22 KORRIK 2022 | PËRDITËSUAR MË 30 JANAR 2024
RUSI

PËRDITËSIM—DËSHMITARËVE U VENDOSIN GJOBA | Dëshmitarët në Shujë qëndrojnë besnikë përballë padrejtësive

LUAJ

Më 29 janar 2024, Gjykata e Qytetit të Shujës në Rajonin e Ivanovos shpalli fajtorë vëllezërit Aleksei Arhipov, Dimitri Mihajlov dhe gruan e tij, Jelenën, si dhe motrat Svetlana Rizhkov e Svetlana Shishin. Ata u gjobitën përkatësisht me 350.000 rubla (3.920 dollarë amerikanë), 950.000 rubla (10.640 dollarë amerikanë), 560.000 rubla (6.270 dollarë amerikanë), 480.000 rubla (5.380 dollarë amerikanë) dhe 400.000 rubla (4.480 dollarë amerikanë).

Tabelë kronologjike

21 shtator 2017

Një gjykatës autorizon të përgjohen telefonat e çiftit Mihajlov
15 janar 2018

Një gjykatës autorizon të përgjohet telefoni i motrës Svetlana Rizhkovi dhe të monitorohet me video shtëpia e saj
20 prill 2018

Autoritetet kontrollojnë shtëpitë e të pesë Dëshmitarëve
29 maj 2018

Oficerët arrestojnë Dimitrin dhe ngrenë një çështje penale kundër tij për financim të veprimtarive të një organizate ekstremiste. E fusin në paraburgim
22 qershor 2018

Aleksein e përfshijnë në të njëjtën çështje dhe e ndalojnë të largohet nga zona
27 qershor 2018

Së njëjtës çështje i shtohen motrat Jelena Mihajlovi, Svetlana Rizhkovi dhe Svetlana Shishini
15 nëntor 2018

Një gjykatë apeli vendos që Dimitri të lirohet pas thuajse 6 muajsh në paraburgim
10 gusht 2021

Nis procesi gjyqësor
16 shtator 2021

Çështja i kthehet prokurorit për rishikim
25 maj 2022

Rinis procesi penal

Të dhëna

Aleksei Arhipovi

Lindur: 1960 (Arhangelsk, Rajoni i Arhangelskit)

Biografia: Ka shërbyer në ushtri. Ka punuar si shofer autobusi

Në vitin 1984 u martua me Nataljan dhe kanë 2 fëmijë. Pasi doli në pension, shkuan të jetonin në Shujë që të kujdeseshin për prindërit e moshuar të Nataljas

E mësoi të vërtetën e Biblës nga një koleg dhe u pagëzua si Dëshmitar i Jehovait më 2017

Komente personale

Cilat vargje nga Bibla të kanë ndihmuar të jesh pozitiv gjatë kësaj kohe?

Më ka ndihmuar goxha këshilla te 1 Korintasve 10:24. Aty thuhet: «Secili të vazhdojë të kërkojë jo interesin e vet, por atë të tjetrit.» Kjo më kujton se nuk duhet ta mbaj mendjen vetëm te hallet e mia, por të mendoj më tepër për të tjerët.

Gjithashtu më japin shumë zemër fjalët e Jezuit te Mateu 5:10-12: «Lum ata që përndiqen për hir të drejtësisë . . . Lum ju kur njerëzit . . . thonë lloj-lloj gënjeshtrash të liga kundër jush për shkakun tim! Gëzoni dhe ngazëlloni, se i madh është shpërblimi juaj në qiej, sepse kështu i përndoqën edhe profetët përpara jush.» Këto vargje më mbushin me guxim, qëndrueshmëri dhe shpresë.

Dimitri Mihajlovi

Lindur: 1977 (Kupçanovkë, Kazakistan)

Biografia: Ka studiuar për elektronikë dhe ka punuar si administrator sistemesh kompjuterike. I pëlqen fotografia dhe editimi i videove

E mësoi të vërtetën kur ishte adoleshent dhe u pagëzua në vitin 1993. U martua me Jelenën më 2003

Komente personale

Si arritët ti dhe gruaja t’i jepnit zemër njëri-tjetrit ndërsa ishe në paraburgim?

Kur isha në paraburgim, letrat e sime shoqeje ishin një burim i veçantë force. Ishin të çmuara jo vetëm sepse m’i dërgonte njeriu më i afërt për mua, por mbi të gjitha, sepse më shtonin dashurinë, besimin, shpresën dhe vendosmërinë t’i qëndroja besnik Jehovait. Ishte sikur Jehovai po e ndihmonte Jelenën të zgjidhte fiks fjalët e duhura për të më ngushëlluar e për të më qetësuar. Më vonë Jelena më tregoi arsyen pse letrat e saj ishin aq të fuqishme. Para se të më shkruante, ajo i lutej me zjarr Jehovait, bënte kërkime dhe shqyrtonte me kujdes vargje nga Bibla.

Edhe unë e inkurajoja Jelenën duke i shkruar xhevahire që i gjeja në leximin personal të Biblës. I tregoja si po më jepte forcë Jehovai. Nuk lija pa përmendur bekimet e Tij dhe e falënderoja Jelenën për dashurinë e saj, shpirtin e sakrificës dhe gatishmërinë për t’i qëndruar besnike Atit tonë në çdo rrethanë.

Jelena Mihajlovi

Lindur: 1983 (Shujë)

Biografia: Pasi mbaroi shkollën e mesme, ka punuar si mësuese matematike dhe fizike

I ati i vdiq kur ishte 9 vjeçe. Nisi të kërkonte përgjigje për pyetjet që kishte për ekzistencën e Zotit dhe se çfarë ndodh kur vdesim. Pasi gjeti përgjigje të kënaqshme në Bibël, u pagëzua më 1999. U martua me Dimitrin në vitin 2003

Komente personale

Çfarë sfidash hase gjatë burgosjes së bashkëshortit?

Më duhej të punoja dyfish që të kujdesesha për vjehrrën 80 vjeçe. Kur arrestuan Dimitrin, shëndeti i saj u përkeqësua menjëherë. Për më tepër, qendra e paraburgimit ishte 35 kilometra larg, ndaj që të shkoja deri atje, kërkonte mjaft kohë dhe energji. Sikur të mos mjaftonin këto, hetuesit më thërritnin vazhdimisht, më bënin presion e më kërcënonin. Më pas nisën një çështje penale edhe për mua.

Çfarë të ndihmoi t’u bëje ballë vështirësive?

I lutesha Atit tim dhe i kërkoja specifikisht shumë forcë që të mos më lëshonte zemra. Gjumin e bëja me copa nga stresi. Gjithsesi, kur zgjohesha në mëngjes, e dija që më priste një mal me punë. Por me ndihmën e Jehovait ia dola të bëja gjëra që vetë s’do t’i kisha bërë kurrën e kurrës.

Svetlana Shishini

Lindur: 1975 (Orenburg, Rajoni i Orenburgut)

Biografia: Punon si estetiste

Është martuar në vitin 1995 dhe ka një djalë e një vajzë

Kur ishte 6 vjeçe, bleu një Bibël për fëmijë. Vite më vonë mësoi se Zoti ka emër dhe vendosi të studionte Biblën me Dëshmitarët e Jehovait. U pagëzua më 2002

Komente personale

Si ka ndikuar kjo sprovë te bashkëshorti që nuk është Dëshmitar?

Kur na kontrolluan shtëpinë, kisha merak se do t’i ngriheshin nervat në kupë të qiellit me mua. Ndaj mund ta imagjinoni sa u habita kur më përqafoi dhe më tha: «Mos ki merak. Çdo gjë do të rregullohet. Më ke mua.» Im shoq nuk e kuptonte pse po më përndiqnin autoritetet. Por u ndieva tejet e lehtësuar që më mbështeti. Ishte sikur më hoqën një barrë të rëndë nga supet.

Çfarë i bëri përshtypje bashkëshortit nga ndihma që të dhanë bashkëbesimtarët?

Jehovai i nxiti motrat e vëllezërit të na ndihmonin materialisht dhe jo vetëm një herë. Gjithashtu na vinin çanta plot me ushqime. Im shoq nuk e kuptonte si kishte mundësi dhe për ç’arsye na ndihmonin me kaq altruizëm, pa kërkuar asgjë në këmbim. Sa krenare ndihesha kur i thosha se pas gjithë kësaj kishte gisht Jehovai. Ai vëren se për çfarë kemi nevojë dhe kujdeset për shërbëtorët e tij besnikë.

Na mbushet zemra plot gëzim ndërsa shohim guximin e qëndrueshmërinë e vëllezërve dhe motrave të dashura në Rusi.—1 Selanikasve 2:20.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME