4 SHTATOR 2023
LAJME NDËRKOMBËTARE

I mbajnë sytë te besimi, jo te frika

LUAJ

Së shpejti, Gjykata Krahinore e Gagarinskit në Sevastopol do të shpallë vendimin për çështjen e vëllezërve Viktor Kudinov dhe Sergej Zhigalov. Prokuroria nuk është shprehur ende se çfarë dënimi kërkon për ta.

Të dhëna

Viktor Kudinovi

Lindur: 1969 (Budapest, Hungari)

Biografia: Ka punuar si shofer autobusi

U martua me Svetlanën në vitin 1991 dhe kanë një vajzë e një djalë

Kur pa ndikimin pozitiv që kishte Bibla te familja e tyre, u bashkua me Svetlanën në studimin e Biblës. Svetlana u pagëzua më 2005, kurse Viktori më 2010

Komente personale

Si të kanë dhënë forcë përvojat e të tjerëve?

Kam menduar shumë për vëllezër si Viktor Stashevski. Ai është në burg dhe nuk ka qenë e lehtë për të. Më ka dërguar disa letra nga të cilat kam kuptuar qartë se ai nuk përqendrohet te vetja. Tregon interes e merak për të tjerët dhe nuk e ka humbur gëzimin. Viktori dhe shumë vëllezër e motra të tjerë më kanë lënë një shembull të shkëlqyer. Përveç përndjekjes, u duhet të përballen edhe me shqetësimet e jetës së përditshme, për shembull, hasin probleme shëndetësore, u duhet të sigurojnë gjërat e nevojshme dhe të kujdesen për familjen. Fare kollaj mund t’u bëjnë bisht presioneve që sjell përndjekja duke u dorëzuar e duke hequr dorë nga besimi. Por ata zgjedhin t’i qëndrojnë besnikë Jehovait dhe vëllezërve. Kur shoh çfarë sprovash përballojnë me sukses, marr zemër se edhe unë mund t’ia dal.

Sergej Zhigalovi

Lindur: 1971 (Snezhnojë, Ukrainë)

Biografia: Ka punuar si hidraulik

Nisi të studionte Biblën me Dëshmitarët e Jehovait më 1994. I bëri përshtypje mençuria dhe saktësia e profecive të saj. U pagëzua më 1996

Në vitin 2007 u martua me Olgën

Komente personale

Çfarë ke mësuar për Jehovain gjatë kësaj sprove?

Edhe pse Jehovai i lejon përndjekjet, jam i sigurt se ai bëhet çfarëdo të jetë e nevojshme për të më mbrojtur dhe ngushëlluar në një mënyrë speciale. Tani fjalët e Isaisë 30:15 kanë marrë më shumë kuptim për mua: «Fuqia juaj qëndron në qetësinë dhe në besimin tuaj.» Ky varg më frenon që të mos imagjinoj të gjithë skenarët e frikshëm që mund të më ndodhin. E di se, po të më kapë frika, do të më shuhet zelli për shërbimin e Jehovait. Në thelb, do të ishte sikur ta vendosja veten nën ndalim. E pikërisht këtë shpreson Satanai. Por, në vend të kësaj, ndërsa mbështetem plot besim te Jehovai, gëzoj atë paqe të brendshme që mund ta japë vetëm Perëndia. Dhe kjo paqe më bën të fortë.

S’kemi pikë dyshimi se Jehovai do të vazhdojë t’i bekojë Viktorin dhe Sergejin për qëndrueshmërinë dhe durimin e tyre, sepse Ai është një Perëndi «që kënaqet kur shërbëtori i tij gëzon paqe».—Psalmi 35:27.

Tabelë kronologjike

24 gusht 2022

Ngrihet çështja penale. U kontrollojnë shtëpinë, i arrestojnë dhe i fusin në një burg të përkohshëm
26 gusht 2022

I lirojnë nga burgu dhe i kalojnë në arrest shtëpie
17 tetor 2022

I lirojnë nga arresti i shtëpisë dhe u vendosin disa kufizime
13 prill 2023

Fillon procesi penal

Mund të të pëlqejë edhe . . .

LAJME

Burgosen për shkak të besimit—Krime

Dëshmitarët e Jehovait në Krime janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME