9 JANAR 2024 | PËRDITËSUAR MË 7 TETOR 2024
LAJME NDËRKOMBËTARE

PËRDITËSIM—VËLLEZËRIT TANË I BURGOSIN | Të vendosur që të mbështeten te Jehovai

LUAJ

Më 3 tetor 2024, Gjykata e Lartë në Republikën e Krimesë ndryshoi dënimet e mëparshme për vëllezërit Juri Gerashçenko dhe Sergei Parfenoviç. Dënimet e mëparshme me 6 vjet vënie në provë i zëvendësoi me 6 vjet burg. Ata i arrestuan menjëherë në sallën e gjyqit.

Më 1 korrik 2024, Gjykata Krahinore e Krasnogvardejskit në Republikën e Krimesë shpalli fajtorë vëllezërit Juri Gerashçenko dhe Sergei Parfenoviç dhe e dënoi secilin me 6 vjet vënie në provë. Për momentin, nuk u duhet të futen në burg.

Të dhëna

Juri Gerashçenko

Lindur: 1979 (Ukrainë)

Biografia: Punon si elektricist

I la mbresa saktësia e Biblës dhe dashuria që ka Perëndia për njerëzit, e cila duket qartë në mësimet e saj. U pagëzua si Dëshmitar i Jehovait në vitin 2000

U martua me Irinën më 2002

Komente personale

Cilat aspekte të personalitetit të Jehovait ke kuptuar më qartë nga kjo eksperiencë?

Kam parë aftësinë dalluese të Jehovait. Ai di fiks çfarë më duhet dhe mezi pret të më ndihmojë. Kur kthej kokën pas dhe mendoj për gjithë sa ka ndodhur në jetën time kohët e fundit, kuptoj si më kishte përgatitur Jehovai. Ndihem si një mjet në duart e tij. Një artizan i aftë i mban mjetet e punës në gjendje të mirë, i mpreh dhe kujdeset për to që t’i ketë gati kur të lindë nevoja. Tani shoh si e ka bërë gjithë kohës këtë Jehovai me mua. Kjo më bën, si të thuash, t’ia kap dorën fort e të mos ia lëshoj kurrë.

Sergei Parfenoviçi

Lindur: 1972 (Mirnojë, Krime)

Biografia: Ka punuar në mirëmbajtjen e ambienteve të jashtme të një kompleksi sportiv

Iu prek zemra kur mësoi se çfarë do të bëjë në të ardhmen Mbretëria e Perëndisë. U pagëzua më 1993 në kongresin ndërkombëtar që u mbajt në Kiev, Ukrainë

Në vitin 1997 u martua me Marinën. Kanë 4 djem dhe 2 vajza

Komente personale

Cili shembull nga Bibla të ka dhënë zemër?

Te Filipianëve 3:10, apostulli Pavël shkroi: «Synoj që ta njoh atë dhe fuqinë e ringjalljes së tij, si dhe të heq të njëjtat vuajtje si të tijat.» Kam menduar thellë për dashurinë e madhe që kishte Pavli për Jezuin. Aq shumë e donte, sa ishte gati të vuante siç vuajti Jezui. Jam lutur që të kem të njëjtin qëndrim dhe të njëjtën vendosmëri si Pavli. Kjo më ka ndihmuar të ndryshoj mënyrën si mendoj. Në vend që ta shoh veten si viktimë të rrethanave të pafavorshme, e shoh si dikush që ka marrë një vendim të pandryshueshëm për t’i shërbyer Jehovait, pavarësisht nga pasojat.

Jemi të sigurt se Jehovai do të vazhdojë të mbështetë Jurin dhe Sergein, si edhe të gjithë ata që mbajnë integritetin, dhe ‘t’i fshehë nën hijen e krahëve të tij’.—Psalmi 17:7, 8.

Tabelë kronologjike

19 shtator 2022

Ngrihet çështja penale kundër Sergeit
28 shtator 2022

Shtëpia e Sergeit është ndër 8 shtëpitë që u kontrolluan nga policët e FSB-së. Sergein e futin në një burg të përkohshëm
30 shtator 2022

Sergein e futin në një qendër paraburgimi
15 nëntor 2022

Sergein e lirojnë nga paraburgimi dhe e kalojnë në arrest shtëpie
22 mars 2023

Ngrihet çështja penale kundër Jurit. E arrestojnë, e marrin në pyetje dhe e futin në një burg të përkohshëm
24 mars 2023

Jurin e lirojnë dhe e kalojnë në arrest shtëpie
12 korrik 2023

Sergein dhe Jurin i lirojnë nga arresti i shtëpisë dhe u vendosin kufizime për udhëtimet
28 korrik 2023

Fillon procesi penal. Prokuroria akuzon Sergein dhe Jurin se vazhdojnë «të përfshihen në aktivitete kriminale dhe të kërcënojnë dëshmitarët e çështjes». Pavarësisht nga mungesa e provave, gjykatësi i fut në arrest shtëpie për herë të dytë

Shih edhe

LAJME

Burgosen për shkak të besimit—Krime

Dëshmitarët e Jehovait në Krime janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME