29 NËNTOR 2023
RUSI

Gjykata ruse në Saratov shpall fajtorë 5 vëllezër

LUAJ

Më 23 nëntor 2023, Gjykata Krahinore e Balakovskit në Rajonin e Saratovit shpalli vendimin për çështjen e vëllezërve Aleksej Bogatov, Jevgeni Fomashin, Vladimir Mavrin, Andrej Muriç dhe Sergej Tjurin. Ajo i shpalli fajtorë të 5 vëllezërit. Aleksejin dhe Vladimirin e dënoi secilin me 6 vjet vënie në provë. Andrejin, Sergejin dhe Jevgenin i gjobiti me 300.000 rubla (3.362 dollarë amerikanë). Në këtë moment, vëllezërve nuk u kërkohet të futen në burg.

Të dhëna

Aleksej Bogatovi

Lindur: 1960 (Baklushi, Rajoni i Uljanovskit)

Biografia: Ka punuar si shofer ambulance

Në vitin 1982 u martua me Ljubovën dhe kanë rritur 3 djem

Kur studioi Biblën me Dëshmitarët e Jehovait, kuptoi si do të sjellë drejtësi për të gjithë njerëzit Mbretëria e Perëndisë. U pagëzua më 1994

Komente personale

Si e ke ndier dorën e Jehovait gjatë kohës që ishte në paraburgim?

Gjatë muajit të parë në burg, nuk kisha Bibël, vetëm një bllok dhe një stilolaps. I lutesha Jehovait çdo ditë që të më ndihmonte të kujtoja shkrimet. Në fund të muajit, kisha kujtuar dhe kisha shkruar 112 vargje. Kjo më vërtetoi se, po të lexoj rregullisht Biblën dhe të meditoj rreth saj, Jehovai do të përdorë frymën e shenjtë që të më ndihmojë të kujtoj ato që kam lexuar. Falënderova Jehovain që më ndihmoi.

Jevgeni Fomashini

Lindur: 1977 (Balakovo)

Biografia: Ka punuar si elektricist

I pëlqeu premtimi i Biblës që në tokë do të ketë paqe dhe harmoni. U pagëzua më 2013. Mësoi gjuhën e shenjave për të ndihmuar ata që nuk dëgjojnë në komunitetin e tij

Komente personale

Si të kanë ndihmuar shembujt e vëllezërve që janë burgosur në të shkuarën?

Kur isha në burg, mendoja për vëllezërit Konstantin Bazhenov, Aleksej Budençuk, Ginadi German, Roman Gridasov, Feliks Mahamadiev dhe Aleksej Miretski, të cilët u burgosën në të njëjtën godinë në vitet 2018-2019. Shembujt e tyre të besimit më dhanë forcë. Edhe sot e kësaj dite marr zemër nga tërë ata vëllezër e motra nëpër botë që mbajnë integritetin, pavarësisht nga sfidat e ndryshme që hasin. Ndihem sikur po i kalojmë krah për krah të gjitha këto vështirësi.

Vladimir Mavrini

Lindur: 1962 (Kamishovkë, Rajoni i Saratovit)

Biografia: Merret me ndërtim dhe me punime finiture të ambienteve të brendshme

U pagëzua më 1994

Mbeti i ve në vitin 2004 dhe rriti i vetëm djalin adoleshent. Në vitin 2013 u martua me Irinën

Komente personale

Çfarë ke mësuar për Jehovain gjatë kësaj periudhe të vështirë?

E kisha dëgjuar edhe më parë premtimin e Jehovait te Hebrenjve 13:5: «Kurrsesi nuk do të të lë dhe kurrsesi nuk do të të braktis.» Por e kam ndier në mënyrë të veçantë kujdesin e Tij pasi më arrestuan dhe më futën në burg. Jehovai më dha qetësi, paqe të brendshme dhe forcë me bollëk. Gjithashtu zbulova se Jehovai u përgjigjet gjithmonë lutjeve të mia në mënyrën më të mirë. Gjatë gjithë kësaj peripecie, nuk jam ndier në asnjë çast vetëm.

Andrej Muriçi

Lindur: 1991 (Balakovo)

Biografia: Merret me punimin e çelikut

Dëgjoi për herë të parë rreth Biblës nga gjyshja e tij. I bëri përshtypje plotësimi i profecive të Biblës. U pagëzua më 2007

Në vitin 2009 u martua me Anastasian dhe kanë një vajzë

Komente personale

Çfarë të ndihmoi të përballoje sfidat që hase në paraburgim?

Për mua, sidomos gjatë dy muajve të parë, gjëja më e vështirë ishte të ruaja gëzimin. Një gjë që më ndihmoi, ishte të mendoja se si, me qëndrimin tim, edhe në atë situatë të vështirë, mund t’i tregoja Jehovait nëse isha mirënjohës për gjithçka që kishte bërë për mua. Të mbaja integritetin e në të njëjtën kohë të isha i gëzuar, ishte mënyra më e mirë për t’i treguar mirënjohje. Gjithashtu u binda edhe më shumë se me ndihmën e Jehovait mund të përballoj çdo gjë. Ai mund të më japë paqe në çfarëdolloj situate.

Sergej Tjurini

Lindur: 1994 (Balakovo)

Biografia: Ka punuar si elektricist

I foli për Biblën gjyshja e tij. U bind se zbatimi i parimeve të Biblës ishte sekreti për të pasur një jetë të suksesshme. U pagëzua më 2012

Në vitin 2018 u martua me Jelizavetën

Komente personale

Çfarë mësimesh ke nxjerrë nga përndjekja që ke hasur për shkak të besimit?

Kam mësuar tri gjëra. Së pari, Jehovain e kam gjithmonë pranë dhe më mbështet. Ai sheh se për çfarë kam më tepër nevojë dhe di cili është momenti më i mirë për të ma plotësuar. Së dyti, besimi te premtimet e Jehovait është jetësor që të ruaj paqen e brendshme. Edhe pse përndjekja nuk është kurrë e lehtë, ajo zgjat vetëm një çast krahasuar me përjetësinë plot bekime që na pret. Së shpejti, as nuk do t’i kujtoj më këto vështirësi. Dhe së treti, uniteti që gëzojmë ne si vëllazëri është një thesar. Na e bën shumë më të lehtë të përballojmë vështirësitë, ndaj duhet ta mbrojmë.

Shembujt e këtyre 5 vëllezërve na kujtojnë se mund të durojmë vuajtjet për lajmin e mirë duke u mbështetur te fuqia e Perëndisë.—2 Timoteut 1:8.

Tabelë kronologjike

11 shkurt 2022

Ngrihet çështja penale
23 mars 2022

Oficerë të FSB-së kontrollojnë shtëpitë e 5 vëllezërve. E marrin secilin në pyetje dhe e fusin në një burg të përkohshëm
25 mars 2022

Vëllezërit i fusin në një qendër paraburgimi
23 janar 2023

Vëllezërit i lirojnë nga arresti dhe u vendosin kufizime për udhëtimet
21 korrik 2023

Fillon procesi penal
23 nëntor 2023

I shpallin fajtorë

Shih edhe

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME