën e Asambleve dhe 14.101 të tjerë e ndoqën programin nëpërmjet videokonferencës.

Gjatë programit të kushtimit, auditori dëgjoi rreth historisë së veprës teokratike të ndërtimit në Rumani dhe se si Jehovai i ka bekuar këto përpjekje. Gjithashtu u intervistuan vëllezër e motra që kanë shërbyer në skuadra të ndryshme ndërtimi. Pas programit, motra Jaela Dragiç, që ndihmoi me ndërtimin e Sallës së Asambleve në Turrda, tha: «Jam shumë e lumtur që këto godina i janë kushtuar Jehovait me qëllimin për t’i dhënë lavdi atij.» Vëllai Brus Dajër, një vullnetar ndërkombëtar ndërtimi që punoi për zgjerimin e degës, shtoi: «Jemi jashtëzakonisht mirënjohës që patëm privilegjin të merrnim pjesë në këtë projekt. E falënderojmë shumë Jehovain për mirësinë e tij të pamerituar.»

Në godinat e reja të degës ka një klasë që aktualisht përdoret për Shkollën për Ungjillëzuesit e Mbretërisë dhe rezidenca për familjen Bethel. Gjithashtu, aty ndodhen edhe zyrat e përkthimit, një Sallë Mbretërie dhe recepsioni i degës. Salla e Asambleve që sapo është kushtuar ka një kapacitet prej 1.200 vendesh brenda dhe 1.350 vendesh jashtë. Këtë Sallë e përdorin rreth 15.000 vëllezër e motra nga vende të ndryshme të Rumanisë.

Programi i kushtimit vazhdoi të nesërmen, më 27 gusht, në një stadium në qytetin e Kluzhit, dhe 23.968 veta ishin të pranishëm. Programi u përkthye në gjuhët angleze, hungareze, rome (të Rumanisë), rumune të shenjave, ruse, ruse të shenjave dhe ukrainase. Ai u transmetua për të gjitha kongregacionet në Rumani e në Ukrainë. Programin e ndoqën gjithsej 121.411 veta.

Gëzojmë bashkë me vëllezërit e motrat tanë në Rumani që tani këto ndërtesa i janë kushtuar Jehovait dhe mund të vazhdojnë të përkrahin adhurimin e pastër.—Isaia 2:3.