9 SHKURT 2024
RUSI

E panjohura nuk i tremb

LUAJ

Së shpejti, Gjykata e Qytetit të Blagoveshenskut në Rajonin e Amurit do të shpallë vendimin për çështjen e motrave Kristina Golik, Jekaterina Olshjevski, Maria Misnikov dhe Valentina Jermilov. Prokuroria nuk është shprehur ende se çfarë dënimi kërkon për to.

Të dhëna

Kristina Goliku

Lindur: 1992 (Ukrainë)

Biografia: Ka studiuar grafikë dhe web design

Vjen nga një familje që i shërben Jehovait nga 5 breza. U pagëzua më 2006

Në vitin 2012 u martua me Dmitrin. Në qershor të vitit 2021 Dmitrin e shpallën fajtor dhe aktualisht po vuan dënimin me 6 vjet e 2 muaj burg

Komente personale

Cili varg nga Bibla të ndihmon të ruash gëzimin?

Kur më ndanë nga Dmitri herën e parë, nuk dija si të reagoja ndaj kësaj padrejtësie. Më mungonte shumë forca dhe mbështetja që më jepte im shoq. I përgjërohesha Jehovait të më ndihmonte. Gjatë leximit të Biblës, hasa Psalmin 17. Më preku veçanërisht vargu 15: «Kurse unë do të gëzoj miratimin tënd për hir të drejtësisë sime; më kënaqet shpirti veç të zgjohem në praninë tënde.» Tani, çdo mëngjes kur zgjohem, i kujtoj vetes se Perëndia im, Jehovai, di më mirë se kushdo si të më japë forcën dhe ngushëllimin që kam nevojë. Me gjithë vështirësitë, arrij gjithmonë të gjej arsye për të buzëqeshur.

Jekaterina Olshjevski

Lindur: 1984 (Blagoveshensk)

Biografia: Në vitin 2010 u martua me Antonin. Kanë një djalë 4 vjeç

Antoni dha babai i saj, Sergej Afanasijevi, u shpallën fajtorë në dhjetor 2022 dhe aktualisht po vuajnë dënimin me mbi 6 vjet burg

Komente personale

Si të është forcuar miqësia me Jehovain gjatë këtyre sprovave?

Kam 5 vjet që jam sfilitur nëpër seancat gjyqësore për çështjet penale të babait tim, të bashkëshortit dhe tani për çështjen time penale. Ekziston mundësia që të më fusin në burg dhe, nëse ndodh kjo, djali im 4 vjeç do të mbetet pa prindër. Prapëseprapë, mund të bashkohem me gjithë zemër me fjalët e Jobit të drejtë që gjejmë te Jobi 42:5: «Veç kisha dëgjuar të flitej për ty, por tani të shoh me sytë e mi.» Mes gjithë këtyre vështirësive dhe pa një burrë ku të mbështetem, e kam ndier Jehovain më pranë se kurrë. Njëherë Antoni më tha: «Edhe nëse më fusin në burg dhe nuk të siguroj dot gjërat e nevojshme, ke për ta parë se Jehovai është kryefamiljari më i mirë. Do të kujdeset ai për ty.» Dhe vërtet Jehovai ma ka treguar këtë mirësi. Ai jo thjesht më dëgjon dhe ndien keqardhje, por vepron dhe më siguron gjithçka më duhet emocionalisht dhe fizikisht, madje shpesh e bën këtë para se t’i kërkoj diçka.

Maria Misnikovi

Lindur: 1994 (Çernigovkë, Rajoni i Amurit)

Biografia: Ka punuar si drejtoreshë në një zyrë

Ajo studioi Biblën me të ëmën. I bëri përshtypje plotësimi i profecive të Biblës dhe shpresa për të jetuar përgjithmonë. U pagëzua më 2006

Në vitin 2021 u martua me Nikolain

Komente personale

Çfarë të ndihmon të ruash optimizmin pavarësisht nga rrethanat e vështira?

Përpiqem t’i shoh sprovat jo si diçka negative, por si një mundësi për të zhvilluar cilësitë e krishtere. Ari rafinohet në temperaturë të lartë. Sfidat që po kaloj tani, po më ndihmojnë të zhvilloj disa aspekte të personalitetit që Jehovai i çmon dhe që do të më ndihmojnë në të ardhmen. Gjithashtu nuk harroj atë që thuhet te 1 Gjonit 2:17: «Bota po kalon, e po kështu edhe dëshirat e saj, por ai që bën vullnetin e Perëndisë, mbetet në jetë të jetëve.» Gjithçka që po ndodh tani është e përkohshme. Ky fakt më jep forcë që të mos dorëzohem.

Valentina Jermilovi

Lindur: 1970 (Shimanovsk, Rajoni i Amurit)

Biografia: Ka punuar si laborante

Në vitin 1995 u martua me Sergejin. Kanë një djalë

U kënaq shumë kur mësoi për shpresën e ringjalljes. U pagëzua më 2009

Sergejin e shpallën fajtor në dhjetor 2022 dhe po kryen dënimin me 6 vjet e 3 muaj burg

Komente personale

Çfarë mësimesh ke nxjerrë gjatë kësaj sprove të vështirë?

Kam parë sa e rëndësishme është të mos përqendrohem shumë te situata ime. Në vend të kësaj, i kujtoj vetes se gjëja më e rëndësishme është të shenjtëroj emrin e Jehovait. Shumë njerëz e kanë për nder të japin jetën për atdheun e tyre. Sa më e nderuar jam unë që mbroj emrin e Jehovait! Dua vetëm t’i jap atij më të mirën dhe ta lëvdoj. Jam e sigurt se ai nuk do të më braktisë kurrë.

Jemi mirënjohës për shembujt e besimit që lënë këto motra. S’kemi pikë dyshimi se Jehovai do të vazhdojë të kujdeset për to dhe do t’i bekojë me bollëk.—Psalmi 27:3.

Tabelë kronologjike

20 korrik 2018

U kontrollojnë shtëpitë
22 korrik 2021

Ngrenë akuza penale kundër 4 motrave
27 korrik 2021

Kristinës dhe Marisë u vendosin kufizime për udhëtimet
3 gusht 2021

Jekaterinës i vendosin kufizime për udhëtimet
4 gusht 2021

Valentinës i vendosin kufizime për udhëtimet
26 maj 2023

Fillon procesi penal

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME