20 GUSHT 2021 | PËRDITËSUAR MË 28 NËNTOR 2022
RUSI

PËRDITËSIM—SHPALLET VENDIMI | Tre vëllezër dhe një motër në Dagestan marrin ndihmë nga Jehovai gjatë përndjekjes

LUAJ

Më 24 nëntor 2022, Gjykata e Krahinës së Kirovksit në Mahaçkalë dënoi vëllezërit Marat Abdulgalimovin, Arsen Abdullajevin dhe Anton Dergaljevin, si dhe motër Marija Karpovën. Ata u dënuan nga 6 deri në 6 vite e gjysmë vënie në provë, por nuk duhet të futen në burg në këtë moment.

Tabelë kronologjike

27 maj 2020

Pas 362 ditësh, Maratin, Arsenin, Antonin dhe Marijan i transferuan nga qendra e paraburgimit në arrest shtëpie
4 qershor 2019

Gjykata e Krahinës Sovjetike të Mahaçkalës i futi të katërt në një qendër paraburgimi
1 qershor 2019

Oficerë të FSB-së, policisë sekrete të Rusisë, bastisën 13 shtëpi të Dëshmitarëve të Jehovait në Dagestan
27 maj 2019

Zyra e FSB-së në Dagestan ngriti një çështje penale kundër Maratit, Arsenit, Antonit dhe Marijas

Të dhëna

Marat Abdulgalimovi

Lindur: 1991 (Mahaçkalë, Republika e Dagestanit)

Biografia: Ka tre motra e vëllezër. I pëlqen të luajë futboll. Ka mësuar zanatin e saldatorit dhe kohët e fundit ka punuar në një dyqan këpucësh

Që kur ishte i vogël, kishte qejf të lexonte Biblën. E bënin për vete njerëzit që imitojnë Krishtin dhe që i duan të tjerët. Në vitin 2013 u pagëzua si Dëshmitar i Jehovait

Komente personale

Çfarë të ka ndihmuar të tregosh qëndrueshmëri për pothuajse një vit në një qendër paraburgimi?

Nisa të mendoja thellë për rrethanat e mia dhe t’i krahasoja me rrethanat e Jozefit. Unë rrezikoja maksimumi 10 vite burg, kurse Jozefi qëndroi 13 vjet në burg. Me ndihmën e Jehovait, edhe unë mund të qëndroja besnik, pavarësisht nga rrethanat. Teksa shihja si u përgjigjej Jehovai lutjeve të mia, fillova t’ia hidhja gjithë barrën atij. Psalmi 55:22 më ndihmoi ta përballoja këtë sprovë. Ky shkrim premton se po t’ia hedh barrën Jehovait, ai do të më mbështetë. Pikërisht këtë bëra.

Arsen Abdullajevi

Lindur: 1979 (Kasumkjent, Republika e Dagestanit)

Biografia: Që kur ishte i ri, i pëlqente të luante volejboll dhe të lexonte libra. Është diplomuar në teknologjinë e bërjes së verës. Kohët e fundit ka punuar në riparimin e sistemeve ngrohëse dhe hidraulike

Pavarësisht nga kundërshtimi i prindërve, Arseni u pagëzua si Dëshmitar i Jehovait në vitin 2000. Është i martuar me Suatën dhe kanë një djalë të vogël

Komente personale

Si e kapërceve shkurajimin gjatë kohës që ishe në paraburgim?

Më kanë ndihmuar shumë këngët tona që ma ngrinin zemrën peshë. I këndoja shpesh me vete. Kënga 45, «Mendimet e thella të zemrës», u bë kënga ime e preferuar. Patjetër që ka pasur momente kur ndihesha përtokë, i lodhur nga gjithçka, i acaruar dhe nuk doja të bëja asgjë. Megjithatë përpiqesha të mos i lejoja këto ndjenja të zgjasnin më tepër se një ditë. Në ato raste i thosha vetes: «Nesër do të zgjohesh dhe do të jetë gjithçka në rregull. Këto ndjenja do të largohen. Ji i fortë, familja ka nevojë për ty, e po njësoj edhe vëllezërit e motrat.»

Anton Dergaljevi

Lindur: 1985 (Rostov-mbi-Don, Rajoni i Rostovit)

Biografia: Nëna e Antonit i ka rritur e vetme atë dhe vëllanë e tij. Ajo dhe gjyshja i mësuan të donte parimet e Biblës. Ka punuar si elektricist dhe arkitekt peizazhi. Në vitin 2002 u pagëzua si Dëshmitar i Jehovait

Komente personale

Si të ka mbështetur Jehovai gjatë kësaj sprove?

Vëllezërit e motrat kanë bërë shumë për ne. Një nga shokët e qelisë më kishte thënë se pas pak muajsh miqtë nuk do të më dërgonin më pako. Sa habitej kur shihte se ata vazhdonin të më dërgonin pako edhe pas gjashtë muajsh, e madje edhe pas gati një viti!

Çfarë do t’u sugjeroje vëllezërve që të përgatiten për përndjekjen?

Do t’u këshilloja të mos lënë pas dore mbledhjet. Më merrte shumë malli për mbledhjet. Shfrytëzo çdo mundësi që të jep Jehovai. Kujdesu për marrëdhënien tënde me të dhe mos ki frikë nga asgjë. Jehovai është gjithmonë në krahun tonë!

Marija Karpova

Lindur: 1980 (Magadan, Rajoni i Magadanit)

Biografia: Ka dy vëllezër. I pëlqen të bëjë ski, të udhëtojë dhe të lexojë. Është diplomuar në veterinari

Në Bibël gjeti përgjigje të kënaqshme për të ardhmen dhe vendosi të bëhej Dëshmitare e Jehovait. U pagëzua në vitin 1998

Komente personale

Çfarë të ndihmoi që të mos të mbyste ankthi kur ishe në paraburgim?

Arrita të kujtoja shumë vargje nga Bibla dhe i shkrova në bllok. Këto shkrime më dhanë forcë gjatë tre muajve që nuk kisha Bibël. Më jepte shumë zemër Filipianëve 4:6, 7. Sa herë që hasja ndonjë problem të ri, hapja bllokun, lexoja këtë shkrim dhe i thosha vetes: «Mos ji në ankth për asgjë.» Pastaj ndihesha më mirë.

Çfarë të bind se Jehovai të ka ndihmuar gjatë kësaj periudhe të vështirë?

Një nga rastet kur më ka ndihmuar, ishte kur më vdiq babai [ndërkohë që unë isha në qendrën e paraburgimit]. E mora lajmin nga mamaja, jo nga një i panjohur, sepse hetuesi më lejoi të flisja me të në telefon. Gjithashtu, meqë nuk mund të isha pranë mamasë për ta mbështetur, dy miq të mi i qëndruan pranë. Bënë gjithë atë rrugë që të shkonin tek ajo dhe ta mbështetnin gjatë funeralit. Vëllezërit e motrat nuk e harruan mamanë. E merrnin në telefon, i shkruanin letra, i dërgonin kartolina dhe e ndihmonin në mënyra praktike që të ishte e pranishme gjatë seancave gjyqësore.

Jemi plotësisht të sigurt se Perëndia Jehova do të veprojë në përputhje me emrin e vet dhe do të bëhet gjithçka që nevojitet për të mbrojtur e për të ndihmuar shërbëtorët e tij.—Eksodi 3:14.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME