14 SHTATOR 2023 | PËRDITËSUAR MË 22 SHTATOR 2023
RUSI

PËRDITËSIM—MOTRAT I SHPALLIN FAJTORE | Tri motra marrin forcë nga lutja

LUAJ

Më 21 shtator 2023, Gjykata e Krahinës së Zejës në Rajonin e Amurit shpalli fajtore motrat Margarita Moisejenko, Galina Jatsik dhe Jelena Jatsik. Ato u dënuan përkatësisht me 3 vjet vënie në provë, 2 vjet vënie në provë dhe 2 vjet e 6 muaj vënie në provë. Për momentin nuk u duhet të futen në burg.

Të dhëna

Margarita Moisejenko

Lindur: 1978 (Krasnojarsk, Territori i Krasnojarskut)

Biografia: Punon si rrobaqepëse. Më 1998 u martua me Kostantinin. Më 14 korrik 2021, Konstantinin e dënuan me 6 vite vënie në provë

Biblën filloi ta studionte kur ishte 18 vjeçe, pasi i vdiq një i afërm. Më 2001, u pagëzua si Dëshmitare e Jehovait

Komente personale

Çfarë të ka ndihmuar të qëndrosh?

Më kujtohet kur dëgjova të trajtohej shkrimi i Proverbave 21:31 në kongresin rajonal të vitit 2018, me temë: «Ji guximtar!» Shkrimi thotë: «Kali përgatitet për ditën e betejës, por shpëtimi i përket Jehovait.» Nga natyra, kuajt tremben kollaj. Por, që të mos tremben në betejë, duhet të «përgatiten» ose të stërviten. E njëjta gjë vlen edhe për ne. Nuk lindim të guximshëm dhe me besim. Duhet t’i zhvillojmë këto cilësi që të jemi gati për betejat tona personale. Nga kjo kuptoj sa rëndësi ka ta forcoj miqësinë me Jehovain, ta studioj thellë Biblën dhe të lutem që të mos më lëkundet besimi, pavarësisht si shkojnë gjërat.

Galina Jatsik a

Lindur: 1950 (Zejë)

Biografia: Ka punuar si analiste e kostove në departamente që merreshin me rinovimin dhe mirëmbajtjen e qytetit. Tani është në pension

U martua me Valerin më 1971. Patën një vajzë dhe një djalë. Më 1995 mbeti vejushë

U rrit si ateiste, por gjithnjë e pyeste veten për origjinën e jetës. Filloi të lexonte revistat Kulla e Rojës dhe Zgjohuni! e të ndiqte mbledhjet. Pastaj gjeti prova bindëse se Krijuesi ekziston. U pagëzua më 1994

Komente personale

Çfarë ke mësuar për fuqinë e lutjes gjatë kësaj periudhe të vështirë?

Po çmoj gjithnjë e më shumë sa vlerë ka edhe një lutje e shkurtër në situata të papritura. Kjo më ndihmon të ruaj qetësinë dhe të përgjigjem siç duhet. Është diçka e bukur të di që të tjerët luten për mua. Jakovi 5:16 thotë: «Përgjërimi i të drejtit ka shumë forcë.» Lutjet që vëllezërit e motrat bëjnë për mua, janë një ndër arsyet pse kam paqe dhe nuk më zë paniku. Lutjet e mia dhe të të tjerëve janë si komardare shpëtimi për mua.

Jelena Jatsik b

Lindur: 1972 (Zejë)

Biografia: Punon si rrobaqepëse për gra

U martua me Andrein më 1994 dhe kanë një vajzë

E ëma dhe vëllai i vogël, Jevgeni Bitusovi, ishin të parët që filluan të studionin Biblën me Dëshmitarët e Jehovait. Jelena vërejti sa praktike janë parimet e Biblës dhe si i ndryshoi jeta për mirë kur filloi t’i zbatonte. U pagëzua më 1997

Komente personale

Si ka ndikuar përndjekja te ti?

Miqësia ime me Perëndinë është forcuar. I lutem Jehovait për qetësi dhe ai u përgjigjet lutjeve të mia duke më dhënë paqe. Më është rritur edhe çmueshmëria për vëllezërit e motrat. Ngushëllohem kur mendoj se gjithnjë janë gati të më vijnë në ndihmë. Ndihem pjesë e një familjeje të madhe. Gjithashtu jam bërë më e vetëdijshme sa e rëndësishme është të lutemi për ata që, ashtu si vëllai im Jevgeni, janë të burgosur. Lutem çdo ditë për ta.

Përvojat e këtyre motrave na kujtojnë se Jehovai i dëgjon lutjet tona dhe na ndihmon të zhvillojmë cilësitë që na duhen për të duruar sprovat.—1 Gjonit 5:14.

Tabelë kronologjike

21 mars 2019

Familjes Moisejenko i kontrollojnë shtëpinë
13 tetor 2020

Jelenës dhe Galinës u kontrollojnë shtëpitë
22 nëntor 2021

Ngrihet një çështje penale
15 shkurt 2022

Vënë kufizime për udhëtimet
24 prill 2023

Fillon procesi penal

a b Motrat Galina Jatsik dhe Jelena Jatsik nuk kanë lidhje familjare.

Shih edhe

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME