Të hënën më 27 janar 2020, Gjykata e qytetit të Karpinskit do të marrë vendimin për çështjen e motrave Venera e Daria Dulovës dhe të vëlla Aleksandër Prianikovit. Prokurori i ka kërkuar gjykatës të marrë vendim gjyqësor të ndërprerë me 3 vite burg për vëlla Prianikovin dhe motër Venera Dulovën dhe me 2 vite burg për motër Daria Dulovën.

Më 19 prill 2016, vëlla Prianikovi dhe motër Venera Dulova folën me një burrë për Biblën. Një i afërm i tij i akuzoi për vjedhje motër Dulovën e vëlla Prianikovin dhe i telefonoi policisë. Të dy i çuan në rajon, u morën shenjat e gishtërinjve dhe u konfiskuan literaturën.

Mbi 2 vjet më vonë i arrestuan përsëri dhe i morën në pyetje për të njëjtën ngjarje. U konfiskuan telefonat dhe dokumentet personale. Drejtori i policisë caktoi një ndihmësprofesor teologjie për të kontrolluar informacionet në telefonat e vëlla Prianikovit dhe motër Dulovës. Në raportin 15-faqësh, ndihmësprofesori thoshte se pajisjet e tyre përmbanin mësimet e Dëshmitarëve të Jehovait. Bazuar kryesisht te kjo, prokuroria ngriti një çështje penale. Gjykata e qytetit të Karpinskit u dha leje autoriteteve që të kontrollonin shtëpitë e tyre.

Gjatë kontrollit të shtëpisë së motër Dulovës, policët konfiskuan pajisje elektronike, libra dhe fotografi. Morën në pyetje edhe Darian, vajzën 18-vjeçare të motër Dulovës. Madje, policët kontrolluan edhe shtëpitë e të afërmve të tyre dhe apartamentin e vëlla Prianikovit.

Mëngjesin e 16 prillit 2019, 3 agjentë të Shërbimit të Sigurimit Federal (SHSF), 1 hetues dhe 2 policë, bastisën përsëri shtëpinë e vëlla Prianikovit. Policët konfiskuan pajisje elektronike dhe gjëra të tjera personale.

Më 23 korrik 2019, motër Daria Dulovën e thirrën si të dyshuar, për ta pyetur në lidhje me çështjen penale kundër mamasë së saj dhe vëlla Prianikovit. I akuzuan të tre dhe në shtator të 2019-s filluan seancat dëgjimore për çështjen e tyre.

Lutemi plot besim për të 3 këta Dëshmitarë dhe për pothuajse 300 vëllezër e motra në Rusi, që po ndiqen penalisht dhe po burgosen: «Perëndia që jep shpresë, ju mbushtë plot gëzim e paqe ngaqë besoni tek ai, që të jeni plot e përplot me shpresë falë fuqisë së frymës së shenjtë!»—Romakëve 15:13.