Që nga janari 2016 më se 50 burra nga Koreja e Jugut, që e kanë kundërshtuar shërbimin ushtarak për arsye ndërgjegjeje, i janë ankuar Grupit të Punës të OKB-së për Burgosjen Arbitrare (Grupi i Punës). Këta burra pohojnë se qeveria e Koresë së Jugut është fajtore për burgosje arbitrare, duke i ndëshkuar vetëm sepse kanë ushtruar të drejtën ligjore të fesë dhe të ndërgjegjes.

Dy institucione të OKB-së, Grupi i Punës dhe Komiteti i OKB-së për të Drejtat e Njeriut kanë vendosur se burgosja e atyre që kundërshtojnë shërbimin ushtarak për arsye ndërgjegjeje është «burgosje arbitrare». * Më 2014 Komiteti i OKB-së për këtë çështje vendosi se qeveria e Koresë së Jugut duhej ta ndalonte këtë ndëshkim të padrejtë ndaj atyre që kundërshtojnë për arsye ndërgjegjeje, t’i dëmshpërblente ata që ka burgosur dhe të fshinte dosjen e tyre kriminale. Në bazë të këtij vendimi, 682 Dëshmitarë në Korenë e Jugut kanë ngritur ankesa pranë Grupit të Punës. *

Grupi i Punës do të japë mendimin e vet pasi t’ia komunikojë ankesat qeverisë së Koresë së Jugut dhe të marrë opinionin e saj. Nëse ky mendim mbështet ankesat se Koreja e Jugut është fajtore për burgosje arbitrare, Grupi i Punës do t’i kërkojë qeverisë të ndërmarrë hapat e nevojshëm që të ndreqë gjërat e të mos i shpallë më fajtorë për krim ata që kundërshtojnë për arsye ndërgjegjeje.

Për më tepër, çështja nëse është kushtetues Ligji për Shërbimin Ushtarak po trajtohet në Gjykatën Kushtetuese të Koresë së Jugut dhe shumë shpejt do të merret një vendim. Kjo Gjykatë është e vetëdijshme se Grupit të Punës i janë paraqitur mbi 600 ankesa. Gjithashtu është e vetëdijshme se Komiteti i OKB-së për të Drejtat e Njeriut e ka nxitur vazhdimisht Korenë e Jugut ta pranojë kundërshtimin për arsye ndërgjegjeje si një të drejtë dhe të sigurojë një program për shërbimin civil alternativ. Komuniteti ndërkombëtar po kushton mjaft vëmendje nëse gjykata më e lartë e Koresë së Jugut do ta mbrojë të drejtën themelore të kundërshtimit të shërbimit ushtarak për arsye ndërgjegjeje.