Në korrik të 2023-shit u mbajtën për herë të parë kongrese rajonale me pjesëmarrje fizike, në gjuhët kreole xhamajkane dhe gjermane të Pensilvanisë. Gati 2.000 veta u mblodhën për të shijuar kongreset e shumëpritura rajonale me temë «Prisni me durim!» në gjuhët e tyre amtare.

Gjuha zyrtare në Xhamajkë është anglishtja. Mirëpo, shumica e banorëve të ishullit flasin edhe gjuhën kreole xhamajkane. Disa nga 1.700 të pranishmit në kongres, kishin ardhur nga Mbretëria e Bashkuar dhe nga Shtetet e Bashkuara. Kongresi u mbajt në Marlie Technology Park në Old-Harbor, Xhamajkë, nga data 14-16 korrik 2023. U pagëzuan 12 veta.

Vëllezërit e motrat që flasin gjuhën kreole xhamajkane ishin shumë të lumtur që, për herë të parë, e dëgjuan kongresin në gjuhën e tyre. Motër Tenesha Gordoni tha plot entuziazëm: «Kur filloi programi dhe vëllai në podium e përshëndeti auditorin në gjuhën kreole xhamajkane, m’u mbushën sytë me lot. S’po më besohej që po dëgjoja gjuhën time! Nuk doja që të mbaronte.»

Gjuhën gjermane të Pensilvanisë e flasin rreth 400.000 veta në Kanada dhe Shtetet e Bashkuara. Dialektin gjerman e flasin kryesisht në komunitetet rurale amishe dhe menonite. Vëllezërit e motrat nga 5 kongregacionet dhe nga një grup i gjuhës gjermane të Pensilvanisë udhëtuan nga disa shtete për të ndjekur kongresin. Programin e ndoqën mbi 200 veta në Sallën e Asambleve të Koraopolisit, në Pitsburg, Pensilvani, SHBA, nga data 7-9 korrik 2023.

Vëlla Dejvid Milleri u rrit në një familje ku flitej gjuha gjermane e Pensilvanisë. Mbi 25 vjet më parë, ai filloi të studionte Biblën me Dëshmitarët e Jehovait në anglisht. Në atë kohë, as e imagjinonte se do të kishte një kongregacion në gjuhën gjermane të Pensilvanisë, e jo më se do të mbahej një kongres i tërë në gjuhën e tij amtare. Ai u shpreh: «Ishte i mrekullueshëm! Programi më përpiu. Ngaqë ishte në gjuhën time, më depërtoi drejt e në zemër.»

Gëzojmë bashkë me motrat e vëllezërit tanë që ndoqën këto kongrese historike. I jemi mirënjohës Jehovait, i cili na bashkon dhe e vë në dispozicion për të gjithë gjuhën e kulluar.—Sofonia 3:9.