TORONTO—Rreth 150 Dëshmitarë të Jehovait morën pjesë në një fushatë speciale arsimimi biblik të organizuar nga zyra e degës së Dëshmitarëve në Kanada në shtator dhe tetor 2014. U morën masa që të vizitoheshin 35 zona të thella anekënd vendit.

Dëshmitarët u organizuan në grupe dhe u caktuan të shkonin në qytete e fshatra që shtrihen nga Aklavik-u, Territoret Veriperëndimore në perëndim deri në Kangiqsualujjuaq, Kuebek, në lindje, një rajon me shtrirje 3.300 kilometra. Ata që shkuan në këtë fushatë në ndihmë të njerëzve, udhëtuan me shpenzimet e tyre, madje në disa raste bileta e avionit kushtoi disa mijëra dollarë për person.

Para fushatës, Trupi Udhëheqës i Dëshmitarëve të Jehovait miratoi përkthimin e videos Pse ta studiosh Biblën? në gjuhën inuktitute. Këtë gjuhë inuite e flasin rreth 35.000 njerëz në Kanada dhe njihet si gjuhë zyrtare në Nunavut e në Territoret Veriperëndimore.

Znj. Velma Illasiak, drejtoreshë shkolle në Aklavik, u shpreh kështu për vizitën e Dëshmitarëve: «Nxënësve u pëlqyen shumë materialet që u treguat dhe i kujtojnë ende. . . . Po mendojmë të porositim dy vëllimet e librit Të rinjtë pyesin—Përgjigje praktike për çdo adoleshent në shkollë. . . . Ju falënderojmë për vizitën në shkollën dhe në zonën tonë!»

Pasi foli me Dëshmitarët dhe pa videon Pse ta studiosh Biblën?, z. Piter Iyaituk, kryetari i bashkisë së qytetit verior Ivujivik në Kuebek i shëtiti vizitorët për dy orë me makinën e tij. Ai i çoi edhe në aeroport ditën kur duhej të largoheshin e i falënderoi që shkuan atje.

Matthieu Rozon, zëdhënës i Dëshmitarëve të Jehovait në Kanada, thotë: «Dëshmitarët e Jehovait janë të lumtur t’u ofrojnë arsimim biblik falas të gjithë njerëzve. Ata që morën pjesë në këtë fushatë besojnë se ia vlejti mundi dhe koha.»

Gjatë asaj ekspedite dymujore, Dëshmitarët shpërndanë mbi 37.000 botime. Thuajse 600 veta kërkuan që Dëshmitarët të shkonin prapë për të vazhduar bisedat biblike.