16 DHJETOR 2021
RUSI

PËRDITËSIM | Leximi i Biblës çdo ditë ndihmon pesë vëllezër dhe një motër t’i bëjnë ballë përndjekjes

LUAJ

Më 25 gusht 2022 Gjykata e Krahinës së Leninskit në Saransk shpalli fajtorë vëllezërit Denis Antonov, Vladimir Atrjahin, Aleksandër Koroljov, Aleksandër Shjevçuk, Georgi Nikulin dhe motrën Jelena Nikulini. Denisi, Aleksandër Koroljovi dhe Aleksandër Shjevçuku u dënuan secili me 2 vite burg. Georgi dhe Jelena u dënuan me 4 vite e 2 muaj burg, kurse Vladimiri me 6 vite burg. Dënimet hynë në fuqi menjëherë.

Tabelë kronologjike

11 qershor 2021

Nis seanca e parë gjyqësore në Gjykatën e Krahinës së Leninskit në Saransk
2 prill 2021

Jelenën e akuzojnë se merr pjesë në një organizatë ekstremiste dhe se rekruton edhe të tjerë
31 mars 2021

Vladimirin e akuzojnë për organizim të veprimtarive të një organizate ekstremiste
2 korrik 2019

Aleksandër Shjevçukun dhe Georgin i lirojnë nga paraburgimi dhe i urdhërojnë të mos largohen nga zona
28 mars 2019

Vladimirin e lirojnë nga paraburgimi dhe e urdhërojnë të mos largohet nga zona
8 shkurt 2019

Aleksandër Shjevçukun, Vladimirin dhe Georgin i futin në një qendër paraburgimi
4 shkurt 2019

FSB-ja ngre një çështje penale kundër pesë vëllezërve dhe Jelenës për organizim të veprimtarive të një organizate ekstremiste

Të dhëna

Denis Antonovi

Lindur: 1976 (Siktivkar, Republika e Komit)

Biografia: Kur ishte fëmijë, familja e tij transferohej shpesh për shkak të punës së të atit. Ndoqi një shkollë teknike për t’u specializuar si elektricist dhe mekanik i pajisjeve minerare

Ka punuar në një minierë si elektricist për pesë vjet. I pëlqen shumë fotografia dhe shahu

Kishte shumë pyetje për Zotin, prandaj u përpoq të kuptonte literaturën fetare dhe Biblën, por më kot. Ndërsa ishte në ushtri, shkëmbente letra me një shok që po studionte Biblën me Dëshmitarët e Jehovait. U prek thellë kur mësoi për saktësinë e Biblës dhe për emrin e Perëndisë, Jehova. U pagëzua si Dëshmitar i Jehovait në vitin 1998. U martua me Olgën më 2015

Komente personale

A mund të përmendësh një varg nga Bibla që të ka ndihmuar të jesh i guximshëm dhe të qëndrosh besnik?

Një nga shkrimet e mia të preferuara është Zanafilla 15:1 . . . E kam veçanërisht për zemër këtë varg, sepse më vinte shpesh në mendje mbrëmjen kur policët e FSB-së erdhën në apartamentin tonë dhe më morën në hetuesi. . . . Më qetësoi shpirtin dhe më ndihmoi të qëndroja besnik.

Vladimir Atrjahini

Lindur: 1987 (Rozhdestveno, Republika e Mordovisë)

Biografia: Është rritur në familje me një prind. Ka një vëlla më të vogël. I pëlqen të luajë futboll, volejboll dhe hokej. Është programues kompjuterësh dhe punon si administrator sistemi

Filloi të interesohej për Biblën kur ishte ende në shkollë. U pagëzua si Dëshmitar i Jehovait në vitin 2004. Më 2009 u martua me Marijan. Çifti ka dy fëmijë të vegjël, që ishin nëntë muajsh dhe 2 vjeç kur arrestuan Vladimirin

Komente personale

Si është forcuar miqësia jote me Jehovain gjatë këtyre sprovave?

Kur më ndanë nga familja, isha komplet i shkurajuar dhe tej mase i shqetësuar. Kur më çuan në qendrën e paraburgimit, një nga punonjësit atje po plotësonte disa dokumente. Në një moment më pyeti pse më kishin arrestuar. Me sa duket i kisha thënë që kisha merak [për familjen]. Pa hezituar fare më tha: «Miqtë e tu nuk do ta braktisin familjen tënde.» . . . Ai s’kishte pikë dyshimi se bashkëbesimtarët do të kujdeseshin për familjen time . . . M’u duk sikur Jehovai po përdorte këtë rojë për të më kujtuar se duhet të mbështetesha me besim tek Ai. Kur dola nga paraburgimi dhe po ecja me gruan time, u mahnita teksa më tregonte me sa butësi e dashuri ishte kujdesur Jehovai për ta nëpërmjet vëllezërve e motrave.

Aleksandër Koroljovi

Lindur: 1978 (Zemetçinski, Rajoni i Penzës)

Biografia: Është rritur pa baba. Kur ishte fëmijë, i pëlqente peshkimi dhe futbolli. Pas shkollës së mesme, ka punuar si shofer kamioni dhe makinist. Ka punuar edhe në fermë si barí dhe blegtor. Aktualisht punon si marangoz dhe bën punime prej druri

Kur studioi Biblën me Dëshmitarët e Jehovait, gjeti përgjigje për pyetje që e kishin munduar prej vitesh. Në vitin 1998 u pagëzua. Në vitin 2006 u martua me Nataljan që ka një djalë, të cilin po e rritin së bashku

Komente personale

Si të ndihmon pjesëmarrja në mbledhjet javore?

Marr forcë sidomos nga programi i leximit të Biblës në mbledhjen e mesjavës. Kur shqyrtoj shembullin e shërbëtorëve të Jehovait në të kaluarën, marr zemër nga guximi dhe besimi që treguan. Ndërsa zbatoj sugjerimet që marrim në mbledhje, e kam më të lehtë të tregoj mirësi. I lutem vazhdimisht Jehovait që të më drejtojë të sillem siç duhet dhe që të mos . . . i sjell sharje emrit të tij.

Georgi Nikulini

Lindur: 1963 (Rovenki, Ukrainë)

Biografia: Është trajnuar si shofer dhe mekanik makinash. Është i zoti edhe për punime grafike, riparim radiosh satelitore, mirëmbajtje pajisjesh dhe gdhendje në dru

Gjithmonë i ka pëlqyer të studiojë e të mësojë gjëra të reja. Ishte veçanërisht kureshtar për origjinën e njerëzimit. Studimi i Biblës me Dëshmitarët e Jehovait e ndihmoi të gjente përgjigje të kënaqshme për shumë nga pyetjet e tij

Komente personale

Çfarë të ndihmoi të ruaje besimin dhe guximin kur ishe në paraburgim?

Më kanë ndihmuar kërkimet rreth vargjeve të Biblës dhe meditimi për to. Tekefundit, [Bibla] përmban shumë shembuj të shërbëtorëve të Jehovait që kanë treguar besim e guxim. Provoj kënaqësi të thellë kur i imitoj.

Nga historia e dimë se Satanai përdor gënjeshtra të paimagjinueshme për të na lëkundur qëndrueshmërinë. Nga ana tjetër, ne e dimë se nuk duhet t’u kushtojmë vëmendje këtyre shpifjeve. Përkundrazi duhet ta pranojmë se janë diçka që pritet prej tij.

Jelena Nikulini

Lindur: 1968 (Monastirskoje, Republika e Mordovisë)

Biografia: Kur ishte fëmijë, i pëlqente të bënte ski dhe të qepte. Mësoi punën si rrobaqepëse e më vonë si modeliste. U transferua në Saransk dhe në Toljati për të gjetur punë. Punoi si rrobaqepëse. Aktualisht punon si sanitare

Në vitin 2016 u martua me Georgin. Filluan të kishin pyetje rreth Biblës. Mësuan se Perëndia nuk është indiferent ndaj vuajtjeve të njerëzve, përkundrazi është i dhembshur dhe i dashur. Në vitin 2017 u pagëzua si Dëshmitare e Jehovait

Komente personale

Si ke nxjerrë dobi nga ndihma që të kanë dhënë motrat e vëllezërit?

Një vit pas kontrollit [të policisë], ra një zjarr që na la pa shtëpi. . . . Kujdesi që na treguan motrat e vëllezërit u bëri shumë përshtypje të afërmve të mi. Tani ata po zbatojnë këshillat e Biblës në jetën e tyre dhe [po përparojnë në të vërtetën].

Aleksandër Shjevçuku

Lindur: 1989 (Pjatigorsk, Territori i Stavropolit)

Biografia: Ka marrë stërvitje për projektues peizazhi dhe për ndërtim. Më vonë u transferua në Saransk. Ka punuar në një mobilieri. I pëlqen shumë basketbolli dhe pingpongu

Stërgjyshi dhe stërgjyshja e tij u internuan në Siberi ngaqë ishin Dëshmitarë të Jehovait. Të dy prindërit e tij kanë lindur në Siberi

U pagëzua më 2006. Në vend të shërbimit ushtarak ka kryer shërbim civil alternativ

Komente personale

Cilat zakone të mira të ndihmuan të përballoje vështirësitë gjatë katër muajve në paraburgim?

Gjithmonë e kemi lexuar shkrimin e ditës së bashku si familje para se të hanim mëngjesin, madje që kur isha shumë i vogël. Ky ishte një zakon i rrënjosur thellë tek unë dhe u përpoqa ta mbaja edhe kur isha në burg. Në fillim, kur nuk kisha Bibël, mundohesha të kujtoja disa vargje ose shembuj të shërbëtorëve të Jehovait dhe meditoja rreth tyre. Fragmenti i parë që më erdhi në mendje ishte Isaia 40:26-31. Është një nga shkrimet e mia të preferuara. Më ndihmon që të mos harroj se Jehovai është Krijuesi dhe se ka një fuqi e pushtet të jashtëzakonshëm. Këtë fuqi e përdor për të na dhënë forcë në situata të vështira ne njerëzve të thjeshtë.

Jemi të bindur se Jehovai do të vazhdojë t’u tregojë dashuri besnike dhe besnikëri motrave e vëllezërve tanë të shtrenjtë që po hasin përndjekje në Rusi e që mbështeten me besim tek Ai.—Zanafilla 32:10.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME