Koreja e Jugut burgos qindra djem që nuk janë kriminelë. Përse? Sepse janë Dëshmitarë të Jehovait dhe kanë vendosur të dëgjojnë zërin e ndërgjegjes e të refuzojnë shërbimin ushtarak. Meqë Koreja nuk mbron të drejtat e atyre që refuzojnë për shkak të ndërgjegjes, Dëshmitarët e rekrutuar dënohen me burgim. Në fakt, 60 vitet e fundit janë burgosur mbi 17.000 Dëshmitarë të Jehovait që nuk kanë pranuar të kryejnë shërbimin ushtarak për shkak të ndërgjegjes.

Për të drejtuar vëmendjen te kjo çështje, zyra kombëtare e Dëshmitarëve të Jehovait në Korenë e Jugut përgatiti një broshurë me titull:  Refuzimi i shërbimit ushtarak për shkak të ndërgjegjes në Kore. Broshura nxjerr në pah se Koreja nuk ka respektuar standardet ndërkombëtare dhe nuk ka mbrojtur ata që refuzojnë për shkak të ndërgjegjes. Përmban gjithashtu një histori të shkurtër të djemve Dëshmitarë që kanë duruar burgimin për të mos dhunuar ndërgjegjen e tyre. Z. Dae-il Hong, përfaqësuesi i zyrës së Koresë të Dëshmitarëve të Jehovait dhe Philip Brumley, përgjegjësi i çështjeve ligjore i Dëshmitarëve të Jehovait në Nju-Jork, na tregojnë më shumë për këtë padrejtësi që zgjat prej vitesh.

Si ka reaguar komuniteti ndërkombëtar ndaj padrejtësisë që duket qartë në Korenë e Jugut?

Philip Brumley: Disa shtete kanë ngritur zërin kundër faktit që Koreja nuk ka njohur të drejtën themelore të atyre që refuzojnë për shkak të ndërgjegjes. Gjatë seancës së Rishikimit Universal Periodik të OKB-së që u mbajt kohët e fundit, tetë shtete​—Hungaria, Franca, Gjermania, Polonia, Sllovakia, Spanja, Shtetet e Bashkuara dhe Australia​—i bënë thirrje Koresë t’i japë fund ndjekjes penale të atyre që refuzojnë për shkak të ndërgjegjes dhe të vendosë shërbimin civil joushtarak për ta. *

Dae-il Hong: Në katër çështje ku përfshiheshin gjithsej 501 veta që refuzojnë për shkak të ndërgjegjes, Komiteti i OKB-së për të Drejtat e Njeriut (CCPR) dha vendimin se Republika e Koresë ka dhunuar të drejtat e tyre kur i shpalli fajtorë dhe i burgosi. Ky Komitet pohoi se «e drejta për të refuzuar shërbimin ushtarak për shkak të ndërgjegjes është pjesë e pandashme e lirisë së mendimit, të ndërgjegjes dhe të fesë. Ajo i jep të drejtë çdo personi të përjashtohet nga shërbimi i detyrueshëm ushtarak nëse ky i fundit nuk pajtohet me besimin dhe bindjet e tij. Kjo e drejtë nuk duhet mohuar me forcë.» *

Këshilli për të Drejtat e Njeriut, një tjetër organ i OKB-së, po ashtu e përqendroi vëmendjen te kjo çështje në një raport të kohëve të fundit me titull: «Raporti analitik i refuzimit të shërbimit ushtarak për shkak të ndërgjegjes.» Në këtë dokument paraqitet kuadri ligjor ndërkombëtar i cili parashikon të drejtën e refuzimit për shkak të ndërgjegjes dhe gjithashtu ndalon detyrimin përmes gjyqeve të vazhdueshme ose dënimit të atyre që refuzojnë për shkak të ndërgjegjes. *

Si ka reaguar qeveria e Koresë ndaj faktit që opinioni ndërkombëtar ka ngritur zërin?

Philip Brumley: Qeveria koreane nuk ka zbatuar vendimet e CCPR-së. Ndaj, nuk ka respektuar marrëveshjet ndërkombëtare që vetë ajo ka nënshkruar dhe nuk ka pranuar të njohë të drejtat themelore të atyre që refuzojnë për shkak të ndërgjegjes. Për më tepër, Gjykata e Lartë dhe Gjykata Kushtetuese e Koresë së Jugut ka shpërfillur vendimet e CCPR-së duke hedhur poshtë apelimet e atyre që refuzojnë për shkak të ndërgjegjes. Asambleja Kombëtare e Koresë nuk ka vendosur ndonjë formë alternative të shërbimit civil për ata që refuzojnë për shkak të ndërgjegjes dhe nuk ka marrë ndonjë masë për t’i mbrojtur.

Si ka ndikuar në përgjithësi burgimi te këta të rinj Dëshmitarë?

Dae-il Hong: Këta janë djem të guximshëm. Paraqiten kur u vjen thirrja për shërbimin ushtarak, edhe pse e dinë se me sistemin ligjor të tanishëm do të dënohen me burgim. Nuk fshihen. Janë qytetarë shembullorë para se të burgosen dhe janë të burgosur shembullorë ndërsa vuajnë dënimin. Mjerisht, pasi lirohen mbeten me një precedent penal dhe kjo ua bën të vështirë të gjejnë punë në sektorin publik ose në ndërmarrje të mëdha. Pa të drejtë u është mohuar një vit e gjysmë nga jeta e tyre. Gjatë kësaj kohe familjeve të tyre u është dashur të vazhdojnë pa ata. Gjithë këto vështirësi janë të panevojshme.

A e meritojnë Dëshmitarët e Jehovait në Kore të dënohen e të burgosen si kriminelë, ngaqë refuzojnë shërbimin e detyrueshëm ushtarak?

Dae-il Hong: Absolutisht jo! Këta të rinj nuk janë kriminelë. Dëshmitarët e Jehovait njihen në Kore e në mbarë botën si qytetarë paqësorë që i binden ligjit dhe që janë të gatshëm t’i shërbejnë komunitetit. Respektojnë autoritetet qeveritare, ligjet, paguajnë taksat dhe bashkëpunojnë me nismat qeveritare në dobi të komunitetit. Kohët e fundit, gjyqtarja e një gjykate rajonale në Kore dënoi me burgim një të ri Dëshmitar për refuzimin e shërbimit ushtarak për shkak të ndërgjegjes. Pasi tha se nuk kishte zgjidhje tjetër veçse ta shpallte fajtor, gjyqtarja lexoi vendimin. Papritur, ajo e mbuloi fytyrën me letrat dhe ia plasi të qarit. Duket se padrejtësia që ta shpallte fajtor e stresoi aq shumë sa për momentin nuk u përmbajt dot. Edhe të pranishmit e tjerë e kuptuan se ishte padrejtësi dhe derdhën lot.

Philip Brumley: Tani është koha që autoritetet koreane t’i japin zgjidhje kësaj çështjeje që vazhdon prej vitesh dhe të hartojnë një sistem ligjor që garanton respektimin e të drejtave themelore të atyre që refuzojnë për shkak të ndërgjegjes.