Nga 11 maji deri më 10 nëntor 2018, Dëshmitarët e Jehovait në Kazakistan organizuan pritje për publikun në 7 qytete të vendit. Këto raste u dhanë mundësi zyrtarëve të qeverisë, gazetarëve, pedagogëve dhe publikut të mësojnë për Dëshmitarët e Jehovait. Ishin të pranishëm më shumë se 1.500 veta.

Këto pritje për publikun u mbajtën në Sallat e Mbretërisë në qytetin e Karagandit, të Kustanajit, të Shimkentit, të Taldikorganit, të Oskemenit, të Semejit dhe të Tarazit. Pjesëmarrësit panë stendat që shpjegonin historinë e veprimtarive tona në Kazakistan, që filloi aty nga viti 1892. Gjithashtu, stendat nxirrnin në pah arritjet e kohëve të fundit, si botimi i Shkrimeve të Shenjta—Përkthimi Bota e Re në gjuhën kazake më 2014.

Vëlla Bekzat Smagulovi, që punon për Repartin Ligjor dhe për Zyrën e Informacionit për Publikun në degën e Kazakistanit, komenton për dobitë e këtij organizimi: «Njerëzve u pëlqeu shumë ajo që panë dhe i ndihmoi të na njihnin më mirë. Midis vizitorëve kishte zyrtarë nga Departamenti i Çështjeve Fetare dhe gazetarë nga Kazakhstan-Öskemen dhe nga gazetat Rudnyi Altai e Semei Vesti.»

Në pritjen për publikun në Taldikorgan, qendër administrative e rajonit të Alma-Atës, vëllezërit mirëpritën drejtorin e Departamentit të Çështjeve Fetare dhe 2 zyrtarë të këtij departamenti. Mori pjesë edhe kryeredaktori i gazetës Zhetysu Dialog, i cili më vonë publikoi një artikull të bazuar në intervistat me disa vullnetarë që punuan për këtë event.

Përveç kësaj, vëllezërit dhe motrat shpërndanë më shumë se 560 Bibla Përkthimi Bota e Re në gjuhët kazake dhe ruse, gjuhët kryesore të vendit. Jemi shumë të kënaqur me impaktin e këtij organizimi, pasi i jep lavdi Jehovait dhe u jep mundësi njerëzve të shohin ‘veprat tona të shkëlqyera’.—Mateu 5:16.