6 MAJ 2024 | PËRDITËSUAR MË 11 KORRIK 2024
RUSI

PËRDITËSIM—DËNIME ME BURG | «Jehovai ka gjithçka nën kontroll»

LUAJ

Më 10 korrik 2024, Gjykata Krahinore e Halkovskit në Territorin e Primorjes shpalli fajtorë vëllezërit Boris Andrejev dhe Anatol Li, si dhe motër Natali Sharapovin. Borisin e dënoi me 6 vjet burg, Anatolin me 6 vjet e 6 muaj burg dhe Natalinë me 3 vjet burg. Të tre ishin tashmë në burg dhe do të vazhdojnë derisa të kryejnë dënimin.

Të dhëna

Boris Andrejevi

Lindur: 1951 (Monastrishe, Territori i Primorjes)

Biografia: Ka punuar si operator në qendrën e thirrjeve të emergjencës

Ngaqë Dëshmitarët iu përgjigjën pyetjeve të tij me anë të Biblës, u bind se kishte gjetur të vërtetën. U pagëzua si Dëshmitar i Jehovait më 2004

Në vitin 2020 u martua me Aleksandrën

Komente personale nga bashkëshortja e Borisit, Aleksandra a

Si të ka ndihmuar bashkëshorti që të përballosh këto momente të vështira?

Më kujtohet një ditë veçanërisht e vështirë. Ishte pasi Borisin e kishin arrestuar. Isha aq e dërrmuar emocionalisht, sa shpërtheva në lot. I shkrova Borisit se çfarë kishte ndodhur dhe si ndihesha. Në letrën e tij më shprehte mirëkuptim dhe empati. Por mbi të gjitha, më kujtoi kohët kur kishim pasur vështirësi dhe i kishim kaluar me ndihmën e Jehovait. Pikërisht për këtë kisha nevojë e u binda edhe më shumë se Jehovai nuk do të na braktisë kurrë.

Anatol Li

Lindur: 1985 (Uzbekistan)

Biografia: Shkonte në kisha të ndryshme, por shumë nga pyetjet që kishte nuk merrnin përgjigje. Filloi të studionte me Dëshmitarët e Jehovait dhe u kënaq kur mësoi të vërtetën e Biblës. U pagëzua më 2010

U martua me Raisën më 2011

Komente personale nga bashkëshortja e Anatolit, Raisa b

Si e keni ndier mbështetjen e Jehovait ti dhe bashkëshorti?

Jo shumë kohë pasi e çuan në burg, në pritje të gjyqit, Anatoli më tha sa në merak ishte për mua që isha vetëm. Para se ta arrestonin, çdo ditë studionim Biblën dhe luteshim së bashku. Por meraku i tij kaloi kur mori vesh se vëllezërit e motrat po më ndihmonin dhe po më siguronin çdo gjë që më nevojitej. Të dy e kemi parë me sytë tanë se Jehovai kujdeset me të vërtetë për ne dhe se nuk na braktis kurrë.

Natali Sharapovi

Lindur: 1972 (Kazakistan)

Biografia: U takua me Dëshmitarët e Jehovait në vitin 1995 dhe pranoi të studionte Biblën. Pasi u bind që Bibla është Fjala e Perëndisë, u pagëzua më 2012

Komente personale nga nëna e Natalisë, Nina c

Çfarë po e ndihmon Natalinë të ruajë një qëndrim pozitiv edhe pse ndodhet në një qendër paraburgimi?

Vajza ime po kalon vështirësi nga më të ndryshmet. Atje bën ftohtë. Gjithashtu vuan nga dhimbja kronike e kokës. Edhe pse me raste shkurajohet, prapëseprapë është e bindur se Jehovai ka gjithçka nën kontroll. Ajo thotë: «E di se nuk do të rri përgjithmonë këtu. Jehovai po më jep durim, dhe jam gati të pres.» Vështirësitë e kanë bërë edhe më të fortë miqësinë e Natalisë me Jehovain. Ndihet sikur Jehovai e ka mbështjellë me krahët e tij.

Siç ka vepruar me Anatolin, Borisin dhe Natalinë, jemi të sigurt se Jehovai do të na përgjigjet edhe neve në ditë të vështirë dhe do të na japë forcën e nevojshme për të qëndruar.—Psalmi 20:1.

Tabelë kronologjike

28 korrik 2022

Ngrihet çështja penale
6 tetor 2022

Kontrollohen 12 shtëpi në fshatin e Jeraslavskit. Borisin dhe Natalinë i futin në një burg të përkohshëm
7 tetor 2022

Borisin dhe Natalinë i transferojnë në një qendër paraburgimi
12 tetor 2022

Anatolin e futin në një burg të përkohshëm
13 tetor 2022

Anatolin e transferojnë në një qendër paraburgimi
5 tetor 2023

Fillon procesi penal

a b c Gjatë përgatitjes së këtij artikulli, vëlla Andrejevi, vëlla Li dhe motër Sharapovi ishin në paraburgim, ndaj nuk mund të merrnim komente prej tyre.

Shih edhe

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME