4 NËNTOR 2022
RUSI

PËRDITËSIM—ÇIFTIN E SHPALLIN FAJTOR | Marrin forcë nga shembujt e besimit në Bibël

LUAJ

Më 8 nëntor 2022 Gjykata e Qytetit të Petropavlovsk-Kamçatskit në Territorin e Kamçatkës i shpalli fajtorë vëllanë Dmitri Semenov dhe gruan e tij, Nadjezhdën, dhe i dënoi me nga 4 vjet vënie në provë. Për momentin atyre nuk u duhet të shkojnë në burg.

Tabelë kronologjike

3 shtator 2021

Një grua që bënte biseda rreth Biblës me Dmitrin dhe Nadjezhdën, filloi të bashkëpunonte me FSB-në. Autoritetet ngritën një çështje penale kundër tyre, bazuar në informacionet që u siguronte ajo. Çiftin e akuzojnë se përpiqen të bindin të tjerët të marrin pjesë në veprimtaritë e një organizate ekstremiste
6 shtator 2021

U kontrollojnë shtëpinë. I marrin në pyetje dhe u vendosin kufizime për udhëtimet
26 korrik 2022

Nis procesi penal

Të dhëna

Dmitri Semenovi

Lindur: 1984 (Petropavlovsk-Kamçatski)

Biografia: Ka studiuar për matematikë dhe shkenca kompjuterike. Punon si programues kompjuterësh

I njohu Dëshmitarët e Jehovait nëpërmjet një pjesëtari të familjes dhe u pagëzua në vitin 2006. Kreu shërbim alternativ civil në vend të shërbimit ushtarak

U martua me Nadjezhdën më 2010

Komente personale

Cili shembull nga Bibla të ka ndihmuar të forcosh besimin te Jehovai?

Që para se të niste përndjekja, meditoja për shembullin e Jeremisë, sidomos për rastin kur e futën në burg gjatë rrethimit të Jerusalemit nga babilonasit. Dukej sikur ishte në një situatë pa rrugëdalje, mirëpo Jehovai e mbrojti në një mënyrë krejt të pazakontë. Kur banorët e Jerusalemit nisën të vuanin urie, Jeremisë nuk i mungoi ushqimi dhe i mbijetoi shkatërrimit të qytetit. (Jeremia 37:21) Çdo situatë, Jehovai e sheh nga një këndvështrim tjetër dhe e di si do të rrjedhin ngjarjet. Edhe nëse një situatë mund të ngjajë e pashpresë, prapëseprapë Jehovai do të sigurojë një rrugëdalje fiks në momentin e duhur.

Nadjezhda Semenovi

Lindur: 1985 (Jekaterinburg, Rajoni i Sverdlovskit)

Biografia: Kur ishte fëmijë, bënte pjesë në korin e shkollës dhe i pëlqente të kërcente. Punon si sistemuese raftesh në një dyqan

E njohu të vërtetën nëpërmjet motrës së madhe, e cila kishte filluar të studionte Biblën. Tani, Nadjezhda, e ëma dhe motra janë Dëshmitare të Jehovait. Ajo u pagëzua në vitin 1997

U martua me Dmitrin në vitin 2010

Komente personale

Cili tregim nga Bibla të ka forcuar besimin?

Kohët e fundit shqyrtuam një artikull që fliste për shembullin e vejushës nga Zarefati. Në fillim pritej që ajo të tregonte besim, pastaj do t’i vinin bekimet. Artikulli thoshte: «Perëndia i bekon ata që tregojnë besim.» Duke cituar nga një Kullë Roje e Sionit e vitit 1898, artikulli vazhdonte: «Kështu është edhe me ne—në etapa të ndryshme në udhën e jetës, Zoti na çon atje ku na vë në provë besimin. Nëse tregojmë besim, do ta marrim bekimin; nëse jo, do ta humbim.»

Kjo më nguliti në mendje se, sado e vështirë të jetë një sprovë, është jetësore të bëj pjesën time që t’i qëndroj besnike Jehovait dhe vëllezërve e motrave të mia. Nëse veproj kështu, Jehovai do të më ndihmojë të tregoj qëndrueshmëri, duke më dhënë guximin, besimin dhe forcën e nevojshme.

Jehovai po i ndihmon shërbëtorët e tij të jenë të guximshëm dhe të fortë përballë përndjekjes, siç po e përjeton edhe vetë Dmitri me Nadjezhdën. Ai nuk i braktis kurrë shërbëtorët e tij.—Josiu 1:9.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME