28 NËNTOR 2022 | PËRDITËSUAR MË 27 PRILL 2023
RUSI

PËRDITËSIM—U VENDOSIN GJOBA | Ruajnë qetësinë ngaqë mbështeten te Jehovai

LUAJ

Më 26 prill 2023 Gjykata e Krahinës së Leninskit në Nizhnji-Novgorod shpalli fajtorë vëllezërit Oleg Konshin, Sergej Maljanov dhe Roman Zhivolupov a, si dhe motrën Svetlana Maljanov, vajzën e Sergejit. Gjykata u vendosi gjoba që variojnë nga 450.000 rubla (5.494 dollarë amerikanë) në 700.000 rubla (8.546 dollarë amerikanë).

Të dhëna

Oleg Konshini

Lindur: 1971 (Lugë, Rajoni i Leningradit)

Biografia: Punon si mekanik makinash. U martua me Irinën në vitin 1991 dhe kanë dy djem

Dëshmitarët e Jehovait i njohu nëpërmjet së ëmës, e cila kishte filluar të studionte Biblën me ta. I bëri përshtypje që e ëma kishte ndryshuar për mirë dhe donte të mësonte më tepër. U pagëzua në vitin 2003

Komente personale

Çfarë ke mësuar deri tani nga përndjekja?

Kam kuptuar se përndjekja të frikëson shumë më tepër kur nuk e përjeton vetë. Kur e përjeton vetë, e dallon menjëherë dorën e Jehovait, sepse ai të jep qetësi, forcë si dhe të ndihmon të mendosh me kthjelltësi. Mbështetja e tij më jep siguri se do t’ia dal të them e të bëj atë që duhet. Gjithashtu, ai më ka ndihmuar të mos merakosem së tepërmi për gjëra që s’ia vlejnë.

Sergej Maljanovi

Lindur: 1969 (Nizhnji-Novgorod, Rajoni i Nizhnji-Novgorodit)

Biografia: Që i vogël mësoi patinazhin në akull. Ka marrë pjesë në ture të ndryshme në Rusi dhe në vende të tjera si akrobat që perfomon në akull me trupën e cirkut Moscow Circus on Ice. Ka një vajzë, Svetlanën, e cila po ashtu është e akuzuar në këtë çështje

Filloi të studionte Biblën pasi një koleg e prezantoi me Dëshmitarët. I ndiqte mbledhjet në çdo vend që udhëtonte me trupën e cirkut. U prek shumë nga dashuria dhe uniteti që shihte mes Dëshmitarëve të Jehovait dhe u pagëzua në vitin 1998

Komente personale

Si e keni mbështetur njëri-tjetrin ti dhe vajza në këtë periudhë të vështirë?

Në fillim, kur më morën në pyetje, hetuesit më kërcënuan se do të kishim pasoja si unë, si vajza, nëse nuk bashkëpunoja me ta dhe nëse nuk firmosja se isha fajtor. Duke u përpjekur të më shtonin presionin emocional, ata madje sajuan një skenar, sipas të cilit unë dhe vajza «rastësisht» u gjendëm në të njëjtin korridor të qendrës së hetimit. Mendoj se shpresonin se takimi me vajzën do të ma dobësonte vendosmërinë dhe do të ma shtonte merakun se çfarë mund t’i ndodhte po të mos veproja si donin ata. Mirëpo ndodhi e kundërta. Në ato pak çaste i dhamë zemër dhe e siguruam njëri-tjetrin se Jehovai do të ishte me ne. Jo vetëm që nuk u frikësova, por siguria dhe vendosmëria e sime bije ma forcuan edhe mua vendosmërinë. Ua bëra të qartë, se sado të përpiqeshin, nuk do të firmosja kurrsesi.

Svetlana Maljanovi

Lindur: 1996 (Nizhnji-Novgorod)

Biografia: I pëlqen poezia, të lexojë dhe të këndojë. Është mësuese e gjuhëve angleze dhe frënge

I ati, Sergeji, filloi ta mësonte për Jehovain që kur ishte fëmijë. U pagëzua në vitin 2016 kur ishte 20 vjeçe

Komente personale

Si u ka dhënë zemër të tjerëve përvoja jote?

Vuaj nga ankthi, ndaj kur filluan të arrestonin vëllezërit e motrat, vrisja mendjen nëse do ta përballoja dot po të më arrestonin edhe mua. Kur policët hynë me forcë në shtëpinë time dhe më arrestuan, nisa të lutesha menjëherë. E dija se në atë moment mund të mbështetesha vetëm te Jehovai. Madje, për habinë time, falë ndihmës së Jehovait nuk u dorëzova as kur më morën në pyetje, megjithëse isha nën presion të madh psikologjik. Ka raste që një vëlla a motër thotë: «Nëse ia doli Svetlana, mund t’ia dal edhe unë!»

Vëllezërit e motrat që mbeten besnikë pavarësisht nga përndjekja, janë provë e gjallë se ata që ‘shpresojnë te Jehovai, do të jenë guximtarë e me zemër të fortë’.—Psalmi 27:14.

Tabelë kronologjike

7 janar 2019

Një gjykatës autorizon policinë të monitorojë telefonatat dhe komunikimet elektronike të Sergejit
16-17 korrik 2019

Policia kontrollon shtëpitë e 31 familjeve të Dëshmitarëve të Jehovait në Nizhnji-Novgorod dhe në Rajonin e Nizhnji-Novgorodit. Olegun, Sergejin dhe Svetlanën i arrestojnë dhe i futin në një burg të përkohshëm. Kundër tyre ngrenë një çështje penale
18 korrik 2019

Olegun, Sergejin dhe Svetlanën i lirojnë nga burgu i përkohshëm. Gjykata u vë kufizime dy vëllezërve që të mos largohen nga shtëpia në orare të caktuara, të mos komunikojnë me njëri-tjetrin dhe të mos përdorin internetin
24 gusht 2021

Romanin e akuzojnë për pjesëmarrje në aktivitete të një organizate ekstremiste dhe i vënë kufizime për udhëtimin
3 mars 2022

Nis procesi penal

a b Gjatë kohës që u botua ky artikull, nuk kishim fotografi të vëlla Roman Zhivolupovit.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME