Në janar 2023 u mbushën plot 50 vjet që kur nisëm punën në godinat e degës në Normandi, Francë. Kushtimi i godinave u bë rreth 6 muaj më vonë, më 9 qershor 1973.

Para se të ndërtoheshin godinat në Normandi, Betheli i Francës ndodhej në Bulonj-Bilankur, pranë Parisit, dhe e gjithë puna organizohej aty. Megjithatë numri i lajmëtarëve të Mbretërisë në vend po rritej vazhdimisht, ndaj këto godina nuk i përmbushnin më të gjitha nevojat. Për më tepër, botimet shtypeshin në Shtetet e Bashkuara dhe dërgoheshin në Francë nëpërmjet qytetit-port të Havërit, që ndodhej rreth 200 kilometra larg nga dega. Ja pse për të shkurtuar distancat, si dhe për të kursyer kohë e pará, vëllezërit nisën të kërkonin një pronë midis këtyre 2 qyteteve ku të ndërtonin godina shtesë për Bethelin.

Përfundimisht, ata gjetën dhe blenë një tokë të përshtatshme në Luvje, një qytezë e Normandisë, rreth 100 kilometra larg nga Parisi dhe Havëri. Ndërtimi filloi në vitin 1972 dhe zgjati 8 muaj.

Në vitet që pasuan numri i lajmëtarëve të Mbretërisë vazhdoi të rritej, ndaj sërish lindi nevoja që në pronën në Normandi të ndërtoheshin më tepër godina. Kështu u ble një tokë aty pranë, u ndërtuan godina rezidenciale shtesë dhe, në vitin 1996, të gjithë bethelitët që po shërbenin ende në Bulonj-Bilankur u transferuan në Normandi.

Sot ka mbi 162.000 lajmëtarë të Mbretërisë që predikojnë lajmin e mirë në 13 shtetet për të cilat kujdeset dega e Francës. Megjithëse që prej vitit 1998 në këtë degë nuk shtypen më botime, godinat janë riprojektuar për të mbështetur aspekte të tjera të veprës së mësimdhënies dhe të predikimit për Mbretërinë. Këtu përfshihet përkthimi i materialeve të bazuara në Bibël në 24 gjuhë. Gjithashtu dega merret edhe me prodhimin e videove. Aktualisht në degë punojnë mbi 400 vëllezër e motra.

Na mbushet zemra plot tek shohim si po e ‘përshpejton’ Jehovai veprën e predikimit në Francë!—Isaia 60:22.