Në Brazil ka gati 1.500 qytete pa kongregacione. Disa nga këto qytete ndodhen në zona të largëta dhe shumë nga banorët e tyre nuk i kanë takuar ndonjëherë Dëshmitarët e Jehovait. Prandaj, dega e Brazilit kishte menduar të organizonte një fushatë speciale për t’i vizituar këto qytete në periudhën shtator-dhjetor 2020. Për shkak të kufizimeve të COVID-19, fushata u bë me anë të letrave. Në të morën pjesë lajmëtarë nga 3.000 kongregacione.

Lajmëtarët bënë kërkime në internet për qytetin që u ishte caktuar dhe i përshtatën letrat sipas nevojave të banorëve. Për shembull, një pioniere shkroi letra për ata që banonin në një qytet të shtetit të Tokantinsit. Motra mori vesh se kohët e fundit ai rajon ishte prekur nga zjarret. Prandaj, ndër të tjera shkroi edhe fjalë nga Zbulesa 21:5 dhe shpjegoi se në të ardhmen Jehovai ‘do të bëjë çdo gjë të re’ e do të zgjidhë problemet e mjedisit. Pas ca ditësh një grua i dërgoi motrës një mesazh zanor. Ajo thoshte se ishte kënaqur jashtë mase kur kishte lexuar se Perëndia «do të bënte ndryshime pozitive», ndaj donte të dinte më shumë.

Mesazhi që mori një motër nga një grua, dëshmon sa e efektshme ishte fushata. Ajo shprehej: «Nuk gjej dot fjalët që të përshkruaj si të ka drejtuar Perëndia që të arrije deri tek unë. . . . Shumë faleminderit! Ti më bëre të besoj sërish se Zoti më do dhe se po kujdeset për mua dhe për familjen time. Ndihem e përkëdhelur. Edhe pse nuk të njoh, ti je përgjigjja e lutjeve të mia! Të falënderoj me gjithë zemër!»

Një plak që shërben në kongregacionin Itamarati në Petrópolis, Rio-de-Zhanejro, komentoi se si u ndien vëllezërit e motrat që morën pjesë në fushatë: «U ndiem si pionierët specialë që shkojnë në territore të largëta. Normalisht, shumë vëllezër nuk e kanë këtë mundësi, për shkak të rrethanave dhe të përgjegjësive familjare.»

S’ka dyshim që Jehovai e ka bekuar këtë fushatë. Për ne është privilegj të japim një dorë, që lajmi i mirë ‘t’u predikohet të gjitha krijesave nën qiell’.—Kolosianëve 1:23.