Datat: 13-15 shtator 2019

Vendi: KINTEX (Korea International Exhibition Center) në Seul, Koreja e Jugut

Gjuhët: angleze, indoneziane, kineze mandarin, koreane, ruse, vietnameze

Maksimumi i të pranishmëve: 60.082

Numri i të pagëzuarve: 478

Numri i delegatëve ndërkombëtarë: 6.076

Degët e ftuara: Brazil, Çeki dhe Sllovaki, Finlandë, Francë, Greqi, Indonezi, Kazakistan, Malajzi, Skandinavi, Shtetet e Bashkuara, Vietnam

Komente pozitive: Çei Xhi Ong, menaxher i një kompanie që siguroi ushqim për delegatët, u shpreh: «Një pjesëtar i stafit tregoi se nga ky bashkëpunim pa sa të mirë janë Dëshmitarët. Kurse mua më preku sidomos dashuria që kishin për njëri-tjetrin Dëshmitarët koreanë dhe ata nga vende të tjera, edhe pse u takuan për herë të parë. Dukej sikur po takonin prapë miqtë e vjetër. Kam qenë në shumë evente fetare, por ky event i Dëshmitarëve të Jehovait ishte një përvojë e jashtëzakonshme.»

An San Xhu, anëtare e bordit të Eutteum Tour Agency, tha: «Kur pashë që Dëshmitarët e Jehovait ishin aq të dashur e të qeshur, mendova se do të ishte mirë t’u kujtonim shoferëve tanë të autobusëve t’i imitojnë. Në fillim vrisja mendjen pse janë kaq të mirë, por ndërsa punoja me ta, mrekullohesha kur shihja se e donin dhe e respektonin vërtet njëri-tjetrin, si dhe i zbatonin gjërat që mësonin. Mbeta gojëhapur kur mora vesh se asnjëri nuk paguhej. Kur i shihja që e dëgjonin me vëmendje njëri-tjetrin dhe që përgjigjeshin gjithmonë me një buzëqeshje, fillova të mendoja se si mund të ndryshoja edhe unë. Po të jetë e mundur, do të më pëlqente të bashkëpunoja prapë me Dëshmitarët e Jehovait.»

Kim Gio Shik, shef i MBC Munhwa Broadcasting Station Dae-jang-geum Theme Park, komentoi: «Ky aktivitet i organizuar nga Dëshmitarët e Jehovait ishte vërtet frymëzues. Megjithëse jam katolik, këtu pashë fiks si duhet të sillen të krishterët e vërtetë. Unë dhe stafi kemi vërejtur se Dëshmitarët ishin bashkëpunues dhe të organizuar. Silleshin mirë me të tjerët dhe madje kërkonin leje për të përdorur qoftë edhe gjërat më të vogla në godinën tonë. Më dukej vetja Dëshmitar i Jehovait dhe ndihesha shumë krenar për ta.»