Më 20 maj 2023, vëllai Mark Sanderson, anëtar i Trupit Udhëheqës, mbajti fjalimin e kushtimit për një Sallë Mbretërie të re në Ikaluit, Nunavut, Kanada. Të pranishëm në programin e kushtimit ishin gjithsej 44 veta, kurse 388 të tjerë u lidhën me videokonferencë. Nunavuti konsiderohet si një nga vendet që ka popullsi me dendësi më të ulët në botë, me më pak se 40.000 banorë dhe me një sipërfaqe prej rreth 1.837.000 kilometrash katrorë. Siç është raportuar edhe më parë në jw.org, vëllezërit kanë kapërcyer shumë sfida unike për të ndërtuar këtë Sallë Mbretërie. Dëshmitarët e guximshëm që çuan lajmin e mirë në këtë territor të izoluar, u përballën me një mot të acartë dhe me një terren të vështirë. Gjatë programit të kushtimit iu dha vëmendje të veçantë besnikërisë dhe vendosmërisë që treguan ata.

Në vitin 1976, motër Margaret Gali u transferua nga Montreali, Kuebek, në një komunitet 2.052 kilometra larg, që sot njihet si Ikaluit, Nunavut. Ajo ishte Dëshmitarja e parë që predikoi në atë zonë të paanë e të shkretë. Më vonë, po atë vit, vëlla Hans Pintari, i cili shërbente si mbikëqyrës qarkor, dhe gruaja e tij, Minerva, i bënë një vizitë të veçantë 1-javore motër Galit, për ta inkurajuar dhe për të dalë me të në shërbim.

Më vonë, më 1983, një grup i vogël Dëshmitarësh të zellshëm udhëtuan për në Ikaluit. Përpjekjet e tyre në veprën e predikimit sollën fryt kur pjesëtarët e një familjeje u bënë banorët e parë që u pagëzuan në atë zonë. Përgjatë 20 viteve pasuese, lajmëtarë të guximshëm të Mbretërisë udhëtuan disa herë drejt këtij rajoni të izoluar për të përhapur lajmin e mirë. Në vitin 2008, në Ikaluit u formua një grup. Aty nga viti 2010, ai grup i vogël u bë kongregacion. Vëllezërit e motrat i mbanin mbledhjet në palestrën e një shkolle, prandaj u kënaqën jashtë mase kur, në tetor të 2022-shit, filluan të mblidheshin në një Sallë Mbretërie të sapondërtuar.

Përveçse në Ikaluit, pionierë specialë e të tjerë predikuan në territore të tjera të thella anekënd Nunavutit. Ndër ta ishte vëlla Xhoel Therrieni dhe gruaja e tij, Sherila, që u transferuan në Bejkër-Lejk, i cili ndodhet 1.329 kilometra në perëndim të Ikaluitit. Vëlla Therrieni tregon: «Pavarësisht nga moti i acartë, izolimi dhe shpenzimet, ia vlejti çdo sakrificë. Bekimi i Jehovait dukej qartë nga reagimi pozitiv i atyre që jetonin në Bejkër-Lejk. E shijuam shumë mundësinë që kishim për t’u treguar mesazhin e Biblës njerëzve që banonin atje.»

Xhozef Utatnaku është një nga banorët në Bejkër-Lejk që pranoi lajmin e mirë për Mbretërinë. Ai studioi Biblën me vëlla Therrienin dhe u pagëzua më 2021. Tani vëlla Utatnaku është lajmëtari i vetëm në Bejkër-Lejk. Kur mori vesh se programi i kushtimit të Sallës së Mbretërisë në Ikaluit do të zhvillohej në maj të 2023-shit, bëri shumë përpjekje që të ishte i pranishëm. Që nga koha kur u pagëzua, ishte hera e parë që mblidhej në një Sallë Mbretërie me motrat e vëllezërit. Ai komenton: «U preka thellë kur pashë Sallën e Mbretërisë të përfunduar. Shumë nga ata që ndihmuan në ndërtimin e sallës, nuk ishin vendës dhe nuk ishin mësuar me klimën e me kushtet këtu. Dukej qartë se motivi i tyre ishte dashuria për Jehovain dhe për të tjerët.»

Aktualisht ka gjithsej 178 vëllezër e motra që shërbejnë në 4 kongregacione në territorin verior, ku përfshihet 1 kongregacion në Nunavut, 2 në Territoret Veriperëndimore dhe 1 në Jukon. Ky territor zë thuajse 40 për qind të sipërfaqes së Kanadasë. Për shkak të të ftohtit ekstrem dhe të mjedisit të ashpër në skajin verior të Kanadasë, është sfidë të takosh njerëzit që jetojnë në këto zona të izoluara. Ja pse i admirojmë përpjekjet e vëllezërve e të motrave që tregohen të gatshëm për të predikuar lajmin e mirë në këto territore të largëta.—Veprat 1:8.