27 QERSHOR 2019
ITALI

Dy konferenca të rëndësishme mjekësore në Itali: mjekët interesohen për kirurgjinë pa gjak

LUAJ

Dëshmitarë ofrojnë informacione rreth strategjive alternative të transfuzionit në Konferencën e Përbashkët të Shkencëtarëve për Kirurgjinë, në Romë

Shumë mjekë kanë shprehur vlerësim për rrjetin ndërkombëtar që ka krijuar organizata jonë për të siguruar informacione rreth strategjive mjekësore dhe kirurgjike që shmangin transfuzionet e gjakut. Shërbimi i Informacioneve Shëndetësore, që ndodhet në zyrën e degës të Dëshmitarëve të Jehovait në Romë, Itali, është pjesë e këtij rrjeti mbarëbotëror. Nga 10 deri 13 tetori 2018, në Palermo, Sicili, u organizua Konferenca Kombëtare e Shoqatës Italiane të Anestezisë, Analgjezisë, Reanimacionit dhe Terapisë Intensive (SIAARTI). Aty morën pjesë edhe përfaqësues nga Shërbimi i Informacioneve Shëndetësore dhe nga Komiteti i Lidhjes me Spitalet (Itali) të cilët ngritën një kënd informativ. Menjëherë pas këtij evenimenti, Dëshmitarët vepruan po njësoj edhe në Konferencën e Përbashkët të Shkencëtarëve për Kirurgjinë, që u mbajt në Qendrën e Kongreseve «La Nuvola», në Romë.

Falë këtyre konferencave u sigurojmë informacione të përditësuara për mjekësinë pa gjak shumë specialistëve në këtë fushë. Konferencën në Palermo e ndoqën 2.800 anestezistë. Në konferencën në Romë, më e madhja e mbajtur deri më sot në Itali, morën pjesë 3.500 kirurgë. Aty ishin të pranishëm edhe përfaqësues nga mjaft institucione të respektuara mjekësore. Mes tyre edhe anëtarë nga të gjitha shoqatat italiane të kirurgëve dhe nga filiali italian i Kolegjit Amerikan të Kirurgëve. Ky eveniment pati mbështetjen e disa institucioneve shtetërore të tilla, si Ministria e Shëndetësisë.

Anestezisti Vinçenco Skuderi, nga Poliklinika e Katanjës, në Sicili, vizitoi këndin tonë në konferencën e Palermos. Më 18 janar 2019, ai kreu ndërhyrje urgjente te një paciente Dëshmitare me çarje të aortës. E kreu me sukses këtë operacion mjaft të ndërlikuar pa përdorur gjak. Dr. Skuderi shpjegon: «[Këndi juaj informativ] në konferencën e SIAARTI-it 2018 ishte tepër i dobishëm. Më hynë shumë në punë dokumentet që siguruat.»

Momentalisht, në Itali janë mbi 5.000 mjekë që kanë pranuar të kurojnë pacientët Dëshmitarë të Jehovait me teknika mjekësore dhe kirurgjikale të sigurta e të efektshme që nuk kërkojnë përdorimin e transfuzioneve të gjakut. Çdo vit në Itali trajtohen pa gjak mesatarisht 16.000 pacientë Dëshmitarë.

Pas konferencave, anestezistët dhe kirurgët folën për eksperiencat e tyre me pacientët Dëshmitarë të Jehovait.

«Kam vite që trajtoj pacientë Dëshmitarë të Jehovait. Grupi i Studimit për Bioetikën i SIAARTI-t ka një Grup Pune që dokumenton të gjitha rastet e refuzimit të transfuzionit të gjakut. Vitet e fundit ky grup ka siguruar udhëzime për anestezistët, që të ndjekin një procedurë standarde për rastet e ndërlikuara nga pikëpamja e kirurgjisë ose anestezisë. Kështu të gjithë mjekët mund të gjejnë mënyrën më të mirë për të trajtuar një rast të caktuar. Ky dokument e tregon qartë se ‘e drejta e pacientit për të vendosur vetë se çfarë trajtimi mjekësor të pranojë është një e drejtë themelore që ia garanton Kushtetuta (nenet 2, 13 dhe 32), Deklarata Universale e të Drejtave të Njeriut, Konventa e Oviedos dhe Karta e të Drejtave Themelore e Bashkimit Evropian’.»—Antonio Korçone, drejtor i qendrës së transplanteve në rajonin e Kampanjës, shef i pavijonit të anestezisë dhe të terapisë intensive në spitalin «Monaldi», ish-president i Shoqatës Italiane të Anestezisë, Analgjezisë, Reanimacionit dhe Terapisë Intensive (SIAARTI)

«Përvojat me Dëshmitarët e Jehovait më motivuan mua dhe gjithë kolegët e mi të përmirësonim teknikat që reduktojnë humbjen e gjakut dhe ndihmojnë pacientët pas operacionit, me qëllim që të pakësonim transfuzionet. Sigurisht, këto përmirësime u kanë sjellë dobi jo vetëm atyre që refuzojnë transfuzionet, por edhe neve, që të shmangim transfuzionin te shumë pacientë që ishin gati ta pranonin.»—Ugo Boxhi, profesor titullar i kirurgjisë së përgjithshme në Universitetin e Pizës (Itali), ndihmësprofesor i kirurgjisë në Universitetin e Pitsburgut (SHBA), president i zgjedhur i Shoqatës Italiane për Transplantin e Organeve (SITO)

«Transplanti i mëlçisë është dy, tre ose katër herë më i ndërlikuar nga të gjithë transplantet e tjera, dhe rreziku për hemorragji është shumë i lartë. Pavarësisht nga kjo, falë dëshmive shkencore nga mijëra raste të transplanteve të mëlçisë në Itali dhe nga dhjetëra mijë raste në mbarë botën, mund të themi se ‘ua kemi marrë dorën’ këtyre ndërhyrjeve. Në fakt, ekzistojnë teknika të provuara që na ndihmojnë të shmangim hemorragjinë dhe transfuzionet e gjakut. Shumicën e ndërhyrjeve në mëlçi, madje edhe transplantet, i bëjmë pa përdorur asnjë pikë gjak. Sot transfuzionet e gjakut në kirurgjinë e mëlçisë janë të rralla, sepse në vend të teknikave që përdoreshin ca vite më parë, tani përdorim mikrokirurgjinë, një lloj kirurgjie shumë precize që monitoron çdo enë gjaku. Dua të falënderoj Dëshmitarët e Jehovait, sepse na ndihmuan t’u kushtonim vëmendje teknikave të ruajtjes së gjakut, që s’e kishim bërë 10 ose 15 vjet më parë.»—Umberto Çilo, profesor titullar i kirurgjisë së përgjithshme dhe shef i pavijonit hepatobiliar dhe i transplantit të mëlçisë në Universitetin e Padovës, president i Shoqatës Italiane për Transplantin e Organeve (SITO)

«I vlerësoj jashtëzakonisht pacientët Dëshmitarë, sepse besimi i patundur te bindjet e tyre, është për t’u admiruar. Dhe kjo është një nga arsyet pse jam përpjekur gjithnjë gjatë viteve t’u përshtatem nevojave të tyre. Për mua meritojnë respektin më të madh. Dëshmitarët e Jehovait nuk duan të vdesin ose të jenë martirë; përkundrazi kërkojnë kujdes mjekësor me cilësi.»—Françesko Korçone, profesor titullar i kirurgjisë në Universitetin e Napolit Federiko II, president i merituar i Shoqatës Italiane të Kirurgjisë (SIC), anëtar i nderuar i Akademisë Kombëtare të Kirurgjisë, Paris, Francë

«Bashkëpunimi me Dëshmitarët e Jehovait më ka bindur edhe më shumë se kemi detyrimin të respektojmë maksimalisht kulturën dhe bindjet fetare të pacientëve. Kohët e fundit, kjo pikëpamje përkrahet fuqimisht në Itali nga Ligji 219 i dhjetorit 2017, që quhet ‘Mundësi për të miratuar një trajtim pasi pacienti të jetë informuar dhe udhëzime paraprake’. Aty thuhet se ‘asnjë trajtim mjekësor s’mund të niset ose të vazhdohet nëse pacienti nuk është informuar dhe nuk është dakord’. Nëse kirurgu komunikon me pacientin qartë, hapur dhe me përgjegjshmëri, patjetër që do të nxjerrin dobi të dyja palët. Falë kësaj, secili do të mbajë përgjegjësinë e vet, do të kenë më shumë liri dhe në fund do të gjendet një zgjidhje më e përshtatshme dhe më e efektshme.»—Luka Ansaloni, shef i kirurgjisë së përgjithshme dhe urgjencës në Spitalin Bufalini të Çezenës, president i Shoqatës Italiane të Fiziopatologjisë Kirurgjike (SIFIPAC)

«Dëshmitarët e Jehovait kanë dhënë një kontribut të çmuar në përmirësimin e trajtimeve dhe të teknikave mjekësore që nuk përdorin transfuzion gjaku. Teknologjia e re kirurgjike luan rol kyç në respektimin e vendimit të pacientëve që nuk pranojnë transfuzion gjaku për arsye fetare. Gjithashtu kirurgjia pa gjak është pa diskutim më e mirë për sa i përket kostos dhe cilësisë.»—Diego Piaca, president i Shoqatës Mjekësore të Katanjës, shef i kirurgjisë onkologjike në Spitalin Garibaldi-Nezima i Katanjës, ish-president i Shoqatës Italiane të Kirurgëve (ACOI)

«Disa mendojnë se transfuzionet e gjakut nuk janë të dëmshme. Gjaku gjendet kollaj, ka çmim relativisht të ulët, është zgjidhja e parë që rekomandojnë mjekët dhe mund të rritë menjëherë nivelin e hemoglobinës. Të gjithë këta faktorë kanë bërë që gjaku të ketë përdorim kaq të gjerë. Mirëpo, nga viti në vit po shtohen provat që dëshmojnë për efektet e dëmshme që mund të vijnë prej transfuzionit të rruazave të kuqe të përqendruara të gjakut ose të komponentëve të tij. Në fakt, studime të ndryshme tregojnë se pacientët që marrin gjak, kanë më shumë komplikacione se ata që nuk marrin. Gjithashtu kanë rrezikshmëri më të lartë të vdesin, të sëmuren ( nga iktusi, dëmtime të veshkës, raste me trombozë në enët e gjakut ose arterie, infeksionet, bllokimi i rrugëve të frymëmarrjes) dhe të qëndrojnë më gjatë në spital. Mendoj se trajtimi i pacientëve Dëshmitarë për më shumë se 50 vitet e fundit i ka ndihmuar mjekët të ndërgjegjësohen më tepër se si të reduktojnë humbjen e gjakut gjatë operacioneve dhe si të bëjnë ndërhyrje pa gjak.»—Xhandomeniko Biankofiore, shef i pavijonit të anestezisë dhe të reanimacionit të transplanteve në Spitalin Universitar të Pizës, ndihmësprofesor i anestezisë dhe i reanimacionit në Universitetin e Pizës

Mund të të pëlqejë edhe . . .

LAJME

Intervistë me Masimo P. Frankin, Profesor në mjekësi

«Në aspektin e karrierës profesionale, u jam mirënjohës Dëshmitarëve të Jehovait. Ata kanë bërë që unë, edhe pse një mjek konvencional, të shqyrtoj mundësinë dhe rëndësinë e pakësimit të përdorimit të gjakut.»

LAJME

Mjekësia pa gjak: Konferencë historike në Universitetin e Padovës

Historikisht, transfuzioni i gjakut është konsideruar i padëmshëm dhe i vetmi trajtim mjekësor jetëshpëtues për pacientë që duhet t’u nënshtrohen procedurave komplekse mjekësore ose kirurgjike. Kjo hipotezë u vu në pikëpyetje nga shumë folës në këtë konferencë.

LAJME

https://cms-imgp.jw-cdn.org/img/p/702019160/univ/art/702019160_univ_sqr_xl.jpg

Dëshmitarët e Jehovait

Dy konferenca të rëndësishme mjekësore në Itali: mjekët interesohen për kirurgjinë pa gjak

Mund të të pëlqejë edhe . . .

Intervistë me Masimo P. Frankin, Profesor në mjekësi

Mjekësia pa gjak: Konferencë historike në Universitetin e Padovës

Pesë mjekë kanadezë flasin për avancimin e trajtimeve mjekësore pa gjak

Pse Dëshmitarët e Jehovait nuk pranojnë transfuzione gjaku?

Dy konferenca të rëndësishme mjekësore në Itali: mjekët interesohen për kirurgjinë pa gjak

Mund të të pëlqejë edhe . . .

Zgjidh gjuhën tënde

Dërgo