BUDAPEST, Hungari—Qendra Përkujtimore e Holokaustit në Budapest përuroi një pllakë përkujtimore në nder të katër Dëshmitarëve të Jehovait që i bënë ballë përndjekjes gjatë epokës naziste. Ceremonia e përurimit u mbajt më 11 dhjetor 2015.

Katër djemtë, Lajos Deli, Antal Hönisch, Bertalan Szabó dhe János Zsondor, u ekzekutuan publikisht nga partia naziste hungareze (Arrow Cross) në qytetet hungareze të Kormendit dhe të Sharvarit në mars të 1945-s, sepse refuzuan shërbimin ushtarak gjatë Luftës II Botërore. Pllaka përkujtimore mban emrat e tyre dhe vargun biblik të Veprave 5:29: «Ne duhet t’i bindemi Perëndisë si sundimtar, dhe jo njerëzve.»

Dr. Csaba Latorcai, zëvendëssekretar i shtetit për çështjet e rëndësishme sociale, tha në fjalimin e hapjes: «Pllaka përkujton katër djem Dëshmitarë të Jehovait. . . . Si Dëshmitarë të Jehovait, iu bindën urdhrit ‘mos vrit’ dhe dëgjuan ndërgjegjen që të mos ngrinin armët kundër bashkëbesimtarëve dhe të tjerëve.»

Një orator tjetër në ceremoninë e përurimit, dr. Szabolcs Szita, drejtor i Qendrës Përkujtimore të Holokaustit, tha: «Përurimi i pllakës përkujtimore është një fitore, sepse për dekada Dëshmitarët e Jehovait kanë qenë një grup i lënë në harresë ndër ata që vuajtën nën regjimin nazist. Katër djemtë që u ekzekutuan kishin një besim aq të fortë, sa e ruajtën integritetin edhe përballë vdekjes. Që të gjithë janë shembuj të mirë për ne edhe sot e kësaj dite.»

Zëdhënësit për mediat:

Ndërkombëtar: David A. Semonian, Zyra e Informacionit Publik, tel. +1 718 560 5000

Hungari: András Simon, tel. +36 1 401 1118