13 SHKURT 2023 | PËRDITËSUAR MË 6 NËNTOR 2023
RUSI

PËRDITËSIM—APELIMI | Në Jaroslavl përndiqen tri familje

LUAJ

Më 30 tetor 2023, Gjykata Krahinore e Dzerzhinskit në Jaroslavl pranoi pjesërisht apelimin e vëllezërve Pjotër Filiznov dhe Andrej Vjushin. Dënimi i tyre me vënie në provë u reduktua nga 6 vjet e gjysmë në 2 vjet e gjysmë. Kurse dënimet për vëlla Aleksandër Kuznecovin dhe gruan e tij, Marijan, nuk ndryshojnë.

Më 3 gusht 2023, Gjykata Krahinore e Dzerzhinskit në Jaroslavl shpalli fajtorë vëlla Pjotër Filiznovin; vëlla Aleksandër Kuznecovin dhe bashkëshorten e tij, motër Marija Kuznecovin, si dhe vëlla Andrej Vjushinin dhe i dënoi të gjithë me vënie në provë. Andrejin dhe Pjotrin i dënoi me 6 vjet e gjysmë. Aleksandrin dhe Marijan i dënoi me 2 vjet e gjysmë. Për momentin nuk u duhet të futen në burg.

Të dhëna

Aleksandër Kuznecovi

Lindur: 1982 (Moskë, Rajoni i Moskës)

Biografia: Ka punuar si mësues anglishteje dhe matematike

Nisi të studionte Biblën në prill 2000. U prek nga dashuria që i treguan Dëshmitarët e Jehovait dhe u pagëzua më 2002

U martua me Marijan në vitin 2017 dhe, pasi u lirua nga paraburgimi, u diagnostikua me kancer

Komente personale

Si po e ruan gëzimin ndërsa je i sëmurë dhe po të përndjekin?

Shkurajohem shpesh dhe ndonjëherë ndihem sikur po më shterojnë forcat. Mirëpo, Jehovai gjithmonë më siguron ‘një rrugëdalje’. (1 Korintasve 10:13) Më ndihmojnë jashtë mase lutjet nga zemra dhe ndonjëherë me lot në sy. Përveç kësaj, marr zemër kur këndoj këngët tona, kur bëj studimin personal të Biblës dhe kur mendoj thellë për shpresën që kemi. Bashkë me gruan bëjmë çmos të inkurajojmë vëllezërit e motrat. Kjo na ndihmon të mos zhytemi te problemet tona. Më shumë se kurrë më parë po çmojmë mënyrën si po e përdor Jehovai frymën e tij të shenjtë për të na ngushëlluar e për të na dhënë paqe të brendshme.

Marija Kuznecovi

Lindur: 1988 (Sharipovo, Territori i Krasnojarskut)

Biografia: Punon në sektorin e shërbimeve

U rrit nga prindër Dëshmitarë të Jehovait. Gjatë studimit personal thelloi çmueshmërinë për profecitë e Biblës dhe u pagëzua më 2002

U martua me Aleksandrin në vitin 2017

Komente personale

Cili shkrim të ka dhënë më shumë zemër?

Një nga shkrimet e mia të preferuara është Kolosianëve 1:11: «Marrshit gjithë forcën që ju duhet nga fuqia e tij e lavdishme, që të përballoni çdo gjë me durim e gëzim.» Përvoja më ka mësuar se, nëse mbështetem plotësisht te Jehovai dhe i përgjërohem për ndihmë, Ai do të jetë gjithmonë aty për mua. Jehovai u shfaq dashuri besnike në sa e sa mënyra shërbëtorëve të tij dhe u tregon përherë mëshirë.

Andrej Vjushini

Lindur: 1975 (Jaroslavl, Rajoni i Jaroslavlit)

Biografia: E rritën mamaja dhe gjyshja. Punon si administrator sistemesh kompjuterike. Ndërkohë kujdeset për mamanë invalide

I njohu Dëshmitarët e Jehovait kur një mik i ngushtë filloi të studionte Biblën me ta. Dëshmitarët iu përgjigjën pyetjeve të tij. Gjithashtu vuri re se ata e praktikonin atë që predikonin, ndaj u pagëzua në vitin 1995

U martua me Anastasjan në vitin 2013 dhe kanë një vajzë

Komente personale

Si u keni dhënë zemër të tjerëve me historinë tuaj?

Unë dhe gruaja kemi marrë shumë zemër nga mënyra si u ka bërë ballë sprovave Denis Kristenseni. Ai ishte ndër të parët që u fut në burg dhe nuk e humbi dinjitetin për asnjë moment. Shembulli i tij na dha siguri se edhe ne mund të vepronim njësoj. Tani, kur takojmë vëllezër e motra që kanë frikë, bëjmë sa mundim që t’i inkurajojmë dhe u themi se situata nuk është aq e frikshme sa mund të duket. U kujtojmë miqve të mos i futin frikën vetes duke imagjinuar si mund të jetë përndjekja. Përkundrazi mund ta shohim përndjekjen si mundësi për të testuar cilësinë e besimit tonë.

Jemi të bindur se, ashtu si këta 4 shërbëtorë besnikë të Jehovait, edhe ne mund të jemi mes atyre ‘që kanë besim te Jehovai dhe që nuk lëkunden kurrë’.—Psalmi 125:1.

Tabelë kronologjike

13 prill 2021

Pasi autoritetet u kontrollojnë shtëpitë, i futin në një burg të përkohshëm
15 prill 2021

I futin në paraburgim
14 korrik 2021

I nxjerrin nga paraburgimi dhe u vënë kufizime për udhëtimet
9 shtator 2022

Nis procesi penal

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME