17 QERSHOR 2022
LAJME NDËRKOMBËTARE
Mjet Kërkimesh në aplikacionin JW Library përditësohet me një tregues shkrimesh më të zgjeruar
Më 25 prill 2022 në aplikacionin JW Library doli versioni i përditësuar i Mjet kërkimesh për Dëshmitarët e Jehovait. Ai përmban një numër më të madh referimesh në të cilat shpjegohen shkrimet e Biblës.
Çfarë risie sjell ky përditësim?
Që kur doli më 2013, Mjet Kërkimesh ka pasur një tregues shkrimesh me referime nga botimet më të fundit.
Vitet e fundit, në JW Library janë shtuar mjaft botime të vjetra. Kështu, tani shumica e botimeve që gjenden në BIBLIOTEKËN ONLINE Watchtower (WOL) janë edhe në aplikacion. Versioni i përditësuar i Mjet Kërkimesh përmban referime nga këto botime më të vjetra, ku përfshihet edhe Të fitojmë gjykim të thellë nga Shkrimet. Në aplikacionin JW Library, te Mjet Kërkimesh mund të lexosh tekstin e çdo referimi edhe nëse nuk je i lidhur me internetin.
Gjithashtu, ky përditësim ka edhe referime nga libri Gëzoje jetën përgjithmonë. Një motër me emrin Keri u shpreh: «Jam shumë në siklet kur predikoj me telefon, por e di se njerëzit kanë tmerrësisht nevojë për ngushëllim. Disa herë më vijnë ndër mend shkrime të caktuara, por më duhet ndihmë t’i prezantoj thjeshtë e në mënyrë tërheqëse që ta lë derën hapur për bisedën e radhës. Tani që mund të gjej menjëherë referimet për shkrimet në Mjet Kërkimesh, ku përfshihen edhe mësimet nga Gëzoje jetën përgjithmonë, ndiej më tepër siguri e gëzim në shërbim.»
Procesi për të prodhuar Mjet Kërkimesh është thjeshtuar në mënyrë që të jetë në dispozicion në sa më shumë gjuhë. Ivo, i cili shërben në degën e Kilit, tha: «Kjo ishte hera e parë që Mjet Kërkimesh u prodhua në gjuhën mapudungune. Nuk kisha punuar ndonjëherë me këtë lloj botimi, por procesi për ta prodhuar ishte goxha i kollajtë. Vëllezërit u surprizuan që ky botim doli në gjuhën e tyre, se nuk ia merrte mendja që do të prodhohej për një gjuhë që flitet nga pak veta. Megjithatë u lexohej në sy gëzimi kur e morën këtë mjet aq të dobishëm, si për studimin personal edhe për përgatitjen e komenteve e të fjalimeve.»
Si ta përdorësh treguesin e shkrimeve të Mjet Kërkimesh
Në Bibël gjej vargun për të cilin dëshiron të bësh kërkime.
Kliko mbi numrin e vargut. Pasi të hapet menuja e opsioneve, kliko mbi ikonën e Mjet Kërkimesh. Nëse kjo ikonë nuk të del, do të thotë se për këtë varg nuk ka referime shpjeguese në Mjet Kërkimesh.
Te lista e referimeve të Mjet Kërkimesh dalin fillimisht botimet më të reja. Nëse të duhet ndonjë referim më i vjetër, kërko më poshtë te lista e referimeve që është shfaqur te paneli i studimit. Gjatë viteve kuptueshmëria jonë për disa vargje është qartësuar, ndaj referimet më të fundit tregojnë si i kuptojmë tani ato shkrime.