Ngaqë në mars 2019 stuhia Idai goditi bregun juglindor të Afrikës, degët në Malavi, në Mozambik dhe në Zimbabve organizuan shpejt 14 Komitete të Ndihmës në Rast Katastrofash (KNRK) që të kujdeseshin për nevojat e Dëshmitarëve të prekur. Në të tria vendet tashmë vëllezërit kanë rindërtuar ose riparuar më shumë se 650 nga 1.434 shtëpitë e dëmtuara të bashkëbesimtarëve. Gjithashtu, nga 29 Salla Mbretërie kanë rindërtuar 8 dhe kanë riparuar 10.

Gjatë 9 muajve të kaluar, më shumë se 3.500 vëllezër dhe motra kanë dhënë një dorë në këtë projekt gjigant. Disa vullnetarë udhëtuan nga larg. Ata erdhën nga vende të Afrikës, po ashtu edhe nga Brazili, Franca, Italia dhe Shtetet e Bashkuara. Vullnetarë me aftësi të ndryshme u mësuan vëllezërve vendës zanate të domosdoshme, si murator dhe karpentier.

Pasi stuhia Idai goditi provincat e Mankës dhe të Sofalit në Mozambik, u shkatërruan rreth 70 për qind e prodhimeve bujqësore të vëllezërve. Nën drejtimin e degës, KNRK-ja e asaj zone shpërndau rreth 430 tonë ushqime. KNRK-ja zgjodhi ushqime të përditshme për vëllezërit vendës, si: miell misri, fasule, vaj, kripë dhe sheqer. U shpërndanë edhe 5 tonë fara domateje, misri dhe orizi, që janë prodhime të zakonshme për zonën.

Sipas degës në Malavi mendohet se ky projekt do të përfundojë brenda shkurtit 2020 dhe sipas degës në Mozambik brenda janarit 2020. Kurse në Zimbabve ka përfunduar që në shtator 2019. Është përllogaritur që i gjithë projekti për dhënien e ndihmës të shkojë 4 milionë dollarë.

Trent Edsoni, anëtar i Komitetit të Degës në Zimbabve që shërben në Zyrën e Ndihmës në Rast Katastrofash, komenton: «Vëllezërit dhe motrat ishin jashtë mase të lumtur që iu rindërtuan shtëpitë. Na u bë zemra mal teksa shihnim merakun e madh që treguan vëllezërit vendës dhe ata që vinin nga larg. Të gjithë donin të jepnin një dorë!»

Bashkë me mbi 10.000 vëllezërit dhe motrat që u prekën nga stuhia në juglindje të Afrikës falënderojmë Jehovain teksa shohim dashurinë vëllazërore në «ditë të vështira».—Proverbat 17:17.