Që të mos rrezikojnë për shkak të koronavirusit, vëllezërit e motrat e moshuar me mençuri po u binden autoriteteve përgjegjëse për shëndetin dhe po rrinë në shtëpi. Gjithsesi nuk janë fare të izoluar e as po rrinë duarkryq. Përkundrazi po përdorin mjete të ndryshme elektronike për të marrë pjesë në mbledhje dhe në shërbim.

Një motër 94 vjeçe, që është pagëzuar më 1952 dhe që jeton në Romë, nuk dilte nga shtëpia edhe para pandemisë. Mbledhjet i ka ndjekur në JW Stream, prandaj nuk ka qenë me kongregacionin e saj për njëfarë kohe. Mirëpo, tani që pleqtë vendës po i drejtojnë mbledhjet nëpërmjet videokonferencave, ajo mund të shohë gjithë kongregacionin dhe të ndjekë mbledhjet bashkë me ta.

Motër Stefania Aitken jeton në Spanish Fork, Jutë, SHBA. Ajo nuk dëgjon dhe jeton në një shtëpi të moshuarish ku tani nuk lejohen vizitorë. Një plak dhe e shoqja e ndihmuan të instalonte një aplikacion që të përdorte videokonferencën. Ata komunikuan në gjuhën e shenjave nëpërmjet derës prej xhami. Ajo ishte aq e lumtur që instaloi aplikacionin, saqë përqafoi tabletën. Ishte mirënjohëse që mund të komunikonte me motrat e vëllezërit në kongregacionin e saj.

Ndërsa motrat e vëllezërit anekënd botës, mes tyre edhe të moshuarit, përdorin teknologjinë për t’iu përshtatur rrethanave të vështira për shkak të koronavirusit, s’ka si të mos kujtojmë premtimin e Jehovait se populli i tij do të përdorte me mençuri «qumështin e kombeve». (Isaia 60:16) E dimë mirë se ai gjithmonë bëhet gjithçka që u nevojitet shërbëtorëve të tij në kohë të ankthshme.