Nga 26 shtatori i 2018-s deri më 6 janar të 2019-s, Qendra Dokumentuese e Munihut për Historinë e Nacional-Socializmit hapi një ekspozitë speciale, e cila shpjegoi persekutimin që hoqën Dëshmitarët e Jehovait prej nazistëve. Kjo qendër ndodhet në të njëjtin vend ku ishte selia e Partisë Naziste.

Gjatë ceremonisë, në fjalimin e tij hapës, dr Hanz-Georg Kypers, një nga zyrtarët e qytetit të Munihut, shpjegoi arsyen pse u hap ekspozita: «Kjo ekspozitë është me rëndësi, sepse për një kohë të gjatë njerëzit kanë menduar se Dëshmitarët e Jehovait nuk janë persekutuar nga regjimi nazist. . . . Qëllimi i saj është që publiku i gjerë të mësojë të vërtetën rreth Dëshmitarëve që ishin viktima të atij regjimi.»

Tregimi historik i përndjekjeve që vëllezërit dhe motrat në Munih kaluan gjatë regjimit nazist, u ekspozua në 60 panele me dokumentime të guximit, besnikërisë dhe mbijetesës. Në një nga panelet, tregohej historia e Martin dhe Gertrud Pucingerit, të cilët u arrestuan dhe u çuan në kampe të ndryshme përqendrimi vetëm pak muaj pas martesës. Ata nuk e panë njëri-tjetrin për 9 vjet. Por të dy mbijetuan, dhe më vonë vëlla Pucingeri shërbeu si anëtar i Trupit Udhëheqës i Dëshmitarëve të Jehovait.

Një panel tjetër paraqiste përvojën e Tereza Kynerit që u bë Dëshmitare e Jehovait në 1929-n (atëherë njiheshin si Studentët Ndërkombëtarë të Biblës). Kur Gjermania i ndaloi Dëshmitarët, në shtëpinë e saj mbaheshin mbledhje fetare sekrete dhe ajo shtypte fshehurazi botime me anë të një shaptilografi të lëvizshëm. Pasi nazistët e zbuluan, e arrestuan dhe e akuzuan «për botim dhe shpërndarje të literaturës antiqeveritare dhe për demoralizim të ushtrisë». Besnikëria e motër Kynerit nuk u dobësua kurrë, edhe përballë vdekjes. Ajo u ekzekutua më 6 tetor 1944.

Panele të tjera theksonin qëndrimin asnjanës të vëllezërve, të cilët refuzonin të bënin përshëndetjen hitleriane, veprim që i bëri shënjestër të veçantë të urrejtjes ekstreme të regjimit nazist.

Më 1934, Hitleri u betua se do t’i asgjësonte Dëshmitarët e Jehovait duke deklaruar: «Këtë farë të keqe kemi për ta shfarosur nga Gjermania!» Dëshmitarët duruan përndjekje mizore ndërkohë që Hitleri përpiqej të vinte në zbatim planin e tij të lig. Ai dhe regjimi i tij nuk ekzistojnë më, por në Gjermani ka 165 mijë Dëshmitarë. I jemi mirënjohës Jehovait sepse, kur kalojmë vështirësi, na jep shpresën që «nuk çon në zhgënjim».—Romakëve 5:3-5.